(1) Cun regolamënt d’esecuziun regolëia la Provinzia autonoma de Balsan la comerzialisaziun di materiai forestai de moltiplicaziun aladô dla diretiva 1999/105/CE dl Consëi dl’Uniun europeica di 22 de dezëmber 1999.
(2) La funziun de organism ofizial aladô dl articul 2, paragraf 1, lëtra k), dla diretiva 1999/105/CE tl raiun dla Provinzia autonoma de Balsan vëgn eserzitada dala Repartiziun provinziala Bosć.
(3) Chi che prodüj, tëgn sö por vëne, pîta o mët te n’atra manira sön le marćé materiai forestai de moltiplicaziun zënza lizënza vëgn sotmetüs a na straufunga aministrativa de 1.000 euro ćina 6.000 euro.
(4) Chi che ne tëgn nia por vigni unité de produziun la consistënza di materiai de moltiplicaziun y ne registrëia nia avisa les entrades y les spëises é sotmetüs a na straufunga aministrativa de 500 euro ćina 3.000 euro.
(5) Chi che fej fai tla registraziun dles entrades y dles spëises di materiai forestai de moltiplicaziun o ne ti lascia nia al savëi ala Repartiziun provinziala Bosć la consistënza di materiai de moltiplicaziun te sües unitês de produziun é sotmetüs a na straufunga aministrativa de 200 euro ćina 1.200 euro.
(6) Chi che cumpra, partësc fora, mët söl marćé o trasporta materiai forestai de moltiplicaziun nia despartis te loć identificà o ne po nia desmostrè la provegnënza o l’identité clonala é sotmetüs a na straufunga aministrativa de 50 euro ćina 300 euro, cun na straufunga minima te vigni caje de 100 euro, por vigni chilo o fraziun de chilo de somënzes, por vigni hectoliter o fraziun de hectoliter de coches, grups de früć y früć, por vigni cënt o süa fraziun de pices plantes o de perts de plantes.
(7) Le personal a chël ch’al ti speta les funziuns de control y che constatëia la violaziun po secuestrè i materiai forestai de moltiplicaziun y i desdrüje a ćiaria dla porsona che à cometü la violaziun. I cosć eventuai por les analises fates dai istituć inćiarià va inće a ćiaria dla porsona che à cometü la violaziun
(8) Sce les violaziuns dades dant ti comesc 4, 5 y 6 vëgn fates plü iadi po le diretur dla Repartiziun provinziala Bosć desponn la sospenjiun dla lizënza por n tëmp danter 2 y 5 agn.24)