b) Lege Provinziala di 17 de dezëmber dl 1998, n. 131)
Ordinamënt sön le frabiché abitatif alisiré

(1) Les abitaziuns dl IPFS, dla Provinzia, di comuns y di ënć publics, stlujon fora i ënć publics economics, che é gnüdes realisades totalmënter o en pert cun mesi finanziars dl Stat o dla Provinzia vëgn assegnades aladô dles desposiziuns de chësta seziun.

(2) Nia sotmetüdes ales desposiziuns de chësta seziun n’é:

1. les abitaziuns che é destinades a abitaziuns de sorvisc;
2. les abitaziuns di ënć publics de previdënza nia fates sö cun mesi finanziars dl Stat;
3. les abitaziuns che a gauja de lians particolars a chi ch’ares é sotmetüdes y de sües carateristiches particolares n’é nia adatades al frabiché abitatif sozial;
4. les abitaziuns de frabica vedla di ënć publics dà dant tl coma 1 y les abitaziuns provisores destinades a ti tè n’abitaziun a families che por gauja de catastrofes naturales é restades zënza na ćiasa o mëss arbandonè sües abitaziuns por rajuns de segurëza publica o de utilité publica;
5. les abitaziuns destinades a sistemé por n pez families tl caje ch’al vëgn fat intervënć de recuperada;
6. les abitaziuns adorades por sistemé temporaneamënter families che vëgn dant sön la gradatöra por l’assegnaziun d’abitaziuns te na posiziun adeguada y che vëgn manaciades da gnì sfratades bele dan la surandada probabla dl’abitaziun;
7. les abitaziuns che vëgn dades en afit dal IPFS do avëi ciafè l’autorisaziun dl’aministraziun provinziala ala comunité raionala competënta te chël raiun, a ënć, cooperatives o assoziaziuns, che à aladô de so statut le fin de dè assistënza a porsones che fej pert de categories soziales particolares aladô dl articul 22.