(1) L plan d’atuazion (PdA) vën laurà ora per raions mescedei nueves da individué y per la sperses per chëles che chësta lege o l plan cumenel l vëija danora. I plans d’atuazion possa unì laurei ora nce per d’autra sperses. La repartizion provinziela cumpetënta se cruzia de evidenzië i plans de atuazion tl plan cumenel per l teritore y la cuntreda y/o tl plan de cuntreda. 123)
(2) Cun l plan d’atuazion vëniel garantì l’adurvanza y l njiniamënt efizient y de cualità dla lercs publiches y privates. L plan d’atuazion se stiza sun la partizion balanzeda, danter duc i sogec patrons dla imubilies nteressedes, di dërc de frabica y dla ublianza cunlieda limpea di sogec patrons y di/dla asseniateres, de assunzion dla cuota di cosć efetifs de elaburazion dl plan d’atuazion, de proietazion y realisazion dla opres de urbanisazion primera, de zescion dla sperses curespundëntes coche nce de na cuota di cosć dla opres de cunliamënt dl raion ai mplanc ejistënc dedora da chësc. Chësta cuota di cosć per i lëures de cunliamënt dl raion ai mplanc ejistënc dedora da chësc ne daussa nia superé l 3 percënt di cosć de costruzion nunzià tl articul 80, coma 1, n raport al volum de frabica lascià pro dal plan d’atuazion. La ublianza de paië la cuota di cosć vën a se l dé unfat sce l soget patron o asseniater frabica o no. Tla cuota de partezipazion ai cosć nunziei te chësc coma ie nce laite la chëuta de urbanisazion primera che ie da paië aldò dl regulamënt dl Chemun nteressà. Sce chësta cuota de partezipazion ai cosć ie, alincontra, plu bassa dla chëutra de urbanisazion primera che ie da paië per regulamënt, iel nce da paië la defrënzia. L plan d’atuazion disciplinea oradechël la recupereda proporziunela dl valor njuntà de planificazion nunzià tl articul 19. Ti raions mescedei, te chëi che l 80 percënt dl indesc de frabicabltà teritoriel stabilì resultea bele nuzà y almanco l mez dl volum de frabica ejistënt à la destinazion de nuzeda nunzieda tl articul 23, coma 1, pustom a), ie la ublianza di sogec patrons de paië i cosć de elaburazion dl plan d’atuazion limità n proporzion al valor njuntà crià dal plan d’atuazion per i loc da frabiché respetifs. 124)
(3) La partizion di dërc y di duvieres nunziei pra l coma 2 vën fata unfat ulache la imubilies singules nteressedes ie nluegedes, tenian cont dla sperses respetivamënter nuzedes.
(4) L plan de atuazion cuntën:
- na reprejentazion tla scala nia mëndra de 1:500, cun almanco chisc cuntenuc:
- la delimitazion dl raion, l stat de fat, la nuzeda, la planivolumetria dla frabiches ejistëntes tl raion y de chëles tl raion ntëurvia;
- i dac d’autëza plu mpurtanc, la opres de urbanisazion primera y segondera, i cunliamënc ala opres ejistëntes dedora dl raion, i azesc, la planivolumetria y la destinazion de nuzeda dla frabiches preududes;
- la despusizions tipologiches, estetiches y de costruzion n cont dla frabiches, dla lercs publiches y dl alestimënt dla sperses vërdes;
- la reprejentazion dla sperses destinedes al frabiché alesirà y/o ai cuatieres cun priesc lià; 125)
- la relazion ilustrativa dla mpustazion dl plan, cun indicazions detaliedes dla opres de urbanisazion primera y segondera che ie bele o che ie da realisé, sciche nce la indicazion de mascima dla spëisa n cont dla opres da realisé;
- l stat tl cataster y tl liber fundier;
- la normes de atuazion;
- na schiza per la costituzion dla cumenanza y/o per la spartizion materiela di grunc;
- n model tla scala nia mëndra de 1:500 o na visualisazion tridimensciunela.
(5) L plan de atuazion muessa respeté la destinazion dl raion y la spessënza de frabica stabilida tl plan cumenel. Ora che per prescrizions particuleres per raions singui possel desvië da l’autra prescrizions preududes per l raion tl plan cumenel.
(6) Cun l plan de atuazion possel unì stabilì la destanzes dla frabiches dedite tl raion, dala sëides dl raion y dala frabiches dedora dal raion. Chësta destanzes possa nce vester mëndres de chëles stabilides tl plan cumenel per l raion nteressà o per i raions che va a sëida, a cundizion che les sibe te uni cajo adatedes a seguré n balanz urbanistich y de cuntreda n relazion ala sortes di ntervënc lascei pro, tenian cont dl carater spezifich dla lueges y dla despusizion dla imubilies bele ejistëntes. L resta a uni maniera mpe l respet dla normes dl codesc zevil y di liams de nteres culturel y dla cuntreda.
(7) Sce l vën cun l plan de atuazion stabilì destanzes mëndres dala frabiches dedora dal raion de chëles stabilides tl plan cumenel per i raions che va a sëida, messerà tla pruposta dl plan de atuazion nunzià tl articul 60, coma 1, la frabiches dedora dal raion unì evidenziedes graficamënter.
(8) Pra l’apurvazion dl plan de atuazion possa l Chemun preudëi che nce i ntervënc de costruzion nueva y de restruturazion urbanistica posse unì realisei tres senialazion zertificheda de scumenciamënt d’atività (SZSA/SCIA), a cundizion che l plan cuntënie despusizions prezises n cont dla planivolumetria, dla carateristiches, dl’estetica y dla costruzion.
(9) La ncëria per la redazion de n plan d’atuazion nuef per raions mescedei cun na spersa de plu de 5.000 m2 o per raions produtifs cun na spersa de plu de 10.000 m² vën assenieda tres cuncors. Per i raions produtifs destinei al nridlamënt de na sëula mpreja ne iel nia de bujën fé n cuncors. 126)
(10) Restan mpe la despusizion nunzieda pra l coma 9, possa l ënt cumpetënt per l’apurvazion se nuzé dl plan d’atuazion laurà ora y prejentà da sogec privac. 127)
L art. 57, coma 1, ie unì baratà ora nsci dal art. 17, coma 1, dla L.P. dl prim de juni 2023, n. 9.
L art. 57, coma 2, ie n iede unì mudà dal art. 20, coma 1, dla L.P. di 20 de dezëmber 2019, n. 17, y dadedò baratà ora nsci dal art. 17, coma 2, dla L.P. dl prim de juni 2023, n. 9.
L numer 4) dl art. 57, coma 4, pustom a), ie unì mudà nsci dal art. 17, coma 3, dla L.P. dl prim de juni 2023, n. 9.
L art. 57, coma 9, ie n iede unì ntegrà dal art. 7, coma 8, dla L.P. di 16 d’agost 2022, n. 10, y dadedò iel unì mudà nsci dal art. 17, coma 4, dla L.P. dl prim de juni 2023, n. 9.
L art. 57, coma 10, ie unì njuntà dal art. 17, coma 5, dla L.P. dl prim de juni 2023, n. 9.