e) Lege Provinziala di 30 de jügn dl 1983, n. 201)
Mosöres nöies a bëgn dles porsones cun handicap
1

(1) L'integraziun scolastica dles porsones cun handicap tles seziuns dla scolina y tles tlasses normales dles scores de vigni ordinn y degré vëgn realisada tres:

1. esperimënć scolastics aladô dla lege provinziala di 30 de jügn dl 1987, n. 13 che vëgn fać te tlasses cun scolares/scolars cun handicap;
   
2. aiüć d'orientamënt che é dantadöt adatà por scolares/scolars cun handicap y vëgn pità sistematicamënter almanco dala pröma mesana;
   
3. n'organisaziun flessibla dl'ativité educativa y didatica tla composiziun dles seziuns y dles tlasses, inće te na forma de tlasses y seziuns davertes, aladô de na programaziun scolastica individualisada;
   
4. la continuité educativa danter scolina y scora, sciöche inće danter i degrà de scora desvalis, tres incuntades de consultaziun d'oblianza danter maestres dla scolina y dla scora y inće danter le personal insegnant de vigni degré scolastich;
   
5. la poscibilité da podëi stlüje jö la scora d'oblianza y da la frecuentè ćina dejedot agn, lascian pro sön proposta dl consëi de tlassa che al vëgnes fat inće trëi iadi la medema tlassa;
   
6. l'assegnaziun de personal insegnant spezialisé por l'insegnamënt de sostëgn tles scores de vigni sort y degré, cun laprò inće les scolines y les scores profescionales;
   
7. la colaboraziun danter les maestres/i maestri d'integraziun y les atres maestres/i atri maestri tles seziuns y tles tlasses olache chisc laôra y surantol deboriada la responsabilité. Insciö tol les maestres/i maestri d'integraziun pert ala programaziun didatica y educativa y al'elaboraziun y verificaziun dles ativitês de competënza di consëis de intertlassa, di consëis de tlassa y di collegiums dl personal insegnant. Sce al é tl interès dles scolares/di scolars cun handicap tol les maestres/i maestri d'integraziun inće pert ales sentades d'assistënza funzionala y de reabilitaziun;
   
8. l'assegnaziun de personal d'assistënza spezialisé por sostignì, deboriada cun le personal insegnant, l'autonomia personala y soziala, cun laprò la capazité de comunicaziun y relaziun dla scolara/dl scolar cun handicap. 43)