(1) I contribuënć/Les contribuëntes mëss detlarè i imobii che é te so possès tl raiun provinzial presentan na detlaraziun aposta ćina i 30 de jügn dl ann do la data olache al à metü man le possès dl imobil o al é gnü a s'al dè mudaziuns importantes por la determinaziun dla cuta, ti caji y cun les modalitês stabilides cun decret dl Presidënt dla Provinzia. La detlaraziun vel inće por i agn che vëgn do, sce i dać y les indicaziuns dades dant y insciö inće l'import dla cuta ne s'à nia mudé.
(2) Les detlaraziuns che é gnüdes presentades por l'aplicaziun dla cuta comunala söi imobii (ICI), o dla cuta comunala sön i bëgns imobiliars (IMU) vel, sce ares va a öna, inće por la cuta sön i imobii comunala (IMI/GIS).
(3) Por i imobii fora de falimënc, licuidaziuns iudiziares o licuidaziuns sforzades aministratives mëss le curadú/la curadëssa o le comissar/la comissara dla licuidaziun ti presenté, te 90 dis dala data de süa nominaziun, al Comun olache al é i imobii, na detlaraziun che atestëia che al é gnü invié ia la prozedöra. 49)
(4) La detlaraziun aladô dl coma 1 vëgn conscidrada presentada regolarmënter ince sce al vëgn adoré le formular preodü por la detlaraziun IMU, a condiziun che al resultëia tlermënter i fac che mëss gní detlará por la IMI/GIS. 50)
L'art. 12, coma 3 é gnü sostituí insciö dal art. 5, coma 11 dla l.p. di 23 de dezëmber dl 2022, n. 16.
L'art. 12, coma 4 é gnü ajunté dal art. 18, coma 12 dla l.p. di 25 de setëmber dl 2015, n. 11.