(1) N ntervënt desvieia defin dala cunzescion canche l vën fat limpea na frabica, de chëla che la tipologia, si planivolumetria o si adurvanza ne curespuend assolutamënter nia al’autorisazion de frabiché o sce l vën crià volum de frabica che va sëura i lims dac sëura tl proiet a na maniera che l vën nsci a se l dé na frabica o na pert de na frabica de relevanza, da pudëi nuzé autonomamënter.
(2) L’autorità respunsabla dla verdia, do avëi azertà che l ie unì fat ntervënc zënza l’autorisazion de frabiché o a na maniera defin defrënta da chësta, o cun variazions essenzieles, determinedes aldò dl articul 84, ora che tl cajo de ntervënc de restruturazion de frabica, a chëi che l vën aplicà la pruzedures nunziedes tl articul 90, dà orden al patron/ala patrona y ai sogec respunsabli dla viulazion, aldò dl articul 87, de tò y tres o zaré ju la costruzions y represtiné l stat dla lueges, dajan sëura tl pruvedimënt la spersa che vën acuisida de dërt, aldò dl coma 3.
(3) Sce l patron/la patrona o l respunsabl/la respunsabla dla viulazion ne se cruzia nia dla demolizion y dla represtinazion dl stat dla lueges tl tëmp de 90 dis dala nutificazion dl orden, che possa unì slungià de mo 30 dis sun dumanda mutiveda dl nteressà/dla nteresseda, vën i bëns y la spersa frabicheda pro, coche nce chëla che fossa de bujën, aldò dla prescrizions urbanistiches n forza, per la realisazion de opres semientes a chëles abusives acuisii de dërt y debant al patrimone despunibl dl Chemun. La spersa acuisida muessa seguré la nuzeda autonoma dl bën y la ne daussa te uni cajo nia vester majera de diesc iedesc duta la sëuraspersa de utl frabicheda pro abusivamënter.
(4) L at de azertamënt dla nia usservanza dl orden de demolizion tl tëmp nunzià tl coma 3 cuntën indicazions prezises sun la spersa da acuisì, nce i dac prezisc dl cataster y, do che l ti n ie unì fat nutificazion al nteressà/ala nteresseda, costituëscel l’autorisazion per l trasferimënt de proprietà y per la iscrizion tl liber fundier, che vën fata debant.
(5) Do avëi cunstatà la nia usservanza dl orden dà l’autorità a cë dla verdia na straufonga aministrativa de na soma danter 2.000,00 euro y 20.000,00 euro, aldò dla gravità dla viulazion; l resta mpe l’aplicazion de d’autra mesures y straufonghes preududes da normes n forza.
(6) La costruzion acuisida vën zareda ju cun orden dl’autorità respunsabla dla verdia a spëises di sogec respunsabli dla viulazion, ora che sce l vën detlarà cun delibra dl cunsëi che l ie nteresc publics de relevanza y a cundizion che la costruzion ne cuntrasteie nia cun nteresc urbanistics, ambientei o idrogeologics de relevanza.
(7) Per i ntervënc fac abusivamënter sun grunc sometui, n basa a leges stateles, a liam de pruibizion de frabiché assoluta, vën l’acuisizion debant, tl cajo de nia usservanza dl orden de demolizion, fata de dërt a bën dl’aministrazions cumpetëntes dla verdia sun l respet dl liam. Chësta aministrazions se cruzia dla demolizion dla costruzions abusives y dla represtinazion dl stat dla lueges a spëises di sogec respunsabli dla viulazion. Tl cajo dla ejistënza de de plu liams vën l’acuisizion fata a bën dl patrimone dl Chemun.
(8) Per i ntervënc fac abusivamënter sun grunc sometui a liam de pruibizion assoluta de frabiché n basa a leges provinzieles, a prescrizions de strumënc urbanistics o de cuntreda o de plans de setor, vën l’acuisizion debant tl cajo de nia usservanza dl orden de demolizion fata a bën dl Chemun, che va inant cun la demolizion a spëises di sogec respunsabli dla viulazion.
(9) Tl cajo de opres de ampliamënt dejëutes sun imubilies legitimamënter ejistëntes, o de opres realisedes tl lot de purtenienza de frabiches sun na sëuraspersa nia majera de 30 m², se cruzia l’autorità respunsabla dla verdia, do avëi azertà che l ne ie nia unì usservà l orden de demolizion, mé dla demolizion y dla represtinazion dl stat dla lueges, a spëises di sogec respunsabli dla viulazion, ma nia dl’acuisizion dla spersa. Acioche l frabicat posse unì zarà ju cumanda l’autorità respunsabla dla verdia, adum cun l’adozion dl pruvedimënt curespundënt, l’ocupazion temporera dla spersa che ie de bujën per fé i lëures, y la dà dant la dureda curespundënta, che possa unì slungeda sce l ie de bujën; canche i lëures ie finei vën la spersa retuda a chiche n à l dërt.
(10) L articul vën aplicà nce pra frabicac nia finei per chëi che l’autorisazion de frabiché nunzieda tl articul 75 ie destumeda, ora che sce l ie unì damandà mo n’autorisazion de frabiché tl tëmp nunzià tl articul 75, coma 4. La medema fazion vën aplicheda tl cajo che i lëures nia finei ne ie nia plu lascei pro o sce la dumanda de autorisazion de frabiché ie unida refudeda.