s) Lege provinziala di 19 de mà dl 2015, n. 61)
Ordinamënt dl personal dla Provinzia

(1)  Cun regolamënt d’esecuziun vëgnel regolamenté, tl respet dles desposiziuns preodüdes dal articul 16, la mobilité, i comani y la recualificaziun dl personal, sciöche ince i trasferimënc danter i sorvisc, ince sce ai é te comuns desvalis.

(2)  La regolamentaziun che alda lapró tëgn cunt de chisc prinzips y criters:

1. mobilité obligatoria danter les strotöres organisatives y dirigenziales dl ënt de portignënza, sciöche ince danter i ënc preodüs dal articul 1, por bojëgns de sorvisc o por smendrí le personal surafora, sce al vëgn surandé funziuns, razionalisé o smendrí sorvisc, o por d’atres rajuns che influenzëia le desfiramënt regolar dl sorvisc o por dificoltés ti raporc interpersonai che ne vá nia da superé;
   
2. trasparënza y parité de tratamënt tles prozedöres che alda lapró, tan inant che al ti vëgn dé la prezedënza al personal implü;
   
3. respet dles domandes de mobilité, trasferimënt o comane dl personal, ti limic consentis dai bojëgns de sorvisc;
   
4. comane dl personal te d’atri ënc o da chisc ultimi tla Provinzia, sön la retüda di cosć che alda lapró;
   
5. destacamënt por la formaziun y l’ajornamënt de personal di ënc preodüs dal articul 1 te ënc o impreses publiches o privates o destacamënt de personal de ënc o de impreses publics o privac pro i ënc preodüs dal articul 1;
   
6. destacamënt dl personal che á les condiziuns fissades tles leges provinziales de setur, por fá le sorvisc sozial volontar pro ënc publics o privać y por fá ativités tl cheder dla cooperaziun al svilup, cun lapró la regolamentaziun di raporc y contrac de laur;
   
7. trasferimënt d’ofize ti caji preodüs;
   
8. azetablité dl trasferimënt, ince tignin cunt dla desponibilité di mesi dl trasport publich; sce an ne é nia a öna cun le trasferimënt vëgnel conscidré destanzes cina 50 chilometri dala sënta de sorvisc azetables; les destanzes de pendolars che é bele, danter le post de residënza y la sënta de sorvisc, de passa 50 chilometri pó ma gní superades cun le consëns dles perts. D'atri criters pó gní preodüs cun contrat coletif de raiun.
   

(3)  Le personal cun mituns cun manco de trëi agn y cun dërt de aspetativa parentala y le personal che s’anüza dles alisiraziuns preodüdes dal articul 33, coma 3, dla lege di 5 de forá dl 1992, n. 104, y mudaziuns suandëntes, vëgn trasferí cun so consëns preventif te n’atra sënta de sorvisc, ater co sce al é dificoltés ti raporc interpersonai che ne vá nia da superé.

(4) Le personal provinzial comané te d’atri ënc vëgn tut demez dal organich por la dorada dl comane. 52)

(5)  I posć che vëgn lëdi tl’aministraziun provinziala y ti ënc preodüs dal articul 1 ti mëss gní lasciá alsavëi al personal tres intranet o d’atri mesi de comunicaziun.

(6)  Por curí i posć lëdi te na manira efiziënta y efetiva pó l’Aministraziun despone tles bandides de concurs o de seleziun che le personal tut sö mëss resté por n tëmp determiné sön i posć scric fora y che la mobilité sön domanda dl personal vëgn stlüta fora. Chësc tëmp ne pó a vigni moda nia jí sura trëi agn de sorvisc efetif fora.  53)