(1) Aladô dl articul 80 dl decret dl Presidënt dla Republica di 31 d'agost dl 1972, n. 670 istituësc la Provinzia autonoma de Balsan dal ann 2014 inant la cuta sön i imobii comunala (IMI/GIS). Tl teritore provinzial sostituëscera completamënter dötes les cutes comunales sön i imobii istituides cun leges statales, inće chëres che cür i sorvisc indivisibli.
(2) Chësta lege ne comporta nia spëises a ćiaria dl bilanz statal. La neutralité finanziara por le bilanz dl Stat vëgn garantida aladô dles desposiziuns dl articul 1, coma 521 dla lege di 27 de dezëmber dl 2013, n. 147.
(3) I mesi finanziars aladô dl articul 1, coma 1 dla lege provinziala di 14 de forà dl 1992, n. 6 vëgn smendris dles cuotes dles entrades tributares resservades al Stat preodüdes dal coma 2 de chësc articul.
(4) Les mëndres entrades che vëgn a s'al dè ti comuns por faziun de chësta lege po gnì retüdes dala Provinzia. Chësc rembursamënt vëgn determiné cun l'acordanza preodüda dal articul 2 dla lege provinziala di 14 de forà dl 1992, n. 6.
(5) La cuta vëgn aplicada te düć i Comuns dla provinzia cun faziun dal 1. de jenà dl 2014 sön la basa dles desposiziuns suandëntes.
(6) La Junta provinziala deliberëia, do avëi aldí le Consëi di Comuns y do avëi aldí i Comuns interessá dala deliberaziun, vigni ann cina ai 30 de jügn sön la basa de relevamënc statistics, ci Comuns che por i fins de chësta lege é da conscidré Comuns cun bojëgn de abitaziuns dal 1. de jená dl ann do, cun la poscibilité da desfarenzié danter les zones comunales singoles di comuns respetifs. Sce la deliberaziun ne vëgn nia fata o vëgn fata massa tert vëgnel apliché la deliberaziun dl ann da denant. 3)
Ciara ince l'art. 4 (Alisiramënc dla cuta sön i imobii comunala por sostigní l'economia en relaziun cun l'emergënza epidemiologica gaujada dal COVID-19) dla l.p. di 19 d'agost dl 2020, n. 9.
L'art. 1, coma 6 é gnü ajunté dal art. 1, coma 1 dla l.p. di 20 d'aurí dl 2022, n. 3.