(1) Ince por doté la sozieté in house SASA Spa cun i mesi patrimoniai che ó ester por la prestaziun dl sorvisc de trasport publich local por ci che reverda efiziënza, economizité, azessibilité, continuité, nia-descriminaziun, cualité y segurëza vëgnel autorisé la partezipaziun dla Provinzia autonoma de Balsan al aumënt de capital de chësta sozieté in house, che pó ince gní a se le dé en pert cun le conferimënt de bëgns en natöra, tl respet dles desposiziuns preodüdes dal articul 2343/ter dl Codesc zivil.
(2) La sotescriziun dl aumënt de capital preodü dal coma 1 ti corespogn ala soma complessiva de 16.659.397,60 euro y porta a n aumënt dla cuota de capital dla Provinzia autonoma de Balsan ala sozieté dal 17,79 porcënt al 88,13 porcënt.
(3) I raporc cun la sozieté SASA Spa vëgn regolá da contrac de sorvisc che garantësc le control de gestiun analogh dla Provinzia sciöche comitënt, aladô de ci che vëgn preodü dal articul 5, coma 2 dl decret legislatif di 18 d'aurí dl 2016, n. 50, sciöche ince liví de sorvisc adatá ai standards de cualité y stromënc adeguá por controlé che ai vëgnes respetá. Le contrat de sorvisc mëss surapró ince garantí i vantaji por la coletivité ince por ci che reverda i obietifs de universalité y spirit de comunité, de efiziënza, de economizité y de cualité dl sorvisc, sciöche ince d'adoranza otimala dles ressurses publiches.
(4) I cosć surapró, che amunta a 5.624.966,03 euro por l'ann finanziar 2021, che vëgn dala sotescriziun preodüda dal coma 2, vëgn curis tres l'iscriziun corespognënta di imporc che la sozieté SASA Spa é debit tla previjiun dles entrades dl bilanz provinzial. 25)