3) Decret dl Presidënt dla Republica dl 31 de agost 1972, n. 6701)
Apurvazion dl test unich dla leges costituzioneles che reverda l statut speziel per l Trentin-Südtirol

(1)  I bilanc njiniëi dala Jonta regiunela o da chëla provinziela y i rendiconc finanzieres njuntei dala relazion dla Jonta nstëssa ie apurvei respetivamënter cun lege regiunela o provinziela.

(2)  La litazion de uni capitul dl bilanz dla Region y dla Provinzia de Bulsan vën tenida, sun dumanda dla maiuranza de na grupa linguistica, per grupes linguistiches.

(3) I capituli de bilanz che ne à nia giatà la maiuranza dla stimes dla grupa linguistica taliana o dla grupa linguistica tudëscia vën sometui, tl lim de tëmp de trëi dis, a na cumiscion de cater cunselieres regiunei o provinziei, liteda dal Cunsëi tl scumenciamënt dla legislatura y per duta la dureda de chësta, cun cumposizion paritetica danter la doi majera grupes linguistiches y n cunformità ala desiniazion de uni una de chësta grupes. 85)

(3/bis)  I capituli de bilanz che ne à nia giapà la maiuranza dla stimes dla grupa linguistica ladina ie sometui, tl tëmp de trëi dis, a na cumiscion de trëi cunselieres regiunei o provinziei liteda dal Cunsëi tl scumenciamënt dla legislatura y per duta la dureda de chësta, metuda adum da n cunselier che fej pert dla grupa linguistica taliana, da un che fej pert dla grupa linguistica tudëscia y da un che fej pert dla grupa linguistica ladina, aldò dla desiniazion de uni grupa. 86)

(4) La cumiscions nunziedes tl terzo y cuarto coma muessa stabilì, tl tëmp de chindesc dis, cun dezijion lienta per l Cunsëi, la denuminazion definitiva di capituli de bilanz y l amudlé di stanziamënc relatifs. La dezijion vën adoteda a maiuranza dla cumiscion nunzieda tl terzo coma y al'unanimità dla cumiscion nunzieda tl cuarto coma, zënza che la stima de n cunselier vele deplù. 87)

(5) Sce tla cumiscion de cater cunselieres ne vëniel nia arjont la miuranza o sce tla cumiscion de trëi cunselieres ne vëniel nia arjont la unanimità sun pruposta cuntlujiva, manda l Presidënt dl Cunsëi regiunel o de chël provinziel, tl lim de tëmp de set dis, l proiet dl bilanz y duta la ates y i verbai dla discuscion fata tl Cunsëi y tla Cumiscion, ala sezion autonóma de Bulsan dl Tribunal regiunel de giustizia aministrativa che, nchin a trënta dis do, muessa dezider cun pronunzia arbitrela la denuminazion di capituli nia apurvei y l munté di stanziamënc relatives. 88)

(6)  La pruzedura dessëura nunzieda ne vën nia aplicheda ai capituli de ntreda, ai capituli de spëisa che cuntën stanziamënc da scrì ite n basa a despusizions spezifiches de lege per na soma determineda danora per l ann finanzier y ai capituli relatifs ala spëises normales de funzionamënt per i organns y i ufizies dl ënt.

(7) La dezijions nunziedes ti comes cuinto y sesto de chësc articul ne possa nia unì cuntestedes y l ne possa nia unì fat recurs decontra pra la Chëurt costituzionela. 89)

(8)  Per i capituli definei cun la pruzedura aldò di comes dessëura possa la lege de apurvazion dl bilanz unì renvieda o cuntesteda dal Guviern mé per rejons de iligitimità che reverda viulazions dla Costituzion o de chësc Statut.

(9) Per l’apurvazion di bilanc y di rendiconc finanzieres dla Region iel debujën dla usc cunsenzienta dla maiuranza di cunselieres dla Provinzia de Trënt y dla Provinzia de Bulsan. Sce chësta maiuranza ne vën nia arjonta, vën l’apurvazion data da n organn a livel regiunel. Chësc organn ne possa nia mudé la dezijions sun i capituli de bilanz eventualmënter cuntestei n basa a cie che ie udù danora ti comes terzo, cuarto, cuinto y sesto de chësc articul y definei cun la pruzedura ndicheda iló. 90)