a) Lege Provinziala di 7 de novëmber dl 1983, n. 411)
Regolamentaziun dla formaziun permanënta y dles biblioteches publiches

(1) Biblioteches publiches aladô de chësta lege é dötes les biblioteches de interes publich che vëgn tignides dala Provinzia, da d'atri ënc publics, da scores, cöres, istituziuns privates, zëntri de formaziun permanënta, sciöche ince da consorc dles istituziuns y di ënc nominá.

(2) Les biblioteches preodüdes dal coma da denant mëss avëi chisc recuisic:

1. ester davertes por la coletivité;
   
2. avëi n patrimone de libri y material informatif, sciöche ince media audiovisuai eventuai che corespogn a sü fins;
   
3. avëi na sënta adatada y n aredamënt adegué;
   
4. ordiné so patrimone de libri y material informatif aladô dles regoles de cataloghisaziun tecnich-bibliotecares acreditades;
   
5. garantí orars de daurida aladô di bojëgns;
   
6. avëi personal tecnich cualifiché;
   
7. ne avëi degügn fins de davagn.
   

(3) Les biblioteches de scores, de convic y de strotöres comunitares ne mëss nia ester davertes ala coletivité.

(4) Chëstes categories de biblioteches costituësc deboriada cun les biblioteches provinziales le sistem bibliotecar provinzial:

1. les biblioteches locales;
   
2. les biblioteches zentrales y chëres de valada por i paisc ladins;
   
3. les biblioteches speziales.
   

(5) Al é strotöres bibliotecares:

1. la sënta prinzipala dla biblioteca;
   
2. les sucursales;
   
3. i posć d'imprëst fisc o mobii.
   

(6) Ince les sucursales mëss avëi i recuisic dá dant tl coma 2 de chësc articul.

(7) Les biblioteches locales, les biblioteches zentrales y chëres de valada regolamentëia süa ativité y so ordinamënt intern sön la basa de regolamënc model aposta aprová dala Junta provinziala.

(8) Cun regolamënt d’esecuziun vëgnel definí plü avisa i recuisic dá dant tl coma 2.  36)