(1) Por slisiré le bojëgn de cuartiers por lauranć é l’IPFS autorisé a stlüje jö convenziuns por na dorada de nia manco de diesc agn y de nia plü de 20 agn cun ënć publics y privać che à imobii che podess gnì adorà sciöche ćiases alberch por lauranć.
(2) Les ćiases alberch mëss ti pité ai lauranć na poscibilité d’abitaziun dëgna y a paiamënt, organisada dantadöt te na forma de cuartiers cun mangé y dormì. Chëstes strotöres mëss pité sorvisc coletifs por ademplì i bojëgns de mangé y dormì di lauranć.
(3) Tla convenziun mëss l’ënt s’impegné da mëte a desposiziun n numer determiné de posć da dormì, da garantì i sorvisc aladô dl articul 114 y da i assegné tl respet di criters d’amisciun indicà tl articul 103.
(4) Tla convenziun nominada tl coma 1 vëgnel inće regolè i raporć finanziars danter l’IPFS y i ënć. La soma anuala che l’IPFS ti paiarà ai ënć ne po nia ester plü co le 30 porcënt dl afit provinzial che vëgn calcolè aladô dl articul 7 y fej referimënt ala spersa convenzionala dla ćiasa alberch. Le contribut dl IPFS vëgn adorè por curì les mëndres entrades dl afit di posć da dormì che ne po nia gnì metüdes a ćiaria dles porsones che vir tla ćiasa alberch aplican i criters indicà tl articul 103.
(5) Le regolamënt intern por les ćiases alberch convenzionades mëss gnì concordè cun l’IPFS y mëss se tignì ai criters dà dant tla deliberaziun aladô dl articul 103.
(6) Les somes che l’IPFS ti darà ai ënć ti vëgn dà zoruch dal’aministraziun provinziala a ćiaria dla sort d’intervënt aladô dl articul 2, coma 1, lëtra K).167)