(1) La cuta vëgn calcolada tres n prozedimënt de autocalcolaziun aplican ala basa de cutaziun l'alicuota corespognënta che vel te chël Comun. Ara mëss gnì paiada por agn solars en proporziun ala cuota y ai mëisc dl ann olache l'imobil é stè en possedimënt. Por chësc fin vëgn le mëis olache le possedimënt é stè de almanco 15 dis cumpedè deplëgn. A vigni ann solar ti corespógnel n'oblianza de cuta autonoma.
(2) La cuta che é da paié ite por chësc ann corënt mëss gnì paiada te döes rates, la pröma toma ai 16 de jügn y fej fora la cuta debit por le pröm mez ann, y la secunda toma ai 16 de dezëmber sciöche saldo dla cuta da paié por döt l'ann. La cuta po inće gnì paiada te un n iade ćina ai 16 de jügn. Le Comun po stabilì cun regolamënt preodü dal articul 2, coma 2 n terminn su por le paiamënt dla cuta ćina ai 16 de dezëmber.
(2/bis) An conscidra regolars i paiamënc fac en acunt cina ai 16 de jügn de vigni ann aplican la detraziun y les alicuotes en forza l’ann da denant. Te n te caje él da paié a saldo cina ai 16 de dezëmber dl medemo ann la cuta por döt l’ann calcolada cun les alicuotes y la detraziun che vel por l'ann tributar. 51)
(3) Le paiamënt mëss gnì fat adoran le formular F24 aladô dles desposiziuns dl articul 17 dl decret legislatif di 9 de messè dl 1997, n. 241, cun les modalitês stabilides dai provedimënć d'aprovaziun dl formular y di codesc tribut dl diretur dl'Agenzia dles Entrades o tres d'atres prozedöres de paiamënt che vëgn stabilides cun decret dl Presidënt dla Provinzia. I imporć da paié ne vëgn nia arondà.
(4) Por i imobii fora de falimënc, licuidaziuns iudiziares o licuidaziuns sforzades aministratives mëss le curadú/la curadëssa o le comissar/la comissara dla licuidaziun paié ite la cuta che é debit por la dorada de döta la prozedöra dl concurs tl tëmp de trëi mëisc da canche al é gnü dé jö le decret de trasferimënt di imobii te canzlaria. 52)
(4/bis) L'aministradú/L'aministradëssa dl condomine é oblié/obliada da paié ite la cuta por les perts che an adora deboriada dl frabicat che á n rendimënt catastal autonom. Te chësc caje á l'aministradú/l'aministradëssa l'autorisaziun da tó fora l'import dla cuta da paié jö dal cunt dl condomine y vigni cuota che é debit ti vëgn aćiariada a vigni comproprietar/comproprietara y dada dant tl decunt anual. 53)
(4/ter) L'aministradù/L'aministradëssa dl condomine o dla proprieté comunitara, sön chël o sön chëra che al é gnü costituì dërć de godimënt reai a tëmp parzial (multiproprieté) é oblié/obliada da paié la cuta. L’aministradù/L’aministradëssa à l’autorisaziun da trà jö dl cunt dl condomine o dla proprieté comunitara l'import dla cuta da paié, y vigni cuota che é debit ti vëgn aćiariada a vigni titolar/titolara di dërć nominà dessura y dada dant tl decunt anual. 54)
(5) Por i imobii fora de detlaraziuns d'arpejun vëgn le paiamënt dla cuta da pert di arpadus y dles arpadësses conscidré regolar, sce al vëgn fat tl termo preodü por le paiamënt dl saldo dl secundo ann do dal ann olache al é gnü daurí la sozesciun ereditara. 55)
(6) I paiamënć fać da n cotitolar o na cotitolara por cunt de d'atri vëgn conscidrà regolars, sce al vëgn lascè alsavëi danfora.
(7) Sce n contribuënt/na contribuënta à fat le paiamënt nia pro le Comun competënt mo pro n ater, mëss le Comun che é gnü a conescënza dl paiamënt adinfal - inće do na comunicaziun aposta da pert dl contribuënt/dla contribuënta - ti trasferì i scioldi ciafà adinfal zënza fić al comun competënt. Tla comunicaziun mëss le contribuënt/la contribuënta dè dant: i dać dl paiamënt, l'import paié ite, i dać catastai dl imobil, le Comun a chël che al ti mëss gnì trasferì i scioldi dla cuta y le Comun che à ciafè i scioldi adinfal.
(8) Sce la cuta anuala fej fora 10,00 euro o manco ne mëssera nia gnì paiada.
L'art. 13, coma 2/bis é gnü ajunté dal art. 18, coma 13 dla l.p. di 25 de setëmber dl 2015, n. 11.
L'art. 13, coma 4 é gnü sostituí insciö dal art. 5, coma 12 dla l.p. di 23 de dezëmber dl 2022, n. 16.
L'art. 13, coma 4/bis é gnü injunté dal art. 2, coma 13 dla l.p. di 26 de setëmber dl 2014, n. 7, y é spo gnü sostituí insciö dal art. 8, coma 1 dla l.p. di 20 d'aurí dl 2022, n. 3.
L'art. 13, coma 4/bis é gnüs injuntà dal art. 2, coma 13 dla l.p. di 26 de setëmber dl 2014, n. 7.
L'art. 13, coma 5 é gnü sostituí insciö dal art. 5, coma 13 dla l.p. di 23 de dezëmber dl 2022, n. 16.