(1) La repartizion provinziela cumpetënta tla materia de natura, cuntreda y svilup dl teritore mët su y gestësc l Sistem de nfurmazion cuntreda y teritore (SNCT/LARIS), che garantësc l'adurvanza partida, l'azessibltà y l barat di dac teritoriei interuperabli y di servijes n cont di dac teritoriei interuperabli danter i livei defrënc dl'aministrazion publica che ie atifs sun l teritore dla provinzia. I ënc locai ti manda ala Provinzia i dac teritoriei de si cumpetënza. 10)
(2) L SNCT/LARIS gestësc duc i dac cartografics y normatifs dla planificazion dla cuntreda y dl teritore provinziel, l stabilësc, n acurdanza cun l Cunsëi di Chemuns, standards tecnics unifichei y l pieta servijes per la gestion di ac dla planificazion cumenela.
(3) I dac digitei di plans normatifs respetea la regules tecniches de gestion, d’ajurnamënt y de zertificazion; i ie publichei tla Rë zivica dla Provinzia de Bulsan y remplazea l’edizion sun papier.
(4) Per garantì la medema interpretazion de chësta lege y l slune di pruzedimënc relatifs vëniel nce publicà duta la zirculeres y duc i arac de carater generel dl'Aministrazion provinziela che à sciche oget la interpretazion de chësta lege.
(5) A pië via dala jita n forza de chësta lege muessa i zitadins y la zitadines pudëi ti ruvé permez a duta la mudazions dl plan cumenel, ala normes y ai plans de atuazion tla forma de n indesc cronologich che vën for ajurnà de duta la mudazions sibe de cuntenut che grafiches.
(6) Uni doi ani elaburea y publichea l SNCT/LARIS na relazion sun la situazion dla planificazion, sun la nuzeda dl fonz, sun la trasfurmazions fates y sun l svilup dl teritore y dla cuntreda.
(7) La cumedura de fai materiei tla normes de atuazion, tla reprejentazions grafiches o te d’autri documënc di plans vën cumandeda dal diretëur/dala diretëura dla repartizion provinziela cumpetënta tla materia de natura, cuntreda y svilup dl teritore sun dumanda dl Chemun o d’ufize, do che l ie unì publicà la pruposta de cumedura tla Rë zivica dla Provinzia per n tëmp de 15 dis ndolauter. Dla cumedura fata vëniel dat nutizia tl Buletin Ufiziel dla Region. L diretëur/La diretëura dla repartizion provinziela cumpetënta tl ciamp de natura, cuntreda y svilup dl teritore possa, sce n cajo, refudé la dumanda dl Chemun. 11)
(8) La cumedura de fai materiei tla normes de atuazion, tla reprejentazions grafiches o te d’autri documënc di plans de chëi che l’apurvazion o mudazion ie mé de cumpetënza di Chemuns vën dejëuta cun la pruzedura nunzieda tl articul 60. La repartizion provinziela cumpetënta se cruzia de evidenzië la mudazions ti strumënc de planificazion che la gestësc. 12)
L articul 7, coma 1, ie unì mudà nsci dal articul 2, coma 1, dla L.P. di 20 de dezëmber 2019, n. 17.
L art. 7, coma 7, ie unì njuntà dal art. 3, coma 1, dla L.P. di 17 de dezëmber 2020, n. 15, y dadedò baratà ora nsci dal art. 1, coma 1, dla L.P. di prim de juni 2023, n. 9.
L art. 7, coma 8, ie unì njuntà dal art. 1, coma 2, dla L.P. dl prim de juni 2023, n. 9.