(1) Le comun elaborëia na proposta dl plann comunal de tlassificaziun acustica (P.C.T.A.). Da ciafè fora na tlassa acustica mëss le comun tignì cunt dl'adoranza prinzipala y efetiva dl raiun y dl criter aladô de chël che i raiuns vijins mëss de regola fà pert de tlasses acustiches olache i limić ne se desfarenziëia nia de plü co 5 dB(A). Por chësc fin po n raiun urbanistich contignì inće plü co un n raiun acustich. La tlassificaziun dada dant tla tabela 1 dl’injunta A rapresentëia na proposta por l’elaboraziun da pert di comuns dl P.C.T.A.
(2) Le comun publichëia sön la tofla de comun por 30 dis indolater la proposta preodüda dal coma 1. Te chësc tëmp pó vignun presenté sües osservaziuns. La deliberaziun vëgn tl medemo tëmp tacada fora sön tofla de comun y ortiada inant al’Agenzia, por ciafé n arat. Sce n comun ó classifiché n raiun che confinëia cun d'atri comuns te n’atra classa acustica preodüda dala tabela 1 dl’injunta A, ti vëgn la deliberaziun ortiada inant ince ai comuns vijins por che ai dais jö n arat. Düc i arac é da dé jö te 90 dis dala domanda. Sce al ne vëgn nia dé jö n arat te chësc tëmp vëgnel araté positif. 3)
(3) Le comun aprovëia le P.C.T.A. do che al à ejaminé les osservaziuns che ti é gnüdes fates y do che al à ciafè l'arat dl’Agenzia, le lascia alsavëi te 30 dis sön le Boletin Ofizial dla Regiun Trentin-Südtirol y nen ortia inant na copia ala Provinzia autonoma de Balsan. Sce le P.C.T.A. ne va nia a öna cun l'arat dl'Agenzia, mëss le comun motivé les rajuns de chësta desviaziun. Chëstes motivaziuns fej pert dla deliberaziun d'aprovaziun dl P.C.T.A.