(1) L Chemun possa stipulé, ti lims dla despusizions, acurdanzes urbanistiches cun persones privates o ënc publics per sauridé, tl nteres publich, l’atuazion de ntervënc che ie bele preudui tl plan cumenel, te n plan de atuazion o tl documënt unich de prugramazion dl Chemun, o che vën preudui pra l’apurvazion dl’acurdanza. 24)
(2) L’acurdanzes urbanistiches curespuend ai prinzips de proporziunalità, valivanza de tratamënt, publizità y trasparënza adecuata dla cundizions y di benefizies publics y privac cunliei limpea, y les cuntën la mutivazion spezifica per l nteres publich che les giustifichea.
(3) Tl’acurdanzes urbanistiches possel unì preudù chësta prestazions o controprestazions:
- zescion o barat de imubilies o dërc reéi, tl cajo de chël che la pertes cuntratueles muessa vester patrones da almanco cin ani dla cuota de maiuranza dla imibilies che ie oget dl cuntrat, ora che per la dunazions y l’arpejons, o la criazion o zescion de dërc de frabica tres la individuazion de raions da frabiché tla sperses de nridlamënt, o criazion o zescion de dërc de frabica te raions da frabiché ejistënc; l cumerz ala menuda possa mé vester oget de acurdanzes urbanistiches te raions mescedei y mé adum cun la realisazion dantaldut y danora de volum de frabica per cuatieres; 25)
- realisazion de opres de urbanisazion primera y segondera, a cëria dl privat;
- esecuzion de mesures de ressanamënt o de cumpensazion n cont dl ambient o dla cuntreda;
- cumpensazion tla forma de scioldi;
- metuda a despusizion de cuatieres a priesc lià coche nunzià tl articul 40.
(4) Dan che l’acurdanza urbanistica vën stluta ju muessel unì tëut ite n arat dal ufize provinziel cumpetënt tl ciamp de sciazeda o da n prufesciunist abilità/na prufesciunista abiliteda cun sciazeda cunfermeda n cont dl valor de marcià dla prestazions preududes dal’acurdanza.
(5) La stipulazion dl’acurdanza muessa te uni cajo nce cuntenì la mutivazion n cont dl valor urbanistich njuntà.
(6) L’acurdanzes vën espressamënter sëurantëutes tl strumënt de planificazion, y chël aldò dla pruzedures preududes per la mudazion de chësc. Sce l ne ie nia fat ora autramënter, à la mudazions dl strumënt de planificazion permò fazion giuridica canche duta la contraprestazions preududes a bën dla aministrazion ie ademplides defin.
(7) Sce la stipulazion dl’acurdanza urbanistica vën purteda dant da n soget privat y la vëij danora la realisazion de opres publiches o de utl publich defrëntes dala opres de urbanisazion primera, vëniel aplicà la pruzedura nunzieda tl articul 183, coma 15, dl decret legislatif di 18 d’auril 2016, n. 50, y mudazions suzessives.
(8) Sce l vën tl’aplicazion de chësc articul preudù n volum de frabica per cuatieres nuef ie chësc resservà per l 100 percënt a cuatieres per persones residëntes aldò dl articul 39. 26)
L art. 20, coma 1ie unì baratà ora nsci dal art. 5, coma 1, dla L.P. dl prim de juni 2023, n. 9.
L pustom a) dl art. 20, coma 3, ie unì baratà ora nsci dal art. 5, coma 2, dla L.P. dl prim de juni 2023, n. 9.
L art. 20, coma 8, ie unì njuntà dal art. 5, coma 3, dla L.P. dl prim de juni 2023, n. 9.