o) Lege provinziala di 4 de mà dl 2023, n. 71)
Indicaziun de provegnënza di alimënc tla restoraziun coletiva

(1) I pitadus de restoraziun coletiva mëss ti dé ales consumadësses y ai consumadus informaziuns scrites sön la provegnënza di ingrediënc nominá tl articul 2 y les mëte fora che ares sides saurides da odëi y da lí sön placac, tles indicaziuns tl menü o cun d'atres modalités che podess jí bun.

(2) Cun "provegnënza" minon le Paisc d'origina o le post de provegnënza. Chësc é

1. tl caje de cern de armënt, le Paisc o le post olache le tier é gnü trat sö;
   
2. tl caje de cern de porcel, biscia, cioura y polam, le Paisc o le post olache le tier é gnü trat sö;
   
3. tl caje de lat, le Paisc o le post olache le tier é gnü mut;
   
4. tl caje de üs, le Paisc o le post olache le tier á fat i üs.
   

(3) Sce al n'é degönes informaziuns sön la provegnënza di ingrediënc preodüs dal articul 2, él da adoré l'indicaziun "Provegnënza nia conesciüda".

(4) L'indicaziun dla provegnënza preodüda tl coma 2 mëss gní dada dant aladô dl articul 2 dl Regolamënt de esecuziun (UE) 2018/775 dla Comisciun di 28 de ma dl 2018.

(5) I pitadus de restoraziun coletiva pó, sce ai ó, informé les consumadësses y i consumadus ince ciamó sön la provegnënza de d'atri ingrediënc. Chëstes informaziuns mëss stimené y ne pó nia ester ingianoses.