(1) Tla leges provinzieles che cumporta spëises nueves o sëurora o de mëndra ntredes muessel unì dat sëura l amudlé y la curidura finanziera, sibe a fazion dl bilanz anuel, sibe dl bilanz plurianuel, che ie n forza tl mumënt dl’apurvazion de chësta leges provinzieles.
(2) Tl cajo che l bilanz per l eserzize finanzier suzessif fossa bele unit apurvà, vën l amudlé dla cëries y la curidura finanziela curespundënta, sce l fossa de bujën, referìi a chësc bilanz.
(3) Per arjonjer la mira nunzieda tl coma 1 unirà i dessënies de lege purtei dant dala Jonta provinziela, njuntei dal propunënt cun na relazion tecnica tlarienta dla spëises nueves o sëurora o dla mëndra ntredes, y i unirà sometui dan l’apurvazion da pert dla Jonta provinziela al’ejaminazion dal pont de ududa finanzier dala Repartizion Finanzes y bilanz, che lëura ora i regulamënc finanzieres. Per i dessënies de lege che ne vën nia purtei dant dala Jonta provinziela, ti dà la Repartizion nunzieda, sun dumanda dla Cumiscion legislativa cumpetënta dl Cunsëi provinziel al Presidënt dla Provinzia o al assessëur provinziel cumpetënt per la finanzes y l bilanz, tl tëmp de 15 dis n bensté sun l vester adatà dla curidura finanziera curespundënta.