(1) Tla seziun A dl register di candidać a diretur vëgnel scrit ite i dependënć de rode che à n diplom de laurea y altamo cater agn de sorvisc sciöche diretur d'ofize pro l'aministraziun provinziala; ai mëss avëi ciafè te chësta funziun por dui agn indolater dala zentrala de valutaziun preodüda dal articul 24, sön proposta spezifica dl diretur de repartiziun competënt, le iudize "ezelënt" por sü gragn mirić tl eserzize di compić dirigenziai y tl arjunjimënt di obietifs fissà por l’ofize che alda laprò.
(2) Tla seziun A dl register di candidać a diretur él inće scrit ite le dependënt de rode, che à n diplom de laurea, y à eserzité por altamo cin agn alalungia la funziun de capo de cabinet dl Presidënt dla Junta provinziala.
(3) L'iscriziun tl register vëgn fata ti lims di posć desponibli tla seziun A y a vigni moda n’un vëgnel nia scrit ite de plü co cin al ann, tignin cunt dl’anzianité de sorvisc sciöche diretur.
(4) Tla seziun A dl register di candidać a diretur vëgnel inće scrit ite les porsones nominades direturs de repartiziun, sön la basa de na proposta de trëi inoms proponüs da na comisciun aposta, do avëi fat na seleziun, lasciada alsavëi denant te n avis sön le Boletin Ofizial dla Regiun. 30)
(5) Tl avis vëgnel dè dant la repartiziun zënza diretur, le terminn por la presentaziun dles domandes de amisciun, les modalitês dles proes de seleziun, le titul de stüde y, sce al va debojëgn, l’abilitaziun profescionala, sciöche inće l’esperiënza profescionala damanada. Al va debojëgn de n’esperiënza profescionala de altamo cater agn de sorvisc efetif sciöche diretur d’ofize por i dependënć de rode dla Provinzia autonoma de Balsan, y por i dependënć de rode de d’atres aministraziuns publiches de na cualifica dirigenziala analoga. Ales proes de seleziun vëgnel ametü inće:
- i dependënć provinziai de rode cun n’anzianité de sorvisc de altamo ot agn tla funziun de secretêr particolar de n componënt dla Junta provinziala, sciöche inće
- porsones fora dla publica aministraziun che à i recuisić scrić dant por l'azès al laûr pro l'aministraziun provinziala y le diplom de laurea arjunt aladô dl vedl ordinamënt o dla laurea spezialistica/magistrala, o dl titul de master universitar de pröm livel te öna dles direziuns de stüde spezificades tl avis, che à albü funziuns dirigenziales te seturs che reverda l’ativité istituzionala dl’aministraziun provinziala por altamo ot agn de sorvisc efetif. 30)
(6) La comisciun de seleziun, nominada dal Presidënt dla Provinzia, é metüda adöm da n numer döst de componënć, de alplü cin esperć ti ćiamps oget dla seleziun, che à altamo na cualifica de diretur de repartiziun, sce ai laôra tl'aministraziun. 30)31)
(7) La comisciun valutëia i partezipanć ala seleziun aladô dles modalitês dades dant tl avis, y do avëi ejaminé i curricula profescionai. I candidać nominà direturs de repartiziun che ne fej nia pert dl’aministraziun vëgn incadrà tl rode provinzial. 32)
I comesc 4, 5 y 6 dl art. 16 é gnüs mudà insciö dal art. 5, coma 5, dla l.p. di 17 de jenà dl 2011, n. 1.
L'art. 16 é gnü sostituì dal art. 39 dla l.p. di 11 d’agost dl 1998, n. 9.
L'art. 16, coma 7, é gnü ajuntè dal art. 5, coma 6 dla l.p. di 17 de jenà dl 2011, n. 1.