(1) I funzioneres deleghei ie ubliei a scrì adum, per uni semester o per uni auter tëmp plu curt stabilì dal diretëur dla Repartizion Finanzes y bilanz, l rendicont di paiamënc fac sun la giaurides de credit, partì sù aldò di capituli dl plann de gestion nunzià tl articul 12, spartian la cumpetënza dala restanzes.
(2) Ëi muessa oradechël nce lauré ora l rendicont nunzià canche l acreditamënt ie finà via o sce l ne ie nia plu l’atribuzions per chëles che l ie unì autorisà a si bën la giaurides de credit nunziedes.
(3) Pra la cuntlujion dl eserzize vën i ordens de acreditamënt cumandei a bën di funzioneres deleghei singui scurtei dla soma che ie efetivamënter unida paieda y chësta soma scurteda vën junteda al credit de restanza. L credit de restanza, che resultea dala defrënzia danter l amudlé dla giaurida de credit y l amudlé di ordens de acreditamënt efetivamënter adurvei, vën tenì sù danter la restanzes passives per la pert che forma mpëni de spëisa aldò dl articul 48.
(4) I rendiconc nunziei ti comes prezedënc vën mandei, adum cun la documentazion giustifichënta, ala Repartizion Finanzes y bilanz per l azertamënt aministratif contabl tl lim de tëmp de 60 dis do l tëmp a chël che i fej referimënt. Per bujëns tecnich-contabli possa chësc tëmp unì slungià da iede a iede cun la dezijion dl diretëur dla Repartizion Finanzes y bilanz. Chësc azertamënt possa unì dejëut tres proes a cajo aldò di criteres udui danora dala Jonta provinziela. Te chësc cajo unirà la documentazion giustifichënta dla spëises mandeda dadedò, sun dumanda dla Repartizion Finanzes y bilanz. 46)