(1) Por ti ester ala ciarestia de doturs y doturies spezialisá tl pröm aiüt y ti sorvisc d'emergënza y prescia pó l'Aziënda Sanitara dl Südtirol ince tó sö doturs y doturies zënza diplom de spezialisaziun por n tëmp determiné, por garantí le dërt costituzional de defenüda dla sanité y dles prestaziuns di liví d’assistënza essenziai tres prozedöres de seleziun publiches. Chësc pón ma fá sce an á ciafé sö che al n’é nia personal intern adaté y ara ne vá nia da apliché n istitut iuridich aladô di contrac coletifs provinziai. I doturs y les doturies zënza diplom de spezialisaziun vëgn tuc sö por desfiré ativités sanitares de sostëgn aladô de sües conescënzes, competënzes y capazités, tres les indicaziuns dl diretur sanitar responsabl o dla direturia sanitara responsabla. Süa ativité, pro chëra che ai vëgn sostignis da doturs y doturies spezialisá tl sorvisc de desponbilité surapró, se limitëia a prestaziuns nia de prescia o manco de prescia tl ciamp tl pröm aiüt o tl cheder di sorvisc de nöt o ti dis de festa tles repartiziuns dl ospedal, sciöche ince dl’assistënza sanitara pro i sorvisc de trasport secundars. L’Aziënda sanitara pó stlü jö contrac individuai cun doturs y doturies lëdi zënza diplom de spezialisaziun, sce al ne tol pert degügn candidac y degönes candidates ala prozedöra de seleziun publica o sce degügn o massa püc vëgn aratá adatá. Ai doturs y ales doturies tuc sö aladô de chësc articul ti vëgnel garantí percursc formatifs por che ai pois imparé les competënzes teoriches y pratiches che vá debojëgn por chël ciamp de laur. Les assunziuns y les inciaries nominades te chësc articul vëgn surandades cun la clausola de fin antizipada dl contrat, sce al é personal spezialisé che á le diplom de spezialisaziun damané o d'atri recuisic preodüs dales desposiziuns statales y provinziales por i medemi fins.
(2) Chësc articul vëgn apliché por n ann alalungia da süa data de jüda en forza. 156)
