(1) La Junta provinziala promöi l'ativité y le funzionamënt dles biblioteches tres la surantuta direta de spëises y la conzesciun de finanziamënc.
(2) Spëises y finanziamënc vëgn autorisá por curí i cosć dl personal, i cosć por la cumpra de libri y media, por scomenciadies de promoziun dla letöra, por cumpré material sciöche ince atrezadöres y aredamënt integratif de mëndra importanza y por curí vigni atra spëisa liada diretamënter al funzionamënt dla biblioteca.
(3) Ales biblioteches zentrales cun n raiun d'anuzamënt sot a 50.000 abitanc y n orar de daurida de almanco 30 ores al'edema ti conzed la Junta provinziala, sön domanda, n finanziamënt por fá frunt ai cosć por la direturia/le diretur dla biblioteca y n'assistënta/n assistënt dla biblioteca. I orars de daurida de chëstes biblioteches mëss s'adaté ai bojëgns dla popolaziun. 52)
(4) Ales biblioteches zentrales cun n raiun d'anuzamënt de almanco 50.000 abitanc y n orar de daurida de almanco 40 ores al'edema ti conzed la Junta provinziala, dlungia le finanziamënt preodü dal coma 3, ince n finanziamënt por fá frunt ai cosć por na bibliotecara/n bibliotecar. 53)
(5) Ales biblioteches de valada por i paisc ladins preodüdes dal articul 20/bis cun n orar de daurida de almanco 30 ores al'edema ti conzed la Junta provinziala, sön domanda, n finanziamënt por fá frunt ai cosć por la responsabla/le responsabl dla biblioteca y n'assistënta/n assistënt dla biblioteca.
(6) La Junta provinziala vëgn autorisada da ti assegné ince ales biblioteches locales cun n raiun d'anuzamënt de manco co 25.000 abitanc la funziun de na biblioteca zentrala, sciöche ince da ti assegné i finanziamënc preodüs dal coma 3.
(7) Le raiun d'anuzamënt dles biblioteches zentrales y de valada, preodüdes dai comesc 3, 4, 5 y 6 vëgn stabilí dala Junta provinziala en ocajiun dla surandada dles funziuns respetives.
(8) Ales biblioteches locales gestides da ënc publics cun na responsabla/n responsabl dla biblioteca a tëmp plëgn o cun öna o döes bibliotecares/un o dui bibliotecars a mez tëmp y cun n orar de daurida de almanco 20 ores al'edema ti conzed la Junta provinziala, sön domanda, n finanziamënt por fá en pert frunt ai cosć dl personal nominé dessura. 54)
(9) Ales biblioteches locales gestides da dui ënc publics, che se mët adöm te n consorz sön la basa de n'acordanza, cun na responsabla/n responsabl dla biblioteca a tëmp plëgn o cun öna o döes bibliotecares/un o dui bibliotecars a mez tëmp y cun indöt n orar de daurida de almanco 26 ores al'edema ti conzed la Junta provinziala, sön domanda, n finanziamënt por fá en pert frunt ai cosć dl personal nominé dessura. 55)
L'art. 27, coma 3 é gnü sostituí insciö dal art. 1, coma 13 dla l.p. di 7 d'agost dl 2017, n. 12.
L'art. 27, coma 4 é gnü sostituí insciö dal art. 1, coma 13 dla l.p. di 7 d'agost dl 2017, n. 12.
L'art. 27 é gnü sostituí dal art. 25 dla l.p. di 20 d'aurí dl 1993, n. 9; le coma 3 é gnü spo mudé dedô dal art. 3 dla l.p. di 18 de otober dl 2006, n. 11.
L'art. 27, coma 9 é gnü ajunté dal art. 30, coma 1 dla l.p. di 23 de dezëmber dl 2010, n. 15.