(1) Ales direziuns raionales dles scolines ti vëgnel reconesciü la personalité iuridica y l’autonomia organisativa, didatica, de inrescida y sperimentaziun, finanziara y aministrativa. I prinzips dl'autonomia dà dant tla lege provinziala di 29 de jügn dl 2000, n. 12, vel, tl respet dles desposiziuns suandëntes, inće por les direziuns raionales dles scolines. Les modalitês y les atres regoles menüdes dl'autonomia dles direziuns raionales dles scolines vëgn determinades cun regolamënt d’esecuziun.
(2) La direziun raionala dles scolines vëgn menada da n diretur o na direturia che à les competënzes dades dant tl articul 13 dla lege provinziala di 29 de jügn dl 2000, n. 12, y mudaziuns suandëntes.
(3) Les direturies y i direturs dles direziuns raionales dles scolines che à n diplom de laurea magistrala o n titul ecuivalënt, y l'atestat de conescënza di lingac todësch y talian, o todësch, talian y ladin che toca pro le diplom de laurea, à le titul de gnì inćiarià da menè na direziun raionala dles scores. Les dirigëntes y i dirigënć scolastics dl pröm scalin de istruziun à le titul de gnì inćiarià da menè na direziun raionala dles scolines.
(4) La Junta provinziala nominëia sön proposta dl'Intendënta dles scores competënta o dl Intendënt dles scores competënt les ispeturies y i ispeturs dles scolines di trëi grups linguistics. Les ispeturies y i ispeturs sostëgn l'autonomia dles direziuns raionales dles scolines aladô dles desposiziuns provinziales y di contrać coletifs te chësta materia, y promöi le barat y la colaboraziun danter les direziuns raionales dles scolines y les direziuns raionales dles scores.