(1) La leges provinzieles che vëij danora spëises de nvestimënt a carater plurianuel dà normalmënter mé sëura l amudlé cumplessif y la pert a cëria dl bilanz bele apurvà o bele sotmetù al Cunsëi provinziel, renvian ala lege finanziera anuela nunzieda tl articul 22 la determinazion dla cuotes destinedes a pesé sun i eserzizies che vën do.
(2) Per la compra y la realisazion de lëures publics o d’autri ntervënc y proiec de chëi che la realisazion se tira ora per de plu eserzizies finanzieres, possel unì autorisà cun lege provinziela la stipulazion de cuntrac o a uni moda la sëurantëuta de mpënies a cëria de de plu eserzizies, nchin al plu cin ani, tl lim dla spëisa ntiera autoriseda, determinan la cuota de spëisa a cëria dl bilanz plurianuel. La lege finanziera anuela possa, ti lims dl’autorisazion cumplessiva, remudelé la cuotes ududes danora per uni un di ani tëuc n cunscidrazion y la curidura curespundënta n referimënt al bilanz plurianuel, tenian ënghe cont di mpënies sëurantëuc ti eserzizies da dant. 2)
(3) La leges provinzieles che autorisea la cunzescion de alesiramënc tla forma de cuntribuc te rates anueles determinea l’autëza dl lim de mpëni che curespuend ala prima rata anuela, la destumënza, l lim de tëmp mascim nchin chël che la rates anueles curespundëntes muessa unì metudes da garat, la curidura n referimënt al bilanz plurianuel, la cuota de spëisa eventualmënter a cëria dl bilanz curënt o dl bilanz bele prejentà al Cunsëi provinziel per la sëurantëuta di mpënies che à si prima destumënza tl eserzize curespundënt, y la curidura aldò.