(1) L bilanz de previjion, njinià dala Jonta, ti vën prejentà al Cunsëi provinziel cun la relazion de acumpaniamënt nchin ai 31 de utober dl ann dan chël, a chël che l fej referimënt y l vën apurvà cun lege provinziela tl respet dla pruzedura ududa danora dal articul 84 dl decret dl Presidënt dla Republica dl 31 d’agost 1972, nr. 670.
(2) L bilanz anuel de previjion ie metù adum dala previjion dla ntreda, dala previjion dla spëises y dal cheder generel ressuntif. Uniuna de chësta previjions cun l cheder generel ressuntif ie apurvedes, una ndolautra, cun articuli defrënc dla lege de bilanz. Chësta apurvazion cumporta l’autorisazion de azerté y de scudì la ntredes y de mpenië y paië la spëises coche les ie ududes danora tl bilanz.
(3) La previjions dl bilanz reverda la cumpetënza y ie partides sù, per la ntredes y per la spëises, te uniteies de previjion de basa che ie determinedes a na moda, che l curespuende a uni unità n sëul zënter de respunsabltà aministrativa, a chël che la gestion curespundënta ie sëurandata. I zëntri de respunsabltà aministrativa curespuend ala repartizions istituides cun lege provinziela dl 23 d’auril 1992, nr. 10. La uniteies de previjion de basa ie determinedes cun referimënt a raions d’atività omogenns, nce a carater strumentel, te chëi che la cumpetënzes istituzioneles dla Provinzia ie partides sù.
(4) Per uni unità de previjion de basa ndichea l bilanz l amudlé dla ntredes che n vëij danora de azerté o dla spëises, de chëles che n autorisea l mpëni tl eserzize a chël che l bilanz fej referimënt.
(5) Danter la ntredes o la spëises nunziedes tl coma 4 vën scrit ite l avanz, o respetivamënter l dejavanz, che se ëssa n cajo purtà pro, dl cunsuntif jagà ala fin dl eserzize da dant.
(6) L’adurvanza de stanziamënc de spëisa de cumpetënza, per n amudlé de ndut medemo al avanz d’aministrazion jagà y aplicà aldò dl coma 5, che ne se porta nia pro da rendiconc bele parifichei dala Chëurt di Conc, ie sometù ala parificazion da pert de chësta dl rendicont dl eserzize da dant. A chësc fin vëniel njuntà al bilanz de previjion la lista di capituli de spëisa cun la ndicazion dla soma relativa. La Jonta provinziela possa, cun na si delibera, restan mpe la soma cumplessiva repurteda tla lista nunzieda te chësc coma, fé mudazions cun referimënt sibe ai capituli de spëisa che ala somes. Sce l avanz d’aministrazion, che resultea dal rendicont parificà dala Chëurt di Conc, ie mënder de chël aplicà aldò dl coma 5, ndividuea la Jonta provinziela, tl tëmp de 15 dis da canche l ie unit fat la parificazion, i stanziamënc de spëisa de cumpetënza che ne possa nia unì adurvei per n amudlé curespundënt al mënder avanz. 4)