(1) Sce l ne, tl cajo de anulamënt dl’autorisazion, nia puscibl, sun la basa de na valutazion mutiveda, sané la mancianzes dla pruzedures aministratives o de represtiné l stat dla lueges, nce tenian n cunscidrazion l bujën de n compromis danter i nteresc defrënc de mantenì l’ativiteies dejëutes aldò dla lege, aplichea l’autorità respunsabla dla verdia na straufonga de scioldi, tenian cont dl dann urbanistich gaujà dala trasfurmazion dl teritore. La soma dla straufonga muda, aldò dla gravità dla viulazion, da 0,8 a 2,5 iedesc la soma dl cost de costruzion, determineda aldò dl articul 80. Sce l ne ie nia puscibl determiné l cost de costruzion vën la straufonga calculeda n relazion ai cosć dla opres fates, determinei aldò la lista di priejes provinziei.
(2) Tl cajo che, canche l ie unì dat la straufonga nunzieda tl coma 1 o dan l paiamënt dla ultiuma rata nunzià tl coma 5, resulteiel che la opres fates n basa al’autorisazion anuleda ie cunformes al cheder normatif y ala previjions urbanistiches che vel te chël mumënt, cumanda l’autorità respunsabla dla verdia l arbassamënt dla straufonga nunzieda tl coma 1, la museran ala dureda dla viulazion, y la retuda zënza fic dla somes eventualmënter paiedes de massa. La straufonga arbasseda ne dausserà a uni maniera nia vester plu bassa de chëla nunzieda tl articul 95, coma 3.
(3) L paiamënt ntier dla straufonga data, nce tla mesura arbasseda nunzieda tl coma 2, à la medema fazion de dërt dl azertamënt de cunformità aldò dl articul 95.
(4) Ntan che n aspieta che l vënie cumedà la mancianzes dla pruzedures aministratives liedes ala relasceda dl’autorisazion o che l vënie elaburà i regulamënc urbanistics, sun chëi che se basa l’autorisazion sciche nce ntan che n aspieta l pruzedimënt de dé la straufonga de scioldi restel mpe la nuzeda che ie unida a se l dé cun l’autorisazion anuleda.
(5) La straufonga de scioldi possa unì paieda cun dumanda mutiveda te rates a chësta manieres: la soma possa unì paieda te al plu 20 rates trimestreles medemes. La prima rata muessa unì paieda tl tëmp de 30 dis da canche la straufonga ie unida data. Sun la soma dla rates suzessives iel da paië fic dl 3,5 percënt al ann. La soma da paië te rates muessa unì garantida da na segurtà de na banca o sozietà de assegurazion azeteda dala aministrazion cumenela; la segurteies de agenzies finanzieres ne vën nia azetedes. L soget de dërt che fej la segurtà muessa unì indicà tla dumanda per l paiamënt te rates. Sce nce mé una na rata ne vën nia paieda o paieda cun tardivanza vëniel scudì de forza duta la soma da paië. La legalisazion n sanatoria dla viulazion de frabica arà permò fazion cun l paiamënt de duta la soma ntiera. L resta mpe la nuzedes ejistëntes che ie unides a se l dé cun l’autorisazion anuleda. 185) 186)
L articul 94 ie unì baratà ora nsci dal articul 4, coma 10 dla L.P. di 10 de jené 2022, n. 1.
L test tudësch dl articul 94, coma 5, ie unì mudà nsci dal articul 7, coma 10, dla L.P. di 16 d’agost 2022, n. 10.