(1) Almanco 15 dis dan che l mplant vënie metù n droa, prejentea l nteressà al’Agenzia provinziela la dumanda de culaudazion y d’autorisazion dl mplant. Cun la prejentazion dla dumanda d’autorisazion vën l mplant ratà autorisà provisormënter a pië via dala data dl’ativazion ndicheda tla nrescida nstëssa.
(2) Tl tëmp de 90 dis dala tëuta n droa dl mplant cuntrolea l’Agenzia provinziela la regularità dl mplant y la dà l’autorisazion curespundënta; te chësta autorisazion vëniel fissà la cundizions y la prescrizions che ie de bujën per realisé i prinzips de chësta lege, ma nce la garanzies finanzieres che ie de bujën, la periodizità y la sort di cuntroi nterns. La prescrizions cuntenides tl’autorisazion possa unì mudedes tenian cont dl svilup tecnologich y dla mudazions dla situazion ambientela.
(3) Sce l vën, ntan l eserzize provisore, azertà iregulariteies o emiscions plu autes di lims, scrij l’Agenzia provinziela dant la mesures che ie da adoté te n tëmp de al plu 90 dis. Te caji griefs muessa l eserzize dl mplant unì fermà debota y resté fërm nchin che la mesures ududes danora ie unides adotedes.
(4) Tl cajo d’azertamënc particulermënter cumplichei possel unì cunzedù n slungiamënt di tëmps udui danora.
(5) L’autorisazion muessa unì renuveda uni cin ani y a uni moda tl cajo de mudazions sustanzieles dl’ativiteies. L’autorisazion per mplanc registrei aldò dl regulamënt EMAS o dla norma ISO 14001 vel 8 ani alalongia.
(6) La mudazion dl’autorisazion, per chëla che l ne ie nia udù danora l’aplicazion dl articul 23, muessa unì damandeda al’Agenzia provinziela, che fej al savëi si minonga tl tëmp de 60 dis.
(7) Contra l pruvedimënt dl’Agenzia provinziela iel puscibl fé recurs tl tëmp de 30 dis dala nutificazion ala cumiscion VFA nunzieda tl articul 12 dla lege provinziela dl 24 de lugio 1998, nr. 7, y mudazions suzessives.
(8) Coche derogazion dal articul 23 vën i mplanc de smaltimënt y de recupereda, ora che la sëula reduzion dl volum, autorisei dal’Agenzia provinziela, sce l nteressà à la sënta leghela o la sozietà fulestiera proprietera dl mplant à la sënta de reprejentanza tl raion dla provinzia de Bulsan. Per dejëujer l’ativiteies singules sun l teritore provinziel muessa l nteressà, che à tla man l’autorisazion relasceda nce da d’autra regions, ti comuniché almanco 15 dis dan la nstalazion dl mplant al’Agenzia provinziela i detai spezifics n cont dl’ativietes, njuntan l’autorisazion y la iscrizion tl Register naziunel nunzià tl articul 212 dl decret legislatif dl 3 d’auril 2006, nr. 152, coche nce duta l’autra documentazion damandeda per documenté che la normes ambienteles ie unides tenides ite. Sce chësc tëmp ie passà via o n cajo dla prejënza dl nulla osta dl’Agenzia provinziela possen scumencé cun l’atività. L’Agenzia provinziela possa scrì dant prescrizions ntegratives o la possa pruibì l’atività cun n pruvedimënt mutivà, sce l dejëujer de chëla atività tla luegia spezifica ne ie nia cumpatibl cun l ambient.
(9) Restan mpe l’aplicazion dla straufonghes nunziedes tl articul 43, sce do cuntroi fac do la tëuta n droa dl mplant, ne resultea chisc nia cunforms al’autorisazion aldò de chësc articul, passen, aldò dla grievëza dla nfrazion, a:
- l amunimënt, dajan dant n tëmp te chël che la iregulariteies muessa unì scunjaredes;
- l amunimënt y ala suspension cuntestuela dl’autorisazion per n tëmp determinà;
- ala revucheda dl’autorisazion tl cajo che l ne sibe degun adatamënt a cie che ie scrit dant y tl cajo che la nfrazions vënie dant deplù iedesc.] 21)