(1) Por stabilì la partezipaziun ai cosć sanitars, sciöch’inće por l’esenziun dl paiamënt dl ticket, se tëgn la Provinzia autonoma de Balsan ai prinzips contignüs tla normativa nazionala varënta te chësta materia. La Junta provinziala porta ite por les prestaziuns che va sura i livì uniforms d’assistënza sanitara stabilis dala normativa nazionala fora, aladô dl articul 32, na partezipaziun sön le cost basè sön la valutaziun dl davagn y dl patrimone dla porsona socodida y de süa familia. Cun le regolamënt d’esecuziun vëgnel individué i criters por la valutaziun dla situaziun economica y patrimoniala, tignin cunt inće dles desposiziuns aladô di articui 7 y 7/bis dla lege provinziala di 30 d’aurì 1991, nr. 13, che reverda “le reordinamënt di sorvisc soziai tla Provinzia de Balsan”, y mudaziuns seghëntes.87)
(1/bis) 88)
(2) Por les prestaziuns che toma ite ti livì uniforms dl’assistënza sanitara stabilis a livel statal, autorisëia la Junta provinziala l’introduziun, te na manira sperimentala, dl sistem de partezipaziun nü al cost dles prestaziuns y stabilësc i criters de liberaziun de chësta aladô dl articul 6, coma 1, dl Decret legislatif di 29 d’aurì 1998, nr. 124.
(3) La Junta provinziala po completè la lista nazionala dles maraties, che à le dërt de nia messëi paié le ticket, tolon ite dötes chëres maraties che vëgn dant te teritori spezifics o che é straordinares.
(4) Tla aplicaziun di prinzips stabilis dal articul 7 dl Decret dl Presidënt dla Republica di 26 de jenà 1980, nr. 197, vëgn la Junta provinziala autorisada da complementè la lista nazionala dles prestaziuns che vëgn fates te zëntri de gran spezialisaziun tl forest cun maraties che vëgn dant sovënz te Südtirol.
Le coma 1 é gnü sostituì dal art. 40 dla L.P. di 15 de novëmber 2002, nr. 14.
L'art. 35, coma 1/bis é gnü injunté dal art. 8, coma 1 dla l.p. di 19 de messé dl 2013, n. 9, y spo abroghé dal art. 13, coma 1, lëtra a) dla l.p. di 30 de messé dl 2019, n. 6.