i) Lege provinziala di 23 de aurì dl 2014, n. 31)
Istituziun dla cuta sön i imobii comunala (IMI/GIS)

(1)  Por la cuta preodüda dal articul 1:

1. capëscion cun "abitaziun prinzipala" l'imobil scrit ite o da podëi scrí ite tl cataster di frabicac urban sciöche unité imobiliara olache so possessur/süa possessuria se tëgn de regola sö y á süa residënza anagrafica.   6)
   
2. capëscion cun "ći che alda pro l'abitaziun prinzipala" ma les unitês tlassificades tles categories catastales C/2, C/6 y C/7, y plü avisa alplü trëi unitês che alda laprò, de chëstes al mascimo döes dla medema categoria;
   
3. capëscion cun "frabicat" l'unité imobiliara scrita ite o da scrí ite tl cataster di frabicac urban, conscidran la spersa che la costruziun ocupëia y la spersa che alda lapró sciöche pert dl frabicat, sce ares é incramplades catastalmënter y tutes ites tla calcolaziun dl rendimënt dl frabicat. Sce la domanda de cramplaziun al Ofize dl cataster competënt é gnüda presentada cina ai 30 de jügn dl 2015, vel la cramplaziun y le rendimënt nü dl frabicat determiné dala cramplaziun por l’aplicaziun dla cuta sön i imobii comunala cun faziun retroativa dal 1. de jená dl 2014. I frabicac de costruziun nöia vëgn sotmetüs ala cuta dala data de comunicaziun dla fin di laurs o, sce denant, dala data de presentaziun dla domanda d'iscriziun al cataster o de domanda de mudaziun di dac catastai. Sce la comunicaziun dla fin di laurs vëgn fata dan la presentaziun dla domanda al Ofize dl cataster competënt, velel sciöche basa de cutaziun cun faziun retroativa le valur catastal assegné canche al vëgn fat l’iscriziun;   7)
   
4. capëscion cun "terac da frabiché" la spersa che pó gní adorada da frabiché sön la basa dl plann urbanistich comunal o dl plann comunal por le teritore y la contrada, o de sües mudaziuns, aprová te na manira definitiva y publicá tl Boletin ofizial dla Regiun y jüs en forza, aladô dla lege provinziala di 11 d'agost dl 1997, n. 13 o aladô dla lege provinziala di 10 de messé dl 2018, n 9, y mudaziuns suandëntes, independentamënter dal'aprovaziun di planns d'atuaziun corespognënc. Sce por l'aprovaziun de mudaziuns al plann comunal por le teritore y la contrada vëgnel apliché l'articul 54, coma 1 y l'articul 60 dla lege provinziala di 10 de messé dl 2018, n. 9, y mudaziuns suandëntes, capëscion cun "terac da frabiché" la spersa che pó gní adorada da frabiché sön la basa dles mudaziuns aprovades cun deliberaziun dl Consëi comunal, publicades tla Rëi Zivica dl Südtirol y jüdes en forza, independentamënter dal'aprovaziun di planns d'atuaziun dl plann comunal. I frabicac scric ite tles categories catastales F/2, ater co nia chi che é tles sperses naturales y agricoles preodüdes dal articul 13, coma 2 dla lege provinziala di 10 de messé dl 2018, n. 9, F/3 y F/4 vëgn ecuipará al terac da frabiché cina che ai vëgn portá ite definitivamënter tl cataster. Nia sciöche terac da frabiché ne vel grunc en posses de paurs/paures y de che che fej pert de süa familia che dëida lauré para, sciöche ince de imprenditurs agricoi profescionai/imprendituries agricoles profescionales preodüs dal articul 1 dl decret legislatif di 29 de merz dl 2004, n. 99, y mudaziuns suandëntes, scric ite pro la previdënza agricola, sce ai vëgn laurá da chisc/chëstes y anuzá inant por l'adoranza agrara, forestala y pastorala tres l'eserzize de ativités por la coltivaziun dl terac, l'economia dl bosch, la coltivaziun de fonguns y le zidlamënt de bestiam. Sce le grunt é en posses de de plü porsones mo vëgn manajé ma da öna che á i recuisic dic dessura, ne vëgn ma la pert che é te so posses nia conscidrada da frabiché. 8)