(1) De regola é vigni scolina metüda adöm da alplü cater seziuns da 14 a 25 mituns y mitans. Sce al é mituns y mitans cun handicap o che à debojëgn de aziuns didatiches y pedagogiches spezifiches pon - tignin cunt di bojëgns teritoriai y culturai de vigni grup linguistich- desvié da chësta regola.
(2) La Junta provinziala determinëia, sön la basa de criters corespognënć, döt l’organich dl personal dles scolines, stlüt ite chël dles seziuns cun orar arlungé y dles scolines a tëmp plëgn, do avëi aldì les organisaziuns sindacales plü rapresentatives.
(3) Vigni direziun raionala dles scolines é menada da na direturia o n diretur.
(4) Sön la basa de criters definis dala Junta provinziala, é vigni scolina o rëi de scolines presidiada da na maestra o da n maester dla scolina cun funziuns de coordinaziun. Chisc é esonerà dala gestiun de na seziun dla scolina.
(5) Por vigni seziun dla scolina vëgnel assegné na maestra dla scolina o n maester dla scolina y na colaboradëssa pedagogica o n colaboradù pedagogich.
(6) Por vigni seziun integrada, metüda adöm de regola da 15 mituns y frecuentada da almanco dui mituns cun handicap, vëgnel assegné dui insegnanć - un o öna de chisc à le titul de spezialisaziun che toca laprò - y na colaboradëssa pedagogica o n colaboradù pedagogich.
(7) L’inserimënt de mitans y mituns da foradecà, sciöche inće de mitans y mituns te situaziuns linguistiches locales complicades, vëgn garantì tres l’adoranza de personal implü che à les competënzes spezifiches stabilides dala Junta provinziala.
(8) La Junta provinziala determinëia i criters sön la basa de chi che les direziuns provinziales respetives dles scolines y la Direziun provinziala scolines y scores ladines pó istituí, tl cheder dles ressurses a desposiziun, seziuns de scolina cun n orar arlungé. Por vigni seziun cun orar arlungé vëgnel assegné de regola n insegnant o na insegnanta y na colaboradëssa pedagogica o n colaboradú pedagogich implü, tignin cunt dl numer dles mitans y di mituns. 23)
(9) La Junta provinziala definësc i criters por l'assegnaziun dl personal insegnant y dles colaboradësses pedagogiches o di colaboradus pedagogics por les suplënzes te vigni direziun raionala dles scolines.
(10) Le personal dles scolines che é gnü detlarè definitivamënter nia adatè al'ativité pedagogica cun mituns y mitans, vëgn adorè por compić aministratifs te posć dl organich aministratif dla Provinzia.
(11)Dla gestiun dles scolines se crüzia le comun competënt por le raiun o n consorz di comuns. Sce na scolina vëgn frecuentada da mituns y mitans de de plü comuns, se crüzia le comun olache la scolina é dla gestiun. I atri comuns é oblià da tó pert ales spëises en proporziun al numer di mituns y dles mitans corespognënt. La gestiun dla scolina provinziala ti pó gní surandada, sön domanda, dal comun o da n consorz di comuns al ënt promotur o al’assoziaziun promoturia, sce chësc ënt o chësta assoziaziun é le patrun o conzescionar/la patrona o conzescionara de n imobil, o á a vigni moda la desponibilité. Te vigni caje pó n comun o n consorz de comuns inciarié i sogec iuridics, a chi che al ti é gnü surandé, aladô dla lege provinziala di 17 d’agost dl 1976, n. 36, la gestiun de na scolina provinziala, da jí inant cun la gestiun dla scolina che ti é gnüda surandada meton, olache al vá debojëgn, ince a desposiziun l’imobil. 24)
(12) Sce manco co cinch mituns y mitans va ala scolina vëgnera stlüta d’ofize. Sce al vëgn scrit ite da cinch a diesc mitans y mituns por almanco dui agn indolater, tol la Junta provinziala na dezijiun sce stlüje o manco la scolina.