3) Decret dl Presidënt dla Republica dl 31 de agost 1972, n. 6701)
Apurvazion dl test unich dla leges costituzioneles che reverda l statut speziel per l Trentin-Südtirol

(1)  L Trentin-Südtirol, che tòl ite l teritore dla Provinzies de Trënt y de Bulsan, ie costituì coche Region autonóma cun persunalità giuridica, tla unità politica dla Republica taliana, che ie una y nia spartibla, sun la basa di prinzips dla Costituzion y aldò de chësc Statut.

(2)  La Region Trentin-Südtirol à sciche capoluech Trënt

(1)  Tla Region iel recunesciù la valivanza di dërc di zitadins, unfat de ce grupa linguistica che i fej pert, y la carateristiches etniches y cultureles d'uni grupa vën prutejedes.

(1)  La Region tòl ite la Provinzies de Trënt y de Bulsan.

(2)  I chemuns de Proveis, Unsere Liebe Frau im Walde, Tramin, Auer, Branzoll, Aldein, Laurein, St. Felix, Kurtatsch, Neumarkt, Montan, Truden, Margreid, Salurn, Altrei y la frazion Tanna dl chemun de Rumo tla Provinzia de Trënt toca pra la Provinzia de Bulsan.

(3)  Ala Provinzies de Trënt y de Bulsan ti vën recunesciudes formes y cundizions particuleres de autonomia tres chësc Statut.

(4)  La Region, la Provinzia de Trënt y la Provinzia de Bulsan à n si gunfalon y n si blason, apurvei cun decret dl Presidënt dla Republica. La despusizions sun l’adurvanza dla bandiera dl Stat ne vën nia arzichedes.

(1)  Tl’armonia cun la Costituzion y cun i prinzips sun l urdinamënt giuridich dla Republica 3)  y tl respet dla ublianzes internaziuneles y di nteresc naziunei – danter chëi nce la defendura dla mendranzes linguistiches locales – y dla normes de basa dla reformes economiches-sozieles dla Republica, à la Region l pudëi de emané normes de lege tla materies tlo cumpededes su:

1. urdinamënt di ufizies regiunei y dl personal de chisc ufizies;
2. urdinamënt di ënc pararegiunei;
3. urdinamënt di ënc locai y de si zircoscrizions;4)         
4. despuscion per l utl publich che ne reverda nia lëures che ie dantaldut y diretamënter a cëria dl Stat y che ne ie nia materies de cumpetënza provinziela;
5. mplanteda y tenida di libri fundieres;
6. servijes contra l meldefuech;
7. urdinamënt di ënc saniteres y di spediei;  
8. urdinamënt dla Cameres de Cumerz;   
9. svilup dla cooperazion y dla verdia sun la cooperatives;  
10. cuntribuc per miuramënc revardënc lëures publics dejëuc da d'autri ënc publics che ie nluegei tl raion dla Region.

(1)  La Region dà ora, ti lims dl articul che và danora a chësc y di prinzips scric dant dala leges dl Stat, normes de lege te chësta materies:

1. 5)
2. urdinamënt dla istituzions publiches de secudienza y benefizienza;
3. urdinamënt di ënc de credit fundier y de credit agrer, dla Casses dl sparani y dla Casses rureles, sciche nce dl’aziendes de credit de carater regiunel.    

(1)  Tl ciamp dla previdënza y dla seguranzes sozieles possa la Region emané normes de lege per ntegré la despusizions dla leges dl Stat, y la possa costituì istituc autonóms aposta o sustenì si istituzion.

(2)  La Casses mutues de malatia che ie tla Region y che ie unides ncorpuredes tl Istitut per l’assistënza de malatia ai lauranc, possa unì recostituides dal Cunsëi regiunel tl respet dla regulamentazion di raporc patrimoniei.

(3)  La prestazions de chësta Casses mutues al bën di nteressei ne possa nia vester mëndres de chëles dl istitut inant numinà.

(1)  Cun la leges dla Region possel unì istituì chemuns y mudà si cunfins y si denuminazions, do avëi audì la populazions nteressedes.

(2)  Tl cajo che chësta mudazions ëssa nfluenza sun la zircoscrizion teritoriela de ufizies statei àles permò fazion doi mënsc do la publicazion dl pruvedimënt tl “Buletin Ufiziel” dla Region.

(1)  La Provinzies à l pudëi de emané normes de lege ti lims ndichei tl articul 4, te chësta materies:

1. urdinamënt di ufizies provinziei y dl personal de chisc ufizies;                        6)
2. toponomastica, respetan la ublianza de bilinguism tl teritore dla Provinzia de Bulsan;
3. defendura y cunservazion dl patrimone storich, artistich y populer;  
4. usanzes y tradizions locales y istituzions cultureles (biblioteches, academies, istituc, museums) che à carater provinziel; manifestazions y ativiteies artistiches, cultureles y educatives locales; tla Provinzia de Bulsan, possen a chësc fin nce se nuzé de mesuns radiotelevisifs, stluta ora ie la facultà de mplanté stazions radiotelevisives;        
5. urbanistica y plans regulatëures; 7)            
6. defendura dla cuntreda;                
7. rejons de ujinanza;    
8. urdinamënt dla mëndra proprieteies cultivedes, ënghe n relazion ala fazion dl articul 847 dl codesc zevil; urdinamënt di 'mejes stluc' y dla cumenanzes familieres che se stiza sun statuc antics o usanzes;  
9. artejanat;        
10.   edilizia alesireda, finanzieda de plën o n pert da finanziamënc publics; tlo leprò toca nce i alesiramënc per l frabiché de cëses populeres te luesc tuchei da catastrofes y l’ativiteies che ënc de carater extraprovinziel dejëuj tla Provinzies cun finanziamënc publics;             
11. porc sun ruves y lec;
12.   fieres y marcei;  
13.   mesures de prevenzion y de prim aiut n cajo de catastrofes;        
14.   minieres, cun leprò nce l'eghes minereles y termeles, caves y torbieres;     
15.   ciacia y pescaria;     
16.   cultivazion de montes y parcs per la prutezion dla flora y dla fauna;       
17.   stredaria, egadoc y lëures publics de nteres provinziel;          8)
18.   comunicazions y trasporc de nteres provinziel, leprò toca nce l regulamënt tecnich y l eserzize de mplanc de furnadoies;             
19.   sëurantëuta direta de servijes publics y si gestion tres aziendes spezieles;
20.   turism y ndustria de albierch, tlo leprò toca i mëinacrëp, i purtadëures alpins, i maestri y la scoles de schi;        
21.   agricultura, bòsc y personal di verdabòsc, patrimone zootecnich y itich, istituc per la prutezion dla plantes, cunsorc agreres y stazions agreres sperimenteles, servijes contra la tampesta, miuramënt di teraces;                            
22.   despuscion de utl publich per duta la materies de cumpetënza provinziela;         
23. costituzion y funzionamënt de cumiscions cumeneles y provinzieles per l’assistënza y l urientamënt di lauranc per abiné n lëur;
24.   operes idrauliches dla terza, cuarta y cuinta categoria;    
25.   assistënza y benfizienza publica;              
26.   scolines;   
27.   assistënza scolastica per i ciamps de istruzions te chëi che la Provinzies à cumpetënza legislativa;    
28.   frabiché de scoles;  
29.   adestramënt y furmazion prufescionela.              

(1)  La Provinzies dà ora normes de lege tla materies cumpededes su tlo de sot, ti lims dl articul 5:

1.   polizai locala, urbana y rurela;
2.   istruzion elementera y segondera (mesana, classica, scientifica, magistrela, tecnica, prufescionela y artistica);                
3.   cumerz;     
4.   lernerat, libret de lëur, categories y cualifiches di lauranc;  
5.   costituzion y funzionamënt de cumiscions cumeneles y provinzieles de cuntrol sun la crissa y abineda de lëur;  
6.   reprejentazions publiches, per chël che reverda la segurëza publica;
7.   eserzizies publics, tl respet di recuisic sogetifs damandei dala leges dl Stat per giaté la lizënzes, di pudëies de verdia dl Stat, per garantì la segurëza publica, dla facultà dl Ministere dl ntern de anulé d'ufize, aldò dla legislazion statela, i pruvedimënc adotei te chësc ciamp, nce sce definitives. La disciplina di recursc urdeneres contra i pruvedimënc nstësc vën atueda tl cheder dl’autonomia provinziela;    
8.   avanamënt dla produzion ndustriela;       
9.   nuzeda dl'eghes publiches, ora che la gran derivazions per la produzion de energia eletrica;             
10.   igena y sanità, cun leprò l’assistënza sanitera y de spedel;                                                                 
11.   ativiteies sportives y de tëmp liede cun mplanc y njinies relatives.   

(1)  Per ntegré la despusizions dla leges dl Stat à la Provinzies l pudëi de emané normes legislatives tl ciamp dl colocamënt y dla ndrezadura al lëur, cun la facultà de se nuzé – nchin ala costituzion de si ufizies provinziei – di ufizies periferics dl Ministere dl lëur per eserzité la funzions aministratives liedes al pudëi legislatif che ti spieta ala Provinzies nstësses tl ciamp dl lëur.

(2)  I sëurastanc di ufizies dl lëur cumenei unirà cris ora y numinei dai organns statai, do avëi audì l Presidënt dla Provinzia9)  y i ambolc nteressei.

(3)  I zitadins residënc tla Provinzia de Bulsan à la rejon de prezedënza tl colocamënt al lëur tl teritore dla Provinzia nstëssa, zënza defrenziazion aldò dla purtenienza a na grupa linguistica o aldò dla anzianità de residënza.

(1)  La Provinzia possa autorisé la giaurida y l trasferimënt de purtines de banca de aziendes de credit a carater local provinziel y regiunel do avëi audì la minonga dl Ministere dl tesor.

(2)  L’autorisazion de giaurida y l trasferimënt tla Provinzia de purtines de banca d'autra aziendes de credit vën data dal Ministere dl tesor do avëi audì la minonga dla Provinzia nteresseda.

(3)  La Provinzia numinea l presidënt y l vizepresidënt dla Cassa de sparani do avëi audì la minonga dl Ministere dl tesor.

(1)  Per la cunzescions de gran autedes d'ega per la produzion de energia idroeletrica y l slungiamënt de si duredes à la Provinzies teritorialmënter cumpetëntes la rejon de prejenté si usservazions y oposizions te uni mumënt nchin che la minonga definitiva dl Cunsëi Sëurastant per i lëures publics vën data ju.

(2)  La Provinzies à oradechël nce la rejon de fé recurs pra l Tribunal Sëurastant dla eghes publiches contra l decret de cunzescion y de slungiamënt.

(3)  I Presidënc dla Provinzies9)  teritorialmënter cumpetëntes o si deleghei ie nviei a tò pert cun usc cunsultiva ala sentedes dl Cunsëi Sëurastant per i lëures publics, pra chëles che i pruvedimënc nunziei tl prim coma vën ejaminei.

(4)  L Ministere cumpetënt tòl i pruvedimënc che reverda l’atività dl Ënt naziunel per l'energia eletrica (ENEL) tla Region do avëi audì la minonga dla Provinzia nteresseda.

(1) Tl respet dl urdinamënt dla Union europeica y dl’acurdanzes internaziuneles, coche nce di prinzips de basa dl urdinamënt statel, regulea la Provinzies cun lege provinziela la manieres y la pruzedures d’asseniazion dla cunzescions per la gran derivazions d’ega a fin idroeletrich, fissan tl particuler la normes de pruzedura per l'esecuzion dla garejedes, i tëmps de ndizion de chëstes, i criteres d'amiscion y d'agiudicazion, i recuisic finanzieres, urganisatifs y tecnics di partezipanc. La lege provinziela regulea oradechël la dureda dla cunzescions, i criteres per la determinazion dla chëutes de cunzescion per la nuzeda y la valorisazion dl demane idrich y di bëns patrimuniei costituii dai mplanc per la gran derivazions idroeletriches, i parametri de svilup di mplanc coche nce la manieres de valutazion di aspec revardënc la cuntreda y l dann ambientel, determinan la mesures cunseguentes de cumpensazion ambientela y teritoriela, nce a carater finanzier.

(2)  Canche l toma la cunzescions reguledes da chësc articul, passa i lëures d'abineda, d'auteda y de regulazion, la cundotes a prescion y i canai de desćëria, tla cundizion de n funzionamënt reguler y zënza cumpensazion, ala proprietà dla Provinzies per l teritore respetif. Al cunzesciuner che à dejëut sun si spëises y tl tëmp de validità dla cunzescion, nvestimënc sun i bëns aldò dla prima frasa, sce preudui dal at de cunzescion o a uni moda autorisei dal cunzedënt, ti spietel canche la cunzescion fina via, o ti caji de destumeda o renunzia, na ndenisazion medema ala pert de n bën nia amortisà, aldò de cie che ie udù danora dala lege provinziela nunzieda tl coma 1. Per i bëns defrënc da chëi udui danora dala frases dessëura vëniel aplicà i regulamënc stabilii dal articul 25, segondo coma y comes suzessifs dl decret dl rë di 11 de dezëmber 1933, n. 1775, ratan remplazei i organs statei iló dac sëura cun organs curespundënc dla Provinzia, y dal articul 1/bis, coma 13, dl decret dl Presidënt dla Republica di 26 de merz 1977, n. 235.

(3)  Tla cunzescions de gran derivazion per l fin idroeletrich à i cunzesciuneres la ublianza de dé ju uni ann debant ala Provinzies autonomes de Trënt y de Bulsan, per servijes publics y categories de utënc da determiné cun lege provinziela, 220 kWh per uni kW de putënza numinela mesana de cunzescion, ala manieres stabilides dala Provinzies.

(4)  Oradechël stabilësc la Provinzies cun na si lege i criteres per la determinazion dl priesc dl'energia nunzieda tl coma 3 y data ju al’aziendes de destribuzion, coche nce i criteres per la tarifes de cunsum, tl respet dl urdinamënt dla Union europea.

(5)  I cunzesciuneres de gran derivazions d'ega per l fin idroeletrich paia uni mez ann ala Provinzies na soma determineda aldò de cie che ie preudù dala lege provinziela nunzieda tl coma 1, tenian cont dla mesanaria dl priesc unich naziunel dl'energia eletrica (PUN), coche nce dla mesanaria dla ujes de spëisa liedes ala furnidura dla medema energia eletrica per uni kWh d'energia nia tëuta ju da d'ëiles. L cumpëns uniter nunzià dessëura muda n proporzion ala variazions, nia plu basses dl 5 percënt, dl indesc ISTAT che reverda l priesc industriel per la produzion, l trasport y la destribuzion dl'energia eletrica.

(6) Le concessioni per grandi derivazioni a scopo idroelettrico accordate nelle province autonome di Trento e di Bolzano, in forza di disposizioni normative o amministrative che prevedono un termine di scadenza anteriore al 31 dicembre 2024, o a data successiva eventualmente individuata dallo Stato per analoghe concessioni di grandi derivazioni idroelettriche situate nel territorio nazionale, sono prorogate di diritto, ancorché scadute, per il periodo utile al completamento delle procedure di evidenza pubblica e comunque non oltre la predetta data ed esercitate fino a tale data alle condizioni stabilite dalle norme provinciali e dal disciplinare di concessione vigenti alla data della loro scadenza. Le province e i concessionari possono, in tal caso, concordare eventuali modificazioni degli oneri e delle obbligazioni previsti dalle concessioni in corso, secondo quanto stabilito dalla legge provinciale di cui al comma 1. 10) 

(7)  Tla materia de sistem idrich, vën la Provinzies damandedes danora sun la mesures dl'Autorità de regulazion per energia, rëies y ambient (ARERA) adressedes ai sogec che eserzitea i servijes de utl publich tl teritore respetif, n referimënt a si cumpatibltà cun chësc Statut y cun la normes d'atuazion curespundëntes. La manieres de consultazion ie definides tres n protocol de cunsëns stipulà danter l'Autorità nunzieda de sëura y la Provinzies, nce separatmënter. L'abineda dla nfurmazions y di documënc che ie debujën per la nrescides de cunescënza y per l'ativiteies dejëutes dal'Autorità ie de cumpëtenza dla Provinzies, aldò de pruzedures y modiei cuncurdei cun l'Autorità nstëssa tl cheder dl protocol de cunsëns nunzià dessëura, tl respet dla cumpetënzes a d'ëiles atribuides, nce tenian cont dla urganisazion di servijes de utl publich, dl sistem tarifer y dl eserzize di pudëies ispetifs y de straufonga.  11) 12)

(1)  Tl ciamp dla comunicazions y dl trasport iel de bujën dla minonga dla Provinzia per la cunzescions de linies che passa tres l raion dla Provinzia.

(2)  Oradechël iel ënghe de bujën dla minonga dla Provinzia per operes idrauliches dla prima y dla segonda categoria. L Stat y la Provinzia lëura ora, n cuncurdanza, n plann anuel de coordinamënt dla operes idrauliches che toma te si cumpetënza.

(3)  La nuzeda dla eghes publiches da pert dl Stat y dla Provinzia, tl ciamp dla cumpetënza respetiva, ie basà sun n plann generel, che vën laurà ora a una danter i reprejentanc dl Stat y dla Provinzia te n cumité aposta. 13)

(1)  Sce la normes genereles sun la prugramazion economica ne scrij nia dant n auter sistem de finanziamënt, ti asseniea l Ministere dla ndustria, dl cumerz y dl artejanat ala Provinzies de Trënt y de Bulsan cuotes di stanziamënc anuei scric ite tl bilanz dl Stat per l’atuazion dla leges stateles che vëij danora aiuc finanzieres per l avanamënt dl’ativiteies ndustrieles. La cuotes vën determinedes do avëi audì la minonga dla Provinzia y tenian cont dla somes metudes a despusizion tl bilanz statel y dl bujën dla populazion dla Provinzia nstëssa. L Stat y la Provinzia fej ora coche la somes asseniëdes vën nuzedes. Sce l Stat porta pro si mesuns al'esecuzion di plans naziunei straurdeneres dl frabiché scolastich tla Provinzies de Trënt y de Bulsan, vën la ndrova di mesuns nstësc fata ora a una cun la Provinzia.

(2)  La Provinzia de Bulsan adrova si stanziamënc destinei a fins assistenziei, soziei y culturei n pruporzion direta ala cunsistënza de uni grupa linguistica y aldò dl bujën de uni grupa linguistica, ora che ti caji straurdeneres che se damanda ntervënc de prëscia per bujëns particuleres.

(3)  La Provinzia de Trënt segurea la destinazion de assé stanziamënc per pudëi sustenì la defendura y l svilup culturel, soziel y economich dla populazion ladina y de chëles mochena y zimbra residëntes tla Provinzia, tenian cont de si carateristiches y de si bujëns spezifics. 14)

(1)  Tla materies y ti lims te chëi che la Region o la Provinzia possa emané normes legislatives vën i pudëies aministratifs relatifs, che n basa al urdinamënt da dant ti spitova al Stat, eserzitei respetivamënter dala Region y dala Provinzia.

(2)  L’atribuzions che ti spieta ala Provinzies n basa ala leges valëivles resta mpe sce cumpatibles cun chësc statut.

(3)  L Stat possa oradechël deleghé cun lege ala Region, ala Provinzia y a d'autri ënc publics locai funzions de si aministrazion. Te chësc cajo resta la spëises per l eserzize de chëla funzions inant a cëria dl Stat.

(4)  L trasferimënt de funzions aministratives da pert dl Stat, nce sce stabilì cun chësta lege, puderà unì mudà o revucà cun lege urdenera dla Republica.

(1)  Cun lege dl Stat possa l pudëi de emané normes legislatives per servijes che reverda materies che ne toma nia tla cumpetënzes respetives ududes danora da chësc statut unì atribuì ala Region y ala Provinzies.

(1)  La Region eserzitea normalmënter la funzions aministratives les delegan ala Provinzies, ai Chemuns y a d'autri Ënc locai o se nuzan de si ufizies. La delega ala Provinzies ie de ublianza tla materia di servijes contra l meldefuech.

(2)  La Provinzies possa deleghé n valgunes de si funzions aministratives ai Chemuns o a d'autri Ënc locai o se nuzé de si ufizies.

(1)  Tla Provinzia de Bulsan vën l nseniamënt tla scolines, scoles elementeres y scoles segonderes tenì tla rujeneda de l'oma taliana o tudëscia di sculeies da nsenianc per chëi che chësta rujeneda ie ënghe chëla de l'oma. Tla scoles elementeres cun scumenciamënt tla segonda o terza tlassa, aldò de cie che unirà stabilì cun lege provinziela sun pruposta lienta dla grupa linguistica nteresseda, y te chëles segonderes ie de ublianza l nseniamënt dla segonda rujeneda che vën tenì da nsenianc, per chëi che chësta rujeneda ie chëla de l'oma.

(2)  La rujeneda ladina vën adurveda tla scolines y nsenieda tla scoles elementeres di luesc ladins. Chësta rujeneda vën oradechël nce adurveda coche strumënt de nseniamënt tla scoles d'uni orden y grado ti luesc nstësc. Te chësta scoles vën l nseniamënt tenì n basa a na valivanza de ëures y resultat finel, per talian y tudësch.

(3)  La iscrizion dl sculé tla scoles dla Provinzia de Bulsan vën fata tres na dumanda scëmpla dl pere o de si sostitut legal. Sce la iscrizion ne vën nia azeteda, possa l pere o si sostitut legal prejenté recurs ala sezion autonóma de Bulsan dl Tribunal regiunel de giustizia aministrativa.

(4)  Per l’aministrazion dla scoles de rujeneda taliana y per la verdia dla scoles de rujeneda tudëscia y de chëles dla valedes ladines, nunziedes tl coma 2, numinea l Ministere dla publica istruzion, do avëi audì la minonga dla Jonta provinziela de Bulsan, n sëurantendënt scolastich.

(5)  Per l’aministrazion dla scolines, dla scoles elementeres y dla scoles segonderes de rujeneda tudëscia, numinea la Jonta provinziela, do avëi audì la minonga dl Ministere dla publica istruzion, n ntendënt scolastich, ora de na pruposta de trëi reprejentanc dla grupa de rujeneda tudëscia tl cunsëi scolastich provinziel.

(6)  Per l’aministrazion dla scoles nunziedes tl coma 2 de chësc articul, numinea l Ministere dla publica istruzion n ntendënt scolastich, ora de na pruposta de trëi reprejentanc dla grupa de rujeneda ladina tl cunsëi scolastich provinziel.

(7)  L Ministere dla publica istruzion, numinea, a una cun la Provinzia de Bulsan, i presidënc y i cumëmbri dla cumiscions per i ejams de Stat tla scoles de rujeneda tudëscia.

(8)  Al fin de avëi na valënza valiva di diploms de cuntlujion muessel unì damandà la minonga dl Cunsëi Sëurastant dla publica istruzion sun i programs de nseniamënt y d'ejam per la scoles dla Provinzia de Bulsan.

(9)  L personal aministratif dl pruveditorat scolastich, chël aministratif dla scoles segonderes y l personal aministratif di ispetorac scolastics y dla direzions didatiches passa ala dependënza dla Provinzia de Bulsan, restan asseniedes ai servijes per la scoles de si rujeneda de l'oma.

(10)  Respetan mpe la dependënza dal Stat dl personal nseniant, ti vën sëurandata al ntendënt per la scoles de rujeneda tudëscia y al ntendënt per la scoles nunziedes tl coma 2, la cumpetënza per i pruvedimënc n cont dl trasferimënt, dl lizenziamënt, dl’aspietadiva, dla straufonghes disciplineres nchin ala suspension per n mëns dala cualifica zënza paiamënt, per cie che reverda l personal nseniant dla scoles de cumpetënza respetiva.

(11)  Contra la mesures tëutes dai ntendënc dla scoles nunziei tl coma dan chësc pòssen fé recurs al Minister per la publica istruzion, che tòl na dezijion definitiva do avëi audì la minonga dl sëurantendënt scolastich.

(12)  La grupes de rujeneda taliana, tudëscia y ladina ie reprejentedes tl cunsëi provinziel scolastich y tl cunsëi de disciplina per i maestri.

(13)  I reprejentanc di nsenianc tl cunsëi scolastich provinziel vën desiniei, tres vela, dal personal nseniant y n pruporzion ala cumpëida di nsenianc dla grupes linguistiches respetives. La cumpëida di reprejentanc dla grupa de rujeneda ladina ne daussa, a uni moda, nia vester mëndra de trëi.

(14)  L cunsëi scolastich, ora che dejëujer la funzions ududes danora dala leges valëivles, dà ju si minonga de ublianza sun l'istituzion y l stlù de scoles; sun programs y orares; sun la materies de nseniamënt y si partizion te grupes.

(15)  Tl cajo de istituzion de universiteies tl Trentin-Südtirol, muessa l Stat dant audì la minonga dla Region y dla Provinzia nteresseda.  15) 16)

(1)  I Presidënc dla Provinzies9)  eserzitea l’atribuzions che ti spieta al’autorità de segurëza publica, ududes danora dala leges valëivles tla materies de ndustries periculëuses, de mestieres da fuera y ncompri, eserzizies publics, agenzies, tipografies, mestieres ambulanc, lauranc y dependënc de cësa, amalei de mënt, drughei y petleri, jëuni sot ai 18 ani.

(2)  Ai fins dl’atribuzions nunziedes se joa i Presidënc dla Provinzies9)  nce di organns dla polizai de Stat o dla polizai locala urbana y rurela.

(3)  L’autra atribuzions, che ti spieta aldò dla leges valëivles de segurëza publica al prefet, ti vën sëurandates ai cuestores.

(4)  L’atribuzions, sëurandates ai ambolc sciche ufiziai de segurëza publica o ai funzioneres de segurëza publica destachei, resta mpe.

(1)  I pruvedimënc dl’autorità statela adotei per rejons de orden publich, che suspënd o limitea o che à a vel' maniera nzidënza sun la fazion dl’autorisazions di Presidënc dla Provinzies9)  tla materia dla polizai o d'autri pruvedimënc de cumpetënza dla Provinzia, vën emanei do avëi audì l Presidënt dla Provinzia9)  cumpetënt, che muessa dé ju si minonga nchin al lim de tëmp dat sëura tla dumanda.

(1)  Per l'usservanza dla leges y di regulamënc regiunei y provinziei possa l Presidënt dla Region 17)y i Presidënc dla Provinzies 9)  damandé la ntervenzion y l’assistënza dla polizai dl Stat, o dla polizai locala urbana y rurela.

(1)  Per defënder la normes cuntenides te si leges se joa la Region y la Provinzia dla straufonghes penales stabilides dala leges dl Stat per la medema sort de fac.

(1)  I organns dla Region ie: l Cunsëi regiunel, la Jonta regiunela y l Presidënt dla Region. 18)

(1)  L Cunsëi regiunel ie metù adum dai cumëmbri di Cunsëies provinziei de Trënt y de Bulsan. 19)

(4)  La cundizion per pudëi eserzité l dërt litel atif tla Provinzia de Bulsan ie la residënza tl teritore regiunel per n tëmp de cater ani zënza nteruzion. Per l eserzize dl dërt litel atif tla Provinzia de Trënt ie la cundizion chëla dla residënza tl teritore provinziel per l tëmp de un n ann zënza nteruzion. L litadëur che à madurà l tëmp de residënza de cater ani zënza nteruzion tla Region vën scrit ite, ai fins dla veles di Cunsëies provinziei, tla listes liteles dl chemun dla Provinzia, te chël che l à madurà l tëmp plu lonch de residënza tl tëmp di cater ani, o, tl cajo de tëmps de medema dureda, tl chemun de si ultima residënza. Per la vela di Cunsëies provinziei y di Cunsëies cumenei, ududa danora tl articul 63, eserzitea l litadëur, ntan i cater ani, la rejon de vela tl Chemun ulache l fova residënt dant. 20)

(1)  L Cunsëi regiunel eserzitea i pudëis legislatifs atribuìi ala Region y l’autra funzions che ti ie unides sëurandates dala Costituzion, da chësc Statut y dal’autra leges dl Stat.

(1)  L’atività dl Cunsëi regiunel se dejëuj te doi sescions de medema dureda; la sentedes vën tenides auternativamënter tla ziteies de Trënt y de Bulsan.

(1/bis)  L possa unì tenì sentedes straurdeneres revardëntes i dërc dla mendranza linguistica ladina, dla grupa linguistica di mochens y dla grupa linguistica di zimbri. 21)

(2)  L Cunsëi nuef se anconta ti 20 dis dala cunedida dla persones litedes ti cunsëies provinziei de Trënt y de Bulsan sun cunvocazion dl Presidënt dla Region n cëria. 22)

(1)  I cumëmbri dl Cunsëi regiunel reprejentea la Region ntiera.

(2)  I ne possa nia unì cherdei a respuender dla minonghes y dla stimes dates ju tl eserzize de si funzions.

(3)  La ncëria de cunselier provinziel y regiunel ne ie nia cumpatibla cun chëla de cumëmber de una dla Cameres, de n auter Cunsëi regiunel, o dl Parlamënt europeich. 23)

(1)  L Cunsëi regiunel litea danter si cumëmbri l Presidënt, doi Vizepesidënc y i Secreteres.

(2)  L Presidënt y i Vizepresidënc resta tla ncëria per doi ani y mez.

(3)  Per i prim trënta mënsc de atività dl Cunsëi regiunel vën l Presidënt lità danter i cunselieres dla grupa de rujeneda taliana. Per la perioda che vën do vën l Presidënt lità danter i cunselieres dla grupa de rujeneda tudëscia. Cun l’apurvazion, per la periodes respetives, dla maiuranza di cunselieres respetivamënter dla grupa de rujeneda taliana o tudëscia, possel unì lità n cunselier dla grupa de rujeneda ladina. I Vizepresidënc vën litei danter i cunselieres dla grupes de rujeneda defrëntes da chëla dl Presidënt.

(4)  Tl cajo che l Presidënt o l Vizepresidënt dl Cunsëi regiunel dajëssa si demiscions, sce l ëssa da murì o da lascé si ncëria per n'autra gauja, litea l Cunsëi n Presidënt nuef o n Vizepresidënt nuef aldò dla modaliteies ududes danora dal coma 3. La vela muessa unì tenida tla prima senteda che vën do y la ie valëivla nchin ala destumënza dla perioda di doi ani y mez.

(5)  I Vizepresidënc sustën l Presidënt che chir ora l Vizepresidënt cherdà a l remplazé tl cajo de assënza o mpedimënt. 25)

(1)  La normes che regulea l’atività dl Cunsëi regiunel ie stabilides da n regulamënt ntern apurvà dala maiuranza assoluta di cunselieres.

(2)  L regulamënt ntern stabilësc nce la normes per determiné la purtenienza di cunselieres ala grupa linguistica.

(1)  L Presidënt y i Vizepresidënc26)  dl cunsëi regiunel che ne ademplësc nia ala ublianzes de si ufize vën revuchei dal Cunsëi nstës a maiuranza de si cumëmbri.

(2)  A chësc fin possa l Cunsëi regiunel unì cherdà ite cun prëscia sun dumanda de almanco un n terzo di cunselieres.

(3)  Sce l Presidënt o l Vizepresidënt26)  dl Cunsëi regiunel ne chërd nia ite l Cunsëi tl lim de tëmp de chindesc dis dala dumanda, vën l Cunsëi regiunel cherdà ite dal Presidënt dla Region17).

(4)  Sce l Presidënt dla Region17)  ne chërd nia ite l Cunsëi regiunel nchin a chindesc dis dala destumënza dl lim de tëmp scrit dant tl coma dan chësc, vën la cunvocazion fata dal Cumisser dl Guviern.

(5) 27)

(1)  La gaujes de desliamënt nunziedes tl articul 49/bis, coma 1 y 2, vel nce per l Cunsëi regiunel. Tl cajo de desliamënt dl Cunsëi regiunel vëniel tenì, tl lim de tëmp de trëi mënsc, veles nueves di Cunsëies provinziei.

(2)  L desliamënt vën fat cun la pruzedures ududes danora dal articul 49/bis. Cun l decret de desliamënt vëniel numinà na cumiscion de trëi cumëmbri, cris ora danter i zitadins litabli al Cunsëi provinziel. Un de chisc cumëmbri à da vester de rujeneda tudëscia,

(3)  I Cunsëies provinziei desliei eserzitea inant si funzions nchin ala vela di Cunsëies provinziei nueves. 28)

(1)  L Cunsëi regiunel vën cherdà ite da si Presidënt te na senteda urdenera tla prima ena d'uni semester y, te sentedes straurdeneres, sun dumanda dla Jonta regiunela o dl Presidënt de chësta, o sun dumanda de almanco un n cuinto di cunselieres tla ncëria, y oradechël ti caji udui danora da chësc Statut.

(1)  Tla materies che ne ie nia de cumpetënza dla Region, ma che ie per chësta de nteres particuler, possa l Cunsëi regiunel formulé ghiranzes y proiec. Chisc vën mandei dal Presidënt dla Region17)  al Guviern per la prejentazion ala Cameres y ti vën fac avëi n forma de copia al Cumisser dl Guviern.

(1)  La Jonta regiunela ie costituida dal Presidënt dla Region, che ie si sëurastant, da doi Vizepresidënc y dai assessëures efetifs y suplënc. 29)

(2)  L Presidënt, i Vizepresidënc y i assessëures vën litei dal Cunsëi regiunel te si grem cun vela sucrëta y a maiuranza assoluta.

(3)  La cumposizion dla Jonta regiunela muessa respeté la cunsistënza dla grupes linguistiches coche les ie reprejentedes tl Cunsëi dla Region. Di Vizepresidënc fej un pert dla grupa de rujeneda taliana y l auter dla grupa de rujeneda tudëscia. Ala grupa linguistica ladina ti vëniel garantì la reprejentanza tla Jonta regiunela nce n desvienza dala reprejentanza pruporzionela. 30)

(4)  L Presidënt chir ora l Vizepresidënt che ie cherdà a l remplazé tl cajo de assënza o mpedimënt.

(5)  I assessëures suplënc vën cherdei a remplazé i assessëures efetifs tl’atribuzions respetives, tenian cont dla grupa linguistica de chëla che i remplazei fej pert.

(1)  L Presidënt y i cumëmbri dla Jonta regiunela resta tla ncëria per duta la dureda dl Cunsëi regiunel y do la destumënza de chësc se cruzia ëi mé dl se dejëujer dl’aministrazion urdenera nchin che l Presidënt y i cumëmbri dla Jonta ie numinei da pert dl Cunsëi nuef.

(2)  I cumëmbri dla Jonta regiunela che ie pert de n Cunsëi provinziel deslià eserzitea inant si ufize nchin ala vela dl Cunsëi provinziel nuef. 31)

(1)  L Presidënt dla Region17)  o i assessëures che ne respetea nia la ublianzes stabilides dala lege vën revuchei dal Cunsëi regiunel.

(2) 32)

(1)  Tl cajo che l ie de bujën de remplazé l Presidënt dla Region17)  o i assessëures per gauja de mort, demiscions o revucazion, chërd l Presidënt dl Cunsëi regiunel adum l Cunsëi tl lim de tëmp de chindesc dis.

(1)  L Presidënt dla Region17)  reprejentea la Region.

(2)  L tòl pert ala sentedes dl Cunsëi di Ministri, canche l vën tratà cuestions che reverda la Region.

(1)  L Presidënt dla Region17)  mëina la funzions aministratives deleghedes dal Stat ala Region, se tenian ala istruzions dl Guviern.

(1)  L Presidënt dla Region17)  determinea la partizion di ciamps de cumpetënza danter i assessëures efetifs cun n decret aposta che à da unì publicà tl Buletin dla Region.

(1)  L Presidënt dla Region17)  emanea, cun n si decret, i regulamënc delibrei dala Jonta.

(1)  La Jonta regiunela ie l organn esecutif dla Region. A d'ëila ti spieta:

1. la delibrazion di regulamënc per l'esecuzion dla leges apurvedes dal Cunsëi regiunel;
2. l’atività aministrativa per la cuestions de nteres regiunel;
3. l’aministrazion dl patrimone dla Region y l cuntrol sun la gestion, tres aziendes spezieles, di servijes publics regiunei de sort ndustriela o cumerziela;
4. l’autra atribuzions che ti vën recunesciudes da chësta lege o da d'autra despusizions;
5. l’adozion, tl cajo de prëscia, de pruvedimënc de cumpetënza dl Cunsëi; chisc muessa unì sometui ala ratifica dl Cunsëi nstës te si prima senteda che vën do.

(1)  La Jonta regiunela muessa unì cunsulteda ai fins dl' istituzion y dla regulamentazion di servijes naziunei de comunicazion y de trasport che nteressea particularmënter la Region.

(1)  L Cunsëi regiunel possa deleghé ala Jonta regiunela l tratamënt dla cuestions de si cumpetënza, ora che l'emanazion di pruvedimënc de lege.

(1)  I organns dla Provinzia ie: l Cunsëi provinziel, la Jonta provinziela y l Presidënt dla Provinzia.33)

(2)  N armunia cun la Costituzion y cun i prinzips dl urdinamënt giuridich dla Republica, tl respet dla ublianzes internaziuneles y tla usservanza de chël che ie stabilì te chësc Capitul, determinea la lege provinziela, apurveda dal Cunsëi provinziel cun la maiuranza assoluta de si cumëmbri, la forma de guviern dla Provinzia y, n particuler, la modaliteies de vela dl Cunsëi provinziel, dl Presidënt y di assessëures, la relazions danter i organns dla Provinzia, la prejentazion y l’apurvazion dla mozion mutiveda de desfidënza ti cunfronc dl Presidënt dla Jonta, i caji de nia litabltà y de ncumpatibltà cun la ncëries nunziedes dessëura, sciche nce l eserzize dl dërt de scumenciadiva populera n cont dla leges provinzieles y dl referendum provinziel abrogatif, propositif y cunsultatif. Acioche l posse unì arjont che tramedoi sésc sibe reprejentei te na maniera valiva, vëniel cun la medema lege provinziela sustenì la cundizions de valivanza per la partezipazion ala veles. La demiscions cuntestueles dla maiuranza di cumëmbri dl Cunsëi provinziel cumporta l desliamënt dl Cunsëi nstës y la vela cuntestuela dl Cunsëi nuef y dl Presidënt dla Provinzia, sce chësc vën lità te na vela generela y direta. Tl cajo che l Presidënt dla Provinzia vënie lità dal Cunsëi provinziel, vën l Cunsëi deslià sce l ne ie nia bon de dejëujer si funzions pervia che l ne ie nia puscibl furmé na maiuranza tl lim de tëmp de 90 dis dala veles o dala demiscions dl Presidënt nstës. 34)

(3)  Tla Provinzia autonóma de Bulsan vën l Cunsëi provinziel lità aldò dl sistem pruporzionel. Tl cajo che la lege provinziela vëije danora la vela dl Presidënt dla Provinzia de Bulsan tla forma de na vela generela y direta, ie chësta lege provinziela da apurvé cun la maiuranza di doi terzi di cumëmbri dl Cunsëi provinziel. 34)

(4)  La leges provinzieles nunziedes pra i comes 2 y 3 ne unirà nia comunichedes al Cumisser dl Guviern aldò dl articul 55 coma 1. L Guviern dla Republica possa fé valëi la cuestion de legitimità costituzionela de chësta leges provinzieles pra la Chëurt costituzionela nchin a trënta dis do si publicazion. 34)

(5)  La leges provinzieles nunziedes tl coma 2 ie sometudes a n referendum provinziel, sce nchin a trëi mënsc do la publicazion, se l damanda n cincantejim di litadëures o n cuinto di cumëmbri dl Cunsëi provinziel. L referendum vën regulamentà dala lege aposta de uni una dla Provinzies. Sce la lege provinziela sometuda a referendum, ne vën nia apurveda cun la maiuranza dla ujes valëivles, pona ne vëniela nia promulgheda. 34)

(6)  Sce la leges ie unides apurvedes cun la maiuranza di doi terzi di cumëmbri dl Cunsëi provinziel, vën l referendum mé fat sce, tl tëmp de trëi mënsc do la publicazion dla leges, vën la dumanda sotscrita da un n chindescejim dla persones cun rejon de lité per la vela dl Cunsëi provinziel. 34)

(1)  Uni Cunsëi provinziel vën lità tres na vela generela, direta y sucrëta, ie metù adum da 35 cunselieres y resta tla ncëria per cin 5 ani. I cin ani scumëncia cun l di dla vela. La veles se dejëuj cuntestualmënter n l medemo di. Sce n Cunsëi provinziel vën lità da nuef dan l tëmp, réstel tla ncëria nchin che i cin ani dl Cunsëi che ne ie nia unì lità da nuef ie passei.

(2)  La lege per la vela dl Cunsëi provinziel de Bulsan muessa garantì la reprejentanza dla grupa de rujeneda ladina.

(3)  Na luegia tl Cunsëi provinziel de Trënt ti spieta a chël raion che tòl ite i chemuns de Moena, Soraga, Vich, Poza, Mazzin, Ciampedel y Cianacei, te chël che i Ladins dla Dolomites de Fascia ie nciasei, y l ti vën atribuì aldò dla normes stabilides cun la lege nunzieda tl articul 47 coma 2.

(4)  La veles dl Cunsëi provinziel nuef vën cunedides dal Presidënt dla Provinzia y les vën tenides al plu abenëura la cuarta dumënia dan y al plu tert la segonda dumënia do l finé via di cin ani. L decret cun chël che la veles vën cunedides vën publicà al plu tert carantecin dis dan l di dla veles.

(5)  L Cunsëi provinziel nuef se anconta per l prim iede sun cherdeda dl Presidënt dla Provinzia n cëria nia do l vintejim di da canche la persones litedes ie unides prutlamedes. 35)

(1)  I cumëmbri dl Cunsëi provinziel reprejentea duta la Provinzia. Dan unì lascei pro a eserzité si funzions juri de vester fedei ala Costituzion.

(2)  I cumëmbri dl Cunsëi provinziel ne possa nia unì cherdei a respuender de si minonghes purtedes a esprescion y dla stimes dates tl eserzize de si funzions.36)

(1)  L Cunsëi provinziel de Trënt litea danter si cumëmbri l Presidënt, n Vizepresidënt y i Secreteres.

(2)  L Cunsëi provinziel de Bulsan litea danter si cumëmbri l Presidënt, doi Vizepresidënc y i Secreteres. I Vizepresidënc vën litei danter i cunselieres dla grupa de rujeneda che ne ie nia chëla dl Presidënt. L Presidënt numinea l Vizepresidënt che l reprejentea tl cajo de assënza o mpedimënt.

(3)  Per i prim trënta mënsc dl’atività dl Cunsëi provinziel de Bulsan vën l Presidënt lità danter i cunselieres dla grupa de rujeneda tudëscia; per l tëmp che vën do ie l Presidënt lità danter i cunselieres dla grupa de rujeneda taliana. Sce la maiuranza di cunselieres respetivamënter dla grupa de rujeneda tudëscia o taliana ie a una, possel, per la dureda de tëmp curespundënta, unì lità sciche Presidënt n cunselier dla grupa de rujeneda ladina. 36)

(1)  Per i Cunsëies provinziei vel, per chël che les ie cumpatibles, la despusizions di articuli articuli 27, 31, 32, 34, 35 e 38.  37)

(1)  L Cunsëi provinziel possa unì deslià canche l cumët azions che ie contra la Costituzion o viulazions grieves contra la lege o canche l ne remplazea nia la Jonta o si Presidënt che à cumetù tel azions o viulazions contra la lege.

(2)  L Cunsëi provinziel possa nce unì deslià per rejons de segurëza naziunela.

(3)  L desliamënt vën cumandà cun decret mutivà dl Presidënt dla Republica sun delibrazion dl Cunsëi di Ministri, do avëi audì na Cumiscion de deputac y senatëures, furmeda per la cuestions regiuneles aldò dla modaliteies stabilides dala lege dla Republica.

(4)  Cun l medemo decret de desliamënt vëniel numinà na cumiscion de trëi cumëmbri, cris ora danter i zitadins litabli al Cunsëi provinziel. Per la Provinzia de Bulsan muessa la cumposizion dla cumiscion vester relativa ala cunsistënza dla grupes linguistiches che costituësc la populazion de chësta Provinzia. La cumiscion litea danter si cumëmbri l Presidënt, che eserzitea l’atribuzions dl Presidënt dla Provinzia. La Cumiscion cunedësc la veles dl Cunsëi nuef tl lim de tëmp de trëi mënsc y tòl i pruvedimënc che ie de cumpetënza dla Jonta provinziela y chëi che ne possa nia unì sburdlei. Chisc pierd si fazion sce i ne vën nia ratifichei dal Cunsëi nchin do n mëns da si cunvocazion.

(5)  L Cunsëi provinziel nuef ie cunvocà dala cumiscion te n lim de tëmp de vint dis do la veles.

(6)  L desliamënt dl Cunsëi provinziel ne cumporta nia l desliamënt dl Cunsëi regiunel. I cumëmbri dl Cunsëi provinziel deslià eserzitea inant si funzions de cunselieres regiunei nchin ala vela dl Cunsëi provinziel nuef.

(7)  Cun decret mutivà dl Presidënt dla Republica y tla usservanza dla formes ududes danora tl coma 3 vëniel dat orden dla remozion dl Pesidënt dla Provinzia, sce lità cun veles genereles y diretes, tl cajo che l ëssa cumplì azions cuntreres ala Costituzion o cumetù plu iedesc viulazions grieves dla lege. La remozion possa nce unì cumandeda per rejons de segurëza naziunela. 38)

(1)  La Jonta provinziela de Trënt ie metuda adum dal Presidënt, dal Vizpresidënt y dai assessëures. La Jonta provinziela de Trënt ie metuda adum dal Presidënt, dal Vizpresidënt y dai assessëures. La Jonta provinziela de Bulsan ie metuda adum dal Presidënt, da doi o trëi Vizepresidënc y dai assessëures. La Jonta provinziela de Bulsan ie metuda adum da trëi Vizepresidënc, de chëi che un fej pert dla grupa linguistica ladina, sce un de si cumponënc fej pert de chësta grupa linguistica. 39)

(2) La cumposizion dla Jonta provinziela de Bulsan muessa vester n relazion ala cunsistënza dla grupes de rujeneda, coche les ie reprejentedes tl Cunsëi dla Provinzia. Chëi cumëmbri dla Jonta provinziela che ne fej nia pert dl Cunsëi vën litei dal Cunsëi provinziel nstës cun la maiuranza di doi terzi de si cumëmbri sun pruposta de una o de plu grupes de cunselieres, a cundizion che l sibe l cunsëns di cunselieres dla grupa linguistica di desiniei, y plu avisa de chëi cunselieres dla maiuranza, che sustën la Jonta provinziela. I Vizepresidënc fej pert un dla grupa linguistica tudëscia, un dla grupa linguistica taliana y tl cajo dla terza frasa dl prim coma, un dla grupa linguistica ladina. L Presidënt chir ora l Vizepresidënt che l reprejentea tl cajo de assënza o de mpedimënt. 40)

(3)  Ala grupa de rujeneda ladina ti possel unì recunesciù la reprejentanza tla Jonta provinziela de Bulsan ndependentmënter dala reprejentanza pruporzionela. Sce n sëul reprejentant ladin ie tl Cunsëi provinziel y l vën lità te Jonta, muessel renunzië ala ncëria de Presidënt o Vizepresidënt dl Cunsëi provinziel.

(4)  L’apurvazion dla mozion de desfidënza ti cunfronc dl Presidënt dla Provinzia lità cun vela generela y direta, y la remozion o la demiscion de chësc cumporta la demiscions dla Jonta y l desliamënt dl Cunsëi provinziel. 41)

(1)  Pra l Presidënt y ai assessëures provinziei vëniel aplicà la despusizions dl articul 37, ora che sce les ne fossa nia cumpatibles. 42)

(1)  L Presidënt dla Provinzia9)  reprejentea la Provinzia.

(2)  L tòl i pruvedimënc che ie n cajo de bujën y de prëscia tl ciamp dla segurëza y dla igena publica tl nteres dla populazion de doi o plu chemuns.

(3)  L Presidënt9)  determinea la partizion di ciamps de cumpetënza danter i assessëures efetifs cun n decret aposta che vën publicà tl "Buletin Ufiziel" dla Region.

(4)  L tòl pert ala sentedes dl Cunsëi di Ministri, canche l vën tratà cuestions che reverda la Provinzia.

(1)  L Presidënt dla Provinzia9)  emanea, cun n si decret, i regulamënc delibrei dala Jonta.

(1)  Ala Jonta provinziela ti spietel:

1. la delibrazion di regulamënc per l’esecuzion dla leges apurvedes dal Cunsëi provinziel;
2. la delibrazion di regulamënc tla materies che, aldò dl regulamënt valëivl, toma tl pudëi de regulamentazion dla Provinzies;
3. l’atività aministrativa n cont dla cuestions de nteres provinziel;
4. l’aministrazion dl patrimone dla Provinzia y l cuntrol sun la gestion de aziendes spezieles provinzieles per servijes publics;
5. la verdia y l cuntrol sun l’aministrazions cumeneles, sun l’istituzions publiches de assistënza y de benefizienza, sun i cunsorc y sun i ënc y istituc locai, tlo leprò vën nce rateda la facultà de suspension y de desliamënt de si organns aldò dla lege. Ti caji inant nunziei y canche, per vel' gauja, ne ie l’aministrazions nia bones de mené inant si atività ti spietel nce ala Jonta provinziela de numiné i cumisseres, cun la ublianza de i crì ora tla Provinzia de Bulsan, tla grupa de rujeneda che à la maiuranza di aministradëures tl organn plu reprejentatif dl ënt. Al Stat ti resta resservei i pruvedimënc straurdeneres nunziei dessëura, sce i ie de bujën per rejons de orden publich y canche i reverda chemuns cun na populazion sëura i 20.000 abitanc;
6. l’autra atribuzions che ti vën recunesciudes ala Provinzia da chësc Statut o da autra leges dla Republica o dla Region;
7. l’adozion, tl cajo de prëscia, de pruvedimënc de cumpetënza dl Cunsëi; chisc ti muessa unì sometui ala ratifica al Cunsëi nstës te si prima senteda che vën do.