(1) L’aziënda olache al vëgn fat le lernerat mëss ti pité la miù formaziun poscibla al lerner/ala lernera. Le datur/la daturia de laûr y le formadù/la formadëssa controlëia y valutëia regolarmënter sciöche al va le lernerat.
(2) Sce n’aziënda ô por le pröm iade formè lerneres y lerneri te n cer mistier, mëss le titolar/la titolara dl'aziënda o so rapresentant legal/süa rapresentanta legala ti lascè alsavëi dan l’assunziun al ofize provinzial competënt, che i standarg formatifs preodüs dal coma 3 por chël mistier vëgn ademplis.
(3) La Junta provinziala stabilësc, do avëi aldì les perts soziales, i standarg por la formaziun aziendala se tignin a chisc prinzips:
- le formadù/la formadëssa à les competënzes profescionales che va debojëgn y na formaziun por formadus y formadësses reconesciüda dala Provinzia o competënzes ecuivalëntes;
- le post destiné ala formaziun mëss gnì arjigné ca y organisé a na moda che al pois gnì realisé le cheder formatif aziendal;
- sce le datur/la daturia de laur ne cür nia döt le cheder formatif aziendal te süa aziënda, se obliëia le datur/la daturia de laur da garantí la formaziun integrativa extra o interaziendala aladô dl articul 15; 8)
- le datur/la daturia de laûr ne po nia avëi ciafè na condanada por dagns fisics, psichics o morai al personal dependënt o mëss avëi ciafè la reabilitaziun, tl caje de na condana.
(3/bis)I standarg preodüs dal coma 3 vëgn conscidrá recuisic dl datur/dla daturia de laur aladô dles desposiziuns statales por stlü jö i contrac de lernerat. Cun la comunicaziun preodüda dal coma 2 detlarëia le datur/la daturia de laur da ademplí i recuisic damaná. 9)
(4) Sce le personal insegnant dla scora profescionala constatëia tratan süa ativité d'insegnamënt che i lerneri y les lerneres à loćes formatives importantes, ti le lasci alsavëi al diretur/ala direturia dla scora.
(5) La Provinzia sostëgn le svilup dla cualité dla formaziun aziendala tres l'introduziun de na zertificaziun aposta por les aziëndes che se crüzia dla formaziun di lerneri y dles lerneres. Por chësc fin definësc la Junta provinziala, do avëi aldì les perts soziales, i criters por le reconescimënt de n’aziënda sciöche aziënda zertificada por la formaziun di lerneri y dles lerneres.
(6) La formaziun aziendala pó gní fata ince te istituziuns publiches. Te chësc caje n’é la formaziun nia basada sön n contrat de lernerat, mo sön n ater raport de laur de sort formativa. La Junta provinziala fej fora i criters por chësta sort de formaziun aziendala. 10)
La lëtra c) dl art. 8, coma 3 é gnü mudé insciö dal art. 6, coma 1 dla l.p. di 15 d’aurí dl 2016, n. 7.
L'art. 6, coma 3/bis é gnü injunté dal art. 6, coma 2 dla l.p. di 15 d’aurí dl 2016, n. 7.
L'art. 8, coma 6 é gnü ajunté dal art. 4, coma 1 dla l.p. di 26 de jená dl 2015, n. 1, y spo mudé insciö dal art. 29, coma 1 dla l.p. di 10 de jená dl 2022, n. 1