(1) La Provinzia promöi, tres la surantuta de spëises y la conzesciun de finanziamënc, la cumpra, la costruziun, le ressanamënt, l'ampliamënt y la manutenziun de imobii, preodüs sciöche sëntes de biblioteches, sciöche ince la cumpra de aredamënt, de atrezadöres y de d'atri mesi y aiüc tecnics y de trasport che é debojëgn por le sorvisc. Pro les spëises ametüdes a finanziamënt él ince i cosć de proietaziun eventuai.
(2) La Junta provinziala pó fá depëne la conzesciun de finanziamënc a ënc privac por la cumpra, la costruziun, la restrotoraziun generala y l'ampliamënt de imobii, preodüs sciöche sëntes de biblioteches, dala conclujiun de n contrat cun l'ënt corespognënt che regolëia la destinaziun y l'adoranza de chëstes strotöres. La dorada dl contrat ne pó nia ester de manco de 10 agn y gnanca de plü de 30 agn y pëia ia dala data, fata fora dales perts, de adoranza efetiva dl imobil por i fins dá dant tl contrat. Le contrat é da anoté tl liber fondiar sön domanda dl Presidënt dla Provinzia.
(3) L'alienaziun di imobii che é gnüs cumprá, fac sö, restrotorá o ampliá cun finanziamënc aladô dl coma 2 mëss gní autorisada damperfora dala Junta provinziala. La Junta provinziala pó sotmëte l'autorisaziun ala restituziun di finanziamënc ciafá y plü avisa en proporziun ala dorada dl'adoranza efetiva.
(4) Sce l'imobil vëgn aliené zënza autorisaziun, mëss l'ënt interessé ti rete ala Provinzia döt le finanziamënt ciafé, cun lapró i fic aladô dla spana de scunt ofiziala. 51)