(1) Le comerz al menü o la racoiüda de ordinaziuns de cumpra al domizil di consumadus é sotmetüda ala comunicaziun fata damperfora al comun olache le comerziant à la residënza, tl caje de na porsona fisica, o la sënta legala, tl caje de n’impreja, da almanco un n ann. L'ativité po scomencè 30 dis do la recioiüda dla comunicaziun. Te chësta comunicaziun mëssel gnì detlarè le possès di recuisić preodüs dal articul 2 y le setur de marćianzia. 16)
(2) Sce l'impreja ô inćiarié zacai por l'eserzize, le comunichëiera al'autorité de publica segurëza dl post olache ara à la residënza o la sënta legala. L’impreja à la responsabilité zivila por l'ativité di inćiarià. I inćiarià mëss avëi i recuisić morai preodüs dal articul 2 y l'impreja ti consegnëia n documënt de reconescimënt, che mëss dagnora gnì mostrè al consumadù y che mëss gnì destut pornanche i inćiarià perd chisc recuisić. Inće le titolar dl'impreja mëss se portè do chësc documënt de reconescimënt sce al eserzitëia personalmënter l'ativité sön le post.
(3) L'esibiziun o ilustraziun de catalogs y vigni atra forma de propaganda comerziala che vëgn fata al domizil dl consumadù o ti locai olache le consumadù é, inće ma temporaneamënter por rajuns de laûr, stüde, cura o devertimënt, é sotmetüdes ales desposiziuns sön i inćiarià y sön le documënt de reconescimënt preodüdes da chësc articul.