(1) L'Aziënda Sanitara dl Südtirol pó, en conformité cun ci che vëgn preodü dal articul 1, coma 268, lëtra b) dla lege di 30 de dezëmber dl 2021, n. 234 y a öna cun so contingënt organich preodü dal articul 8 dla lege provinziala di 19 de ma dl 2015, n. 6, cun prozedöra straordinara dal 1. de messé dl 2022 ai 31 de dezëmber dl 2023, tó sö a tëmp indeterminé personal nia dirigenzial dl plann organich dla sanité sciöche ince operadësses y operadus sozi-sanitars che:
- á fat sorvisc pro l'Aziënda Sanitara dl Südtirol sön la basa de un o de plü contrac a tëmp determiné dal 28 d'agost dl 2015 incá;
- é gnüs tuc sö a tëmp determiné sön la basa de na gradatöra che vel por n'assunziun a tëmp determiné o indeterminé, medüda jö do na prozedöra de concurs por titui y/o ejams o do na prozedöra de valutaziun a caje preodüda da na norma de lege o da n regolamënt por les medemes ativités che vëgn odüdes danfora y toca pro i compic dl profil profescional, cun lapró les seleziuns preodüdes dal articul 2/ter dl decret-lege di 17 de merz dl 2020, n. 18, convertí cun mudaziuns dala lege di 24 d'aurí dl 2020, n. 27. Les prozedöres nominades dessura pó ince ester gnüdes fates da ënc dl Sorvisc sanitar nazional o da d'atres aministraziuns dl Sorvisc sanitar nazional, cun lapró ince i Istituc de recoveraziun y cura a carater scientifich y i Istituc esperimentai por la scombatüda dles coies di tiers;
- á fat cina ai 30 de jügn dl 2022 almanco 18 mëisc de sorvisc, ince cun interuziun, de chisc almanco 6 mëisc tl tëmp danter i 31 de jená dl 2020 y i 30 de jügn dl 2022, pro l'Aziënda Sanitara dl Südtirol, pro i ënc dl Sorvisc sanitar nazional o pro d'atres aministraziuns de chësc, cun lapró ince i Istituc de recoveraziun y cura a carater scientifich y i Istituc esperimentai por la scombatüda dles coies di tiers, ince te na manira cumulativa;
- á ala data de tomanza dl avis publich l'atestat de conescënza di lingac talian y todësch damané sön la basa dles desposiziuns varëntes por ti podëi pormez al profil profescional, che é oget dla prozedöra d'assunziun preodüda da chësc articul;
- ne ais nia, ala data de tomanza dl termo por la presentaziun dles domandes y ala data d'assunziun a tëmp indeterminé eventuala, n raport de laur a tëmp indeterminé cun l'Aziënda Sanitara dl Südtirol o cun n ënt dl Sorvisc sanitar nazional, incuadré tl profil profescional che é oget dla prozedöra d'assunziun preodüda da chësc articul.
(2) Por l'arjunjimënt di agn de sorvisc preodüs dal coma 1, lëtra c) vëgnel reconesciü i tëmps de sorvisc fac sön la basa de contrac a tëmp determiné, sce ai se referësc ala medema ativité y al medemo profil profescional che é l’oget dla prozedöra d'assunziun preodüda da chësc articul. I contrac de soministraziun é stlüc fora. 154)
(3) Por i fins preodüs dal coma 1 mët jö l'Aziënda Sanitara dl Südtirol gradatöres aladô di grups linguistics, do che al é gnü fat n avis publich spezifich por vigni profil profescional, che mëss gní publiché sön le sit istituzional dl'Aziënda Sanitara y sön le Boletin Ofizial dla Regiun Trentin-Südtirol.
(4) Les gradatöres preodüdes dal coma 3 vëgn fates sön la basa de chisc criters, dá dant do n ordin de priorité:
- agn de sorvisc arjunc cun contrac de laur a tëmp determiné pro l'Aziënda Sanitara dl Südtirol tl profil profescional odü danfora dala prozedöra d'assunziun preodüda da chësc articul;
- agn de sorvisc arjunc cun contrac de laur a tëmp determiné pro ënc dl Sorvisc sanitar nazional tl profil profescional odü danfora dala prozedöra d'assunziun preodüda da chësc articul;
- raport de laur a tëmp determiné pro l'Aziënda Sanitara dl Südtirol esistënt en la data de publicaziun dl avis preodü dal coma 3.
(5) Sce le mirit é anfat vëgnel apliché i titui de preferënza preodüs dal articul 5, comesc 4 y 5 dl decret dl Presidënt dla Republica di 9 de ma dl 1994, n. 487, y mudaziuns suandëntes.
(6) L'Aziënda Sanitara dl Südtirol definësc les modalités d'atuaziun dla prozedöra d'assunziun preodüda te chësc articul.
(7) L'Aziënda Sanitara dl Südtirol pó apliché la prozedöra d'assunziun odüda danfora da chësc articul por curí posć lëdi preodüs te sü planns organics y i posć che é impormó gnüs istituis.
(8) Ales gradatöres varëntes dles prozedöres de concurs publiches che é gnüdes metüdes jö por le medemo profil profescional, preodü dala prozedöra de assunziun aladô de chësc articul, dan la jüda en forza de chësc articul, ti vëgnel dé la priorité dan chëres metüdes jö sön la basa de chësc articul.
(9) Al pó gní scrit fora l'assegnaziun de posć sön la basa de gradatöres varëntes de concursc publics por le medemo profil profescional preodü dala prozedöra de assunziun aladô de chësc articul do la jüda en forza de chësc articul impormó do che al é rové les gradatöres aladô dl coma 3, tl respet dles desposiziuns sön le proporz linguistich preodüdes tla Provinzia de Balsan.
(10) Les prozedöres odüdes danfora da chësc articul vëgn ince aplicades por i ënc che gestësc i sorvisc soziai aladô dla lege provinziala di 30 d'aurí dl 1991, n. 13, y mudaziuns suandëntes, en conscidraziun di profii profescionai preodüs dal contrat coletif de raiun por le personal dependënt di comuns, dles comunités comprensoriales y dles aziëndes publiches por sorvisc de cura y assistënza. 155)