(1) La Provinzia autonoma de Balsan organisëia y realisëia le sorvisc de proteziun zivila. Por garantì la sconanza dla popolaziun y defëne les infrastrotöres, le teritore, les citês y i paîsc da de vigni sort de gaujes de dann o de prigo se crüzia l’aministraziun provinziala tl ćiamp de sües competënzes y aladô dl plann provinzial de proteziun zivila, inće en economia, di intervënć de prevenziun y de salvamënt sön la basa dles leges provinziales y statales varëntes. Tl caje de emergënza po i mesi finanziars che va debojëgn gnì tuć fora sides dai capitui normai dles spëises dl bilanz de previjiun che inće dal fonds de resserva por les spëises nia preodüdes dal bilanz provinzial.
(2) Por ći che reverda l’esecuziun di laûrs por la prevenziun y por i intervënć aprontà à les singules repartiziuns y strotöres organisatives dla Provinzia le dovëi de intergnì integran o sostituin chël di comuns y di Sorvisc di stödafüch y de proteziun zivila aladô dles competënzes respetives preodüdes dales normes de lege dla Provinzia.
(3) Por i intervënć por laûrs de prevenziun, de pröm aiüt y de restabilisaziun do roes, lovines, rogossies y d’atres catastrofes naturales vëgnel apliché la lege provinziala di 12 de messè dl 1975, n. 34, che vëgn aministrada dala repartiziun competënta por la proteziun cuntra le medefüch y zivila. Implü vëgnel apliché les desposiziuns preodüdes dal coma 2.
(4) Tl respet dles desposiziuns varëntes che reverda la materia mët sö la Junta provinziala n sorvisc aprontè da mëte a jì cun so personal fora dl orar d’ofize normal por sostignì na pröma valutaziun dles emergënzes y dles segnalaziun de prigo y inće por la coordinaziun di intervënć che ne po nia gnì sburlà.
(5) Aspetan l’unificaziun dles strotöres raionales dl’aministraziun provinziala por l’atuaziun dl plann de proteziun zivila vëgn le teritore provinzial partì sö te nü raiuns che corespogn ai raiuns dl Corp di stödafüch volontars.