i) Lege provinziala di 23 de aurì dl 2014, n. 31)
Istituziun dla cuta sön i imobii comunala (IMI/GIS)

(1)  Abitaziuns che é a desposiziun é dötes chës abitaziuns por chëres che chësta lege o le Comun n'á nia stabilí cun le regolamënt preodü dal articul 2, coma 2, alicuotes alisirades y dötes chës abitaziuns por chëres che le Comun ne vëiga nia danfora, cun le regolamënt preodü dal articul 2, coma 2, l'alicuota ordinara por öna o de plü de chëstes situaziuns de fat:

1. abitaziuns che vëgn ma afitades por fins abitatifs sön la basa de n contrat de afit registré, mo nia por fins turistics;  32)
   
2. abitaziuns, afitades sön la basa de n contrat de afit registré, sce l'afitadin/l'afitadina á stabilí iló süa residënza anagrafica y se tëgn de regola sö iló;
   
3. abitaziuns conzedüdes en nuzaziun aladô dl articul 23 dl decret-lege di 12 de setëmber dl 2014, n. 133 (rent to buy), y mudaziuns suandëntes, ma por fins abitatifs sön la basa de n contrat de afit registré;
   
4. abitaziuns preodüdes dal articul 9, coma 8, lëtres a), e) y f) sce al ne vëgn nia stabilí por chëstes n'alicuota arbassada o n'alicuota aposta;
   
5. n'abitaziun sora, dlungia n'abitaziun prinzipala che é en posses dla familia dl'abitaziun prinzipala, y che vëgn adorada dala medema familia adöm cun l'abitaziun prinzipala;
   
6. n'abitaziun sora, che é gnüda metüda adöm al'abitaziun prinzipala cun na pratica da frabiché regolara y che vëgn adorada dai mëmbri relatifs dla familia sciöche abitaziun prinzipala unica;
   
7. abitaziuns conzedüdes en adoranza debann a porsones imparentades tres le maridé de pröm degré, sce la porsona imparentada á stabilí iló süa residënza anagrafica y se tëgn de regola sö iló;
   
8. abitaziuns dles categories catastales A/1, A/7, A/8 y A/9 a chëres che al ne pó nia gní apliché les reduziuns de alicuota preodüdes da chësta lege;
   
9. n'abitaziun sora che vëgn adorada da so proprietar/süa proprietara o da che che á le dërt de usufrüt respetif, da sü mituns/sües mitans o da so om/süa fomena por rajuns de laur o de stüde;
   
10. abitaziuns che é en posses de daturs/daturies da laur y vëgn metüdes a desposiziun de sü dependënc/sües dependëntes sciöche pert dla retribuziun (fringe benefit) y locai por l'alojamënt temporan de personal aladô dl articul 27, coma 2, lëtra c) dla lege provinziala di 10 de messé dl 2018, n. 9, y mudaziuns suandëntes;
    
11. abitaziuns che é de proprieté de impreses te chëres che n titolar/na titolara dl'impresa o n assozié/n'assoziada dl'impresa y süa familia á stabilí süa residënza anagrafica y se tëgn de regola sö; 33)
    
12. abitaziuns de comproprieté olache n comproprietar/na comproprietara á süa residënza anagrafica y se tëgn de regola sö;
    
13. l'abitaziun olache le titolar/la titolara dla proprieté bludra á süa residënza anagrafica y se tëgn de regola sö;
    
14. abitaziuns nia da sté y nia abitables che ne vëgn de fat nia adorades;
    
15. 34)
    
16. 35)
    
17. abitaziuns conzedüdes en afit por fins abitatifs sön la basa de n contrat d'afit registré, por chëres che al é gnü emetü na confermaziun de desdita o l'ordin da desfratada deache le contrat d'afit é tomé o na confermaziun de desfratada por intardiada de paiamënt sciöche preodü dai articui 657, 658 y 663 dl codesc de prozedöra zivila, por le tëmp danter la data de confermaziun dla desdita o dl ordin de desfratada deache le contrat d'afit é tomé o dla confermaziun de desfratada por intardiada de paiamënt cina la data dl protocol de consegnaziun dl'abitaziun preodüda dal articul 608 dl codesc de prozedöra zivila o, sce denant, cina ala data de renunzia ala desfratada preodüda dal articul 608/bis dl codesc de prozedöra zivila o cina che l'afitadin/l'afitadina consegnëia l'abitaziun.
    

(2)  Les abitaziuns y ci che alda lapró dles categories catastales C/2, C/6 y C/7, tla mosöra de alplü trëi unités che alda lapró, de chëstes al mascimo döes dla medema categoria conzedüdes en adoranza debann a parënc/parëntes en linea direta de ci degré chessî y en linea laterala cina al secundo degré, sce la porsona imparentada á stabilí iló süa residënza anagrafica y se tëgn de regola sö iló, y les abitaziuns preodüdes dal articul 5, coma 1, lëtra b) por le tëmp por chël che ares n'é nia gnüdes assegnades regolarmënter n'é nia da conscidré abitaziuns che é a desposiziun aladô de chësc articul.

(3)  N'abitaziun é da conscidré nia a desposiziun aladô dl coma 1 y dl coma 2 por le tëmp dl ann tratan chël che al é les condiziuns scrites dant; chëstes mëss gní cumprovades tres la documentaziun corespognënta aladô dles modalités stabilides tl regolamënt comunal, scenó tomel la ghiranza.

(4)  Ti comuns che é gnüs definis Comuns cun bojëgn de abitaziuns, aladô dla deliberaziun dla Junta provinziala preodüda dal articul 1, coma 6 vëgnel apliché, desvian dal'alicuota mascima odüda danfora dal articul 9, coma 1, por les abitaziuns che é a desposiziun preodüdes dal coma 1, n'alicuota realzada dl 2,5 porcënt, che pó gní aumentada dai Comuns cina al 3,5 porcënt.

Tl medemo tëmp vëgnel apliché ti comuns dër sëgn nominá ales abitaziuns afitades sön la basa de n contrat d'afit registré y olache l'afitadin/l'afitadina á süa residënza anagrafica y se tëgn de regola sö, n'alicuota arbassada de 0,1 punc porcentuai respet al'alicuota ordinara stabilida dai medemi Comuns, che pó smendrí ciamó deplü chësta alicuota y/o pó ne odëi nia danfora la condiziun dla residënza anagrafica y dl se tigní sö de regola iló.

(5)  Les entrades surapró che vëgn arjuntes dal'aplicaziun dles alicuotes realzades aladô dl coma 4 y aladô di articui 9/quater y 9/quinquies, comma 1, lëtres c) y d) mëss gní adorades tla mosöra de almanco le 50 porcënt dles entrades surapró por la reduziun dl'alicuota preodüda dal coma 4. 36)

L'alicuota realzada preodüda dal coma 4 vëgn aplicada dal tredejim mëis do da chël olache i sogec preodüs dal articul 6 é por le pröm iade sotmetüs ala cuta IMI por l'abitaziun o dal tredejim mëis do da chël olache al ne vëgn nia plü dant öna dles situaziuns de fat de nia-alzamënt preodüdes tl coma 1 o de fin de n alisiramënt dla cuta preodüda dala lege provinziala o dal regolamënt comunal. Tl caje de arpejuns vëgn l'alicuota realzada, preodüda tla frasa da denant, impormó aplicada dal vintecinchejim mëis do da chël dla daurida dla sozesciun ereditara.  37)