(1) I organns de cuntrol nunziei tl articul 8 eserzitea si atività aldò dl program de cuntrol standard, che i à prejentà al fin dl’autorisazion.
(2) Tl eserzize dla funzions de cuntrol muessa i organns de cuntrol fé almanco n iede al ann, cun n preavis nia plu curt de trëi dis, n cuntrol fisich ntier dla produzion, dla uniteies de mpacamënt o di autri locai dl’aziendes scrites ite tl register di eco-mprenditëures. I organns de cuntrol à, a uni moda, la puscibltà de fé te uni mumënt ispezions o sëuraluesc nia anunziei.
(3) I patrons dl’aziendes nunziedes tl articul 2 o la persona respunsabla dla strutura sometuda a cuntrol muessa lascé pro che l personal di organns de cuntrol ébe azes liede a si ufizies y si mplanc y te uni raion dl’azienda, ti dé la nfurmazions damandedes y cunlauré per ademplië ala ublianzes ududes danora tl regulamënt.
(4) I nciariei dai organns de cuntrol scrij na relazion sun i cuntroi dejëuc, che atesteie l respet dla despusizions n forza. Chësta relazion muessa vester contrasotscrita dal respunsabl dla unità sometuda al cuntrol o da si reprejentant y la muessa unì tenida su danter i ac per almanco cin ani.
(5) Sce, ntan n cuntrol, ëssel da unì cunstatà na iregularità tl’aplicazion dla despusizions di articuli 5 y 6 dl regulamënt o tl’aplicazion dla mesures aldò dla njonta III dl regulamënt, cumanda l organn de cuntrol de tò demez duta la ndicazions n cont dla metoda de produzion biologica per duta la partida de prudoc o per duta la produzion tucheda da chësta iregularità. L dërt de cumerzialisé prudoc cun ndicazions sun la metoda de produzion biologica ti vën tëut al eco-mprenditëur per n tëmp da fé ora a una cun la Repartizion, sce l vën cunstatà na viulazion tlera o una cun fazion longia tl tëmp. Contra chësc pruvedimënt possa l eco-mprenditëur fé recurs pra la Jonta provinziela tl tëmp de 30 dis da canche l à giapà la comunicazion curespundënta. Oradechël muessa l funzioner nciarà scrì n protocol aposta sun i azertamënc fac y l mandé ala Repartizion tl tëmp de cin dis. Tl cajo che l se tratëssa de n fat che costituesc reat ie l funzioner nciarià ublià a fé na plura pra la Procura. I criteres per determiné tan grieves che la viulazions ie, vën fissei cun pruvedimënt aposta dala Jonta provinziela. Chësc pruvedimënt vën publicà tl Buletin Ufiziel dla Region Trentin-Südtirol.
(6) I organns de cuntrol ti manda ala Repartizion, nchin ai 31 de jené de uni ann, na relazion sun l’atività dejëuta, che cuntën te uni cajo chësta ndicazions:
- l inuem, l’adres y l codesc di eco-mprenditëures cuntrolei nchin ai 31 de jené dl ann dant;
- la cumpëida y la sort de straufonghes che i organns nstësc ti à mpartì ai eco-mprenditëures pervia dla viulazion di articuli 5 y 6 dl regulamënt o dla mesures nunziedes tla njonta III dl regulamënt;
- l personal cualificà y la mudazions fates ai njins de carater tecnich y aministratif, che ie unic adurvei;
- la mudazions dl program de cuntrol standard che ie ncajo unides fates.