(1) Dala cuta che i contribuënc/les contribuëntes á da paié por l'unité imobiliara che vëgn adorada sciöche abitaziun prinzipala cun ci che alda lapró, vëgnel trat jö n import anfat ala cuta da paié por n'abitaziun dla categoria catastala A/2, classa 1, metüda adöm da 10 locai, alzada dl 30 porcënt, sciöche al vëgn alzé fora tla tabela A injuntada a chësta lege, y plü avisa por chël tëmp dl ann olache l'abitaziun vëgn destinada a abitaziun prinzipala. Chësta detraziun po gní anuzada cina al'amunta dl import dla cuta che é debit. Te Comuns cun plü zones tarifares vëgnel apliché le valur mesan aritmetich di rendimënc desvalis dla categoria catastala A/2, classa 1. Por la terza porsona de mëndra eté y dötes chëres che vëgn do che fej pert dla familia, sce ares se tëgn de regola sö y á süa residënza te chë unité imobiliara che vëgn adorada sciöche abitaziun prinzipala dla familia, vëgn la detraziun aumentada de 50,00 euro. L'import dla detraziun ti vëgn reconesciü ai contribuënc/ales contribuëntes dla familia aladô dla regolamentaziun preodüda dal coma 2. Por vigni porsona cun n gran handicap aladô dl articul 3, coma 3 dla lege di 5 de forá dl 1992, n. 104, vëgnel conzedü na detraziun implü de 50,00 euro, y plü avisa por l'unité imobiliara olache chësta porsona y süa familia se tëgn de regola sö y á süa residënza anagrafica. 41)
(2) Sce l'unité imobiliara vëgn anuzada da plü contribuënc/contribuëntes sciöche abitaziun prinzipala ti speta la detraziun a vignun/vignöna partida sö te perts anfat, bel anfat tan alta che la cuota de posses é. 42)
(3) Cun deliberaziun preodüda dal articul 2, coma 3 po le Comun despone l'aumënt dla detraziun ćina l'import dla cuta che é debit.
(4) La detraziun stabilida por les abitaziuns prinzipales vëgn ince aplicada ai frabicac dla categoria catastala A y dla categoria catastala D, che vëgn ince adorá sciöche abitaziun y é de proprieté de impreses, olache n titolar/na titolara o n assozié/n'assoziada dl'impresa á süa residënza anagrafica y se tëgn de regola sö iló. 43)
L'art. 10, coma 1 é impröma gnü mudé dal art. 2, coma 10 dla l.p. di 26 de setëmber dl 2014, n. 7, y spo dedô él gnü sostituí insciö dal art. 18, coma 9 dla l.p. di 25 de setëmber dl 2015, m. 11. Ciara ince l'art. 18, coma 14 dla l.p. di 25 de setëmber dl 2015, n. 11.
L'art. 10, coma 2 é gnü sostituí insciö dal art. 18, coma 9 dla l.p. di 25 de setëmber dl 2015, n. 11. Ciara ince l'art. 18, coma 14 dla l.p. di 25 de setëmber dl 2015, n. 11.
L'art. 10, coma 4 é naota gnü sostituí dal art. 2, coma 11 dla l.p. di 26 de setëmber dl 2014, n. 7, y dedô dal art. 5, coma 10 dla l.p. di 23 de dezëmber dl 2022, n. 16. Ciara ince l'art. 5, coma 15 dla l.p. di 23 de dezëmber dl 2022, n. 16.