a) Lege Provinziala di 30 de setëmber dl 2005, n. 71)
Normes tla materia de nuzeda dl’eghes publiches 2)

(1)La cunzescions per ciarië ega minerela te bozes vën inò scrites ora a garejeda do che les ie destumedes. I obietifs dla ndizion dla garejeda ie l avanamënt dla cuantiteies ciariedes te bozes, na cumerzialisazion miëura y plu ampla, na nuzeda plu efizienta y plu ecologica dla ressursa ega minerela y l stanziamënt de fonds de cumpensazion. 33)

(2)L tituler dla cunzescion per l ciariamënt dl’ega minerela te bozes possa manifesté al ufize provinziel cumpetënt l nteres al renuvamënt dla cunzescion y chël l plu abenëura doi ani dan la destumeda curespundënta y, al plu tert, n ann dan la destumeda. 34)

(2/bis) Cunzescions nueves per l ciariamënt d’eghes minereles te bozes vën dates ora aldò dl articul 3 y sun la basa de na ufierta per l stanziamënt de fonds de cumpensazion. La modaliteies relatives ie stabilides dala Jonta provinziela do che l’eghes minereles ie unides scrites ite tla lista nunzieda pra l coma 2 dl articul 13. N desvieda al articul 3 ne vën la dumandes de cunzescion nia publichedes, ora che i dac essenziei sun i dërc d’ega. La despusizions de chësc coma vën nce aplichedes ala dumandes de cunzescion per l ciariamënt te bozes d’eghes minereles nueves che ie bele unides prejentedes.  35)

(3)L ufize provinziel cumpetënt nviëia via te n tëmp de 120 dis la pruzedura de renuvamënt dla cunzescion. Tl cajo che l ne ie nia unit fat dumanda de renuvamënt tl tëmp preudù da pert dl cunzesciuner da śën, vën la cunzescion scrita ora d’ufize. Per seguré duta la nfurmazions che ie de bujën per la ndizion dla garejeda dà l cunzesciuner da śën l azes a duta la pertes dl mplant, ala frabiches de gestion y ai teraces dl mplant y l mostra nce ca i documënc tecnics de gestion. 36)

(4) Nce tl cajo de revucheda dla cunzescion o de renunzia a chësta possa l ufize cumpetënt scrì ora na garejeda per l renuvamënt dla cunzescion.

(5) Tla ndizion dla garejeda iel dat sëura chësc:

1. la ndenisazion che ti spieta al cunzesciuner che ie stat nchin śën per la pertes dl mplant, la frabiches de gestion y i teraces che unirà trasferii al cunzesciuner che vën;
   
2. la cuantità mesana y mascima d’ega derivabla.
   

(6) La dumandes de partezipazion ala garejeda muessa unì prejentedes cun i documënc stabilìi dala Jonta provinziela tl tëmp de 90 dis dala data de publicazion dla ndizion relativa tla Rë zivica dl Südtirol.

(7) Nchin che l vën dat ora na cunzescion nueva mëina l cunzesciuner da śën inant l mplant tl respet dla prescrizions ududes danora dala cunzescion.

(8) Cun l passé dl mplant al cunzesciuner nuef passa i bëns che possa unì trasferìi debant tla proprietà dla Provinzia y i possa unì adurvei dal cunzesciuner nuef.

(9) La despusizions de chësc articul vën nce aplichedes ala dumandes de renuvamënt de cunzescions per l ciariamënt d’ega minerela te bozes bele prejentedes. 37)