i) Lege provinziala di 23 de aurì dl 2014, n. 31)
Istituziun dla cuta sön i imobii comunala (IMI/GIS)

(1)  Sciöche basa de cutaziun vëgnel tut le valur dl imobil determiné aladô de chësc articul.

(2)  Por i frabicać che é scrić ite tl cataster vëgnel tut ca sciöche basa de cutaziun le valur catastal. Le valur catastal vëgn a s'al dè sce al vëgn apliché al rendimënt catastal chisc multiplicadus:

1. 168 por i frabicać tlassificà tl grup catastal A y tles categories catastales C/2, C/6 y C/7, tut fora la categoria catastala A/10;
   
2. 147 por i frabicać tlassificà tl grup catastal B y tles categories catastales C/3, C/4 y C/5;
   
3. 84 por i frabicać tlassificà tles categories catastales A/10 y D/5;
   
4. 68,25 por i frabicać tlassificà tl grup catastal D, tut fora i frabicać tlassificà tla categoria catastala D/5;
   
5. 57,75 por i frabicać tlassificà tla categoria catastala C/1.
   

(3)  Por chësc fin dà dant la Repartiziun provinziala Liber fondiar, Cataster fondiar y urban sön i estrać dl cataster nia ma le rendimënt catastal mo inće le valur catastal.

(4)  Por i terac da frabiché vëgn le valur costituí dal valur de marcé usual, tolon en conscidraziun süa posiziun, l'indesc de frabicamënt, la destinaziun d'adoranza conzedüda, i cosć por laurs d'adatamënt eventuai dl terac che vá debojëgn por la costruziun y i prisc mesans por toc de grunt analogs sön le marcé. Le valur de marcé usual di terac destiná da gní espropriá ne pó te vigni caje nia jí sura l'amunta dl’indenité d’espropriaziun fora.  16) 

(5)  Tl caje che n toch de grunt vëgnes adoré da frabiché, n frabicat vëgnes demolí o al vëgnes fat laurs de recuperada aladô dl articul 59, coma 1, lëtres c), d) y e) dla lege provinziala di 11 d'agost dl 1997, n. 13 o aladô dl articul 62, coma 1, lëtres c), d) e) y f) dla lege provinziala di 10 de messé dl 2018, n. 9, y mudaziuns suandëntes vëgn la basa de cutaziun a s'al dé dal valur dl toch de grunt che vëgn conscidré terac da frabiché, ince desvian da ci che vëgn stabilí dal articul 4 de chësta lege, zënza tigní cunt dl valur dl frabicat che é tl laur da gní fat sö. Chësc vel cina al de olache al vëgn comuniché la fin di laurs de costruziun, recostruziun o restrotoraziun o, sce denant, cina ala data de presentaziun dla domanda d'iscriziun al cataster o de domanda de mudaziun di dac catastai dl frabicat costruí, recostruí o restrotoré. La desposiziun preodüda da chësc coma ne vëgn nia aplicada tl caje de laurs de costruziun, recostruziun o restrotoraziun, en conformité ala conzesciun da frabiché, pro frabicac che é lëdi da cuta aladô dl articul 11 de chësta lege.  17)

(6)  La basa de cutaziun vëgn smendrida dl 50 porcënt:

1. por i frabicac d'interes storich o artistich preodüs dal articul 10 dl decret legislatif di 22 de jená dl 2004, n. 42, y mudaziuns suandëntes; le comun pó desvié da chësta desposiziun sön la basa de criters ogetifs, preodon ince che al vëgnes azeré la basa de cutaziun. N aumënt dla basa de cutaziun de passa le 50 porcënt vëgn ma conzedü por i frabicac de interes storich o artistich dles categories catastales A/10, C/01, D/01, D/02, D/05, D/07 y D/08; 18)
   
2. por i frabicac che n’é, aladô dla lege provinziala di 17 de dezëmber dl 1998, n. 13, nia plü abitabli y ne vëgn de fat nia anuzá, dala data de presentaziun dla domanda de detlaraziun de inabitabilité, ma por chël tëmp dl ann olache ai é te chëstes condiziuns aladô dl arat dla comisciun competënta, y por i frabicac che, aladô dla lege provinziala di 10 de messé dl 2018, n. 9, y mudaziuns suandëntes n'é nia plü tles condizuns de agibilité y che ne vëgn de fat nia anuzá, dala data de presentaziun dla domanda de detlaraziun de inagibilité, ma por chël tëmp dl ann olache ai é te chëstes condiziuns aladô dl arat dl ofize tecnich o da pert de tecnics/tecniches da defora. 19)
   

(6/bis) La reduziun dla basa de cutaziun dl 50 porcënt aladô dl coma 6, lëtra b) vel ma por le tëmp de 3 agn dala data de presentaziun dla domanda de detlaraziun de inabitabilité o de inagibilité tan inant che al tëgn pro les condiziuns de inabitabilité o de inagibilité y de nia-adoranza. Por i frabicac che tl momënt dla jüda en forza de chësc coma é incuadrá sciöche frabicac inabitabli y inagibli aladô dl coma 6, lëtra b), scomëncia le tëmp de 3 agn dal 1. de jená dl 2023. 20)

(7)  Les alisiraziuns dades dant tl coma 6 ne po nia gnì acumulades.

(8)  Le Comun ti damana al Ofize dl cataster competënt te chël raiun la tlassificaziun di imobii nia scrić ite tl cataster o de chi che la tlassificaziun n'é nia atuala o ne va tlermënter nia a öna cun chëra de frabicać analogs dales medemes carateristiches y dà dant, sce al é poscibl, la data dl'omisciun minada. Sce al vëgn constatè n'omisciun vel dal punt d'odüda fiscal la tlassificaziun nöia dl frabicat cun faziun dal dé a chël che l'omisciun po gnì condüta derevers, o sce ara ne va nia da le determiné, dal 1. de jenà dl ann olache le Comun à fat la domanda al Ofize dl cataster competënt te chël raiun. L'Ofize dl cataster competënt te chël raiun fej cun priorité i controi di imobii segnalà dal Comun. Le proprietar/La proprietara dl imobil vëgn informè/informada che al vëgn invié ia le prozedimënt preodü da chësc coma.