(1) La pruposta dl plan de atuazion vën adotà dala Jonta cumenela, do avëi audì la Cumiscion cumenela per l teritore y la cuntreda.
(2) La pruposta dl plan adoteda, njunteda cun la documentazion curespundënta, vën publicheda per 30 dis alalongia sun tofla de Chemun y tla Rë zivica dla Provinzia. Nchin a chësc tiermul possa i sogec nteressei prejenté al Chemun si usservazions sun la pruposta dl plan. I Chemuns vëij danora mo d’autra mesures n plu de nfurmazion y partezipazion dla populazion.
(3) L plan de atuazion vën apurvà dal Cunsëi cumenel. La delibra de apurvazion muessa mutivé l’adozion dl plan n referimënt ala usservazions prejentedes. Ti Chemuns cun plu de 10.000 abitanc ie l’apurvazion dl plan de cumpetënza dla Jonta cumenela.
(4) N ucajion dl’apurvazion dl plan possel unì fat mudazions per i fins dl respet dla despusizions de lege y de regulamentazion dla materia, o mudazions de utl per miuré la planificazion dl nridlamënt, o mudazions dla sëides dl raion per les adaté ala situazion reéla. La repartizion provinziela cumpetënta se cruzia de evidenzië la mudazions ti strumënc de planificazion aministrei da d’ëila. 129)
(5) L Chemun publichea la delibra d’apurvazion cun la njonta dla documentazion tecnica curespundënta tla Rë zivica dla Provinzia. L plan de atuazion va n forza l di do chël de si publicazion.
(6) L plan de atuazion ne ie no sometù a valutazion ambientela strategica (VAS) no a verificazion de ublianza de valutazion ambientela strategica, sce l plan cumenel ie unì sometù a VAS y sce l mostra l nluegiamënt di ntervënc y dla opres de urbanisazion nueves, la spessënza de frabica relativa, la nuzedes lascedes pro y i cuntenuc de planivolumetria, dla carateristiches y dla sort de costruzion di ntervënc, coche nce la limitazions y la cundizions de sustenibltà ambientela dla trasfurmazions preududes.
(7) La mudazions al plan d’atuazion ie sometudes al medemo pruzedimënt preudù per si apurvazion. Nce ti Chemuns cun manco de 10.000 abitanc possa la Jonta cumenela apurvé la mudazions al plan d’atuazion, a cundizion che la Cumiscion cumenela per l teritore y la cuntreda ebe dat si bënsté al plan nunzià dessëura cun duc a una. 130)
(8) Ai plans de atuazion de cumpetënza dla Provinzia vëniel aplicà l pruzedimënt nunzià tl articul 50.
(9) Per l’apurvazion o la mudazion di plans de atuazion revardënc la sperses natureles y agricules nunziedes tl articul 13 vëniel aplicà l pruzedimënt nunzià tl articul 53, ora che i comes 1 y 4; la pruposta de plan vën adoteda dala Jonta cumenela, do avëi audì la Cumiscion cumenela per l teritore y la cuntreda. 131)
L art. 60, coma 4, ie unì ntegrà nsci dal art. 19, coma 2, dla L.P. dl prim de juni 2023, n. 9.
L art. 60, coma 7, ie unì ntegrà dal art. 19, coma 2, dla L.P. dl prim de juni 2023, n. 9.
L art. 60, coma 9, ie unì njuntà dal art. 20, coma 2, dla L.P. di 4 d’agost 2023, n. 4.