a) Lege Provinziala di 7 de novëmber dl 1983, n. 411)
Regolamentaziun dla formaziun permanënta y dles biblioteches publiches

(1) La Junta provinziala pó, analogamënter a ci che vëgn preodü por les biblioteches ti articui 26 y 27, ti conzede finanziamënc por curí cosć de gestiun y de investimënt a istituziuns, assoziaziuns y comités cun fins de promoziun dla letöra o d'assistënza ales biblioteches, por sostigní proiec, ativités y manifestaziuns tl setur spezifich. La Junta provinziala pó implü ince organisé y gestí diretamënter de te proiec, ativités y manifestaziuns.  57)

(2) Pro les ativités, por chëres che al pó gní conzedü finanziamënc, tochel en particolar:

1. la formaziun de basa y la formaziun permanënta tl cheder dles ativités istituzionales dles biblioteches;
   
2. la promoziun dla letöra;
   
3. les scomenciadies de organisaziun y l'assistënza de biblioteches publiches cun lapró les biblioteches de scora;
   
4. i sorvisc de preparaziun y cataloghisaziun di libri por biblioteches cun lapró ince proiec de automatisaziun eventuai.  58)
   

(3) Al pó ma gní sostigní les istituziuns, les assoziaziuns y i comités che

1. á süa sënta tla provinzia de Balsan o fej sües ativités dailó;
   
2. ti lascia alsavëi al publich sü programs d'ativité;
   
3. ti mët a desposiziun ala Junta provinziala i dac che reverda les ativités y i finanziamënc;
   
4. ne n'á degügn fins de davagn.
   

(3/bis) Al pó ince ti gní conzedü finanziamënc a cooperatives dl medemo setur che é scrites ite tl register provinzial aposta.  59)

(4) La Junta provinziala pó ti conzede contribuc o ti assegné mesi finanziars a assoziaziuns y consorc de biblioteches por la realisaziun de proiec pilot; chisc dess ester d'ütl por l'organisaziun de n sorvisc bibliotecar coordiné a livel teritorial por sostigní les biblioteches zentrales y chëres de valada. Les assoziaziuns o i consorc á dantadöt l'inciaria da ciaré che i programs dles biblioteches sides coordiná un cun l'ater, che les cumpres de libri y dl material de documentaziun vëgnes fates te na manira coordinada, ince tres formes da cumpré ite zentralisades, che al vëgnes arjigné ca catalogs coletifs, organisé y gestí l'imprëst interbibliotecar, svilupé inant y coordiné les ativités culturales dles biblioteches y inultima che al vëgnes relevé regolarmënter sciöche le sorvisc funzionëia y te ci condiziuns che les strotöres dles biblioteches é. De n'assoziaziun o n consorz de biblioteches mëssel te vigni caje fá pert almanco na biblioteca zentrala o na biblioteca de valada. Dl'assoziaziun o dl consorz pól ince fá pert, do che al é gnü dé l'autorisaziun dla Junta provinziala, les biblioteches de scora dl teritore tut ite.  60)