(1) La Provinzia realisëia l'integraziun dles porsones cun handicap ti cursc de formaziun profescionala ordinars di zëntri publics y privać y ti garantësc ales scolares y ai scolars y ales lerneres y ai lerneri cun handicap che n'é nia bogn da d'adorè les metodes d'aprendimënt ordinares, da podëi s'imparè n mistier, inće tres ativitês spezifiches tl cheder dles ativitês dl zënter de formaziun profescionala, tignin cunt de regola di interesc gnüs fora dai planns educatifs individualisà, realisà tratan döt le percurs scolastich. Por chësc fin mët i zëntri de formaziun profescionala a desposiziun i mesi de sostëgn y les atrezadöres che va debojëgn.
(2) Sce la direturia/le diretur dla scora profescionala o dl curs de formaziun profescionala vëgn alsavëi dal personal insegnant che la scolara/le scolar cun handicap à dificoltês particolares da frecuentè la scora o le curs él n grup metü adöm dala direturia/dal diretur y dal consëi de tlassa dla scora o dl curs, da na colaboradëssa/n colaboradù dla formaziun profescionala y dala psicologa competënta/dal psicologh competënt che tol na dezijiun sce al porta valch da lascè la porsona cun handicap te chë strotöra.
(3) I cursc de formaziun profescionala tëgn cunt dles capazitês desvalies y di bojëgns desfarënć dla scolara/dl scolar cun handicap y le mët te tlasses normales, te cursc spezifics, te cursc por s'arjigné ca al monn dl laûr o te cursc de lernerat. La Formaziun profescionala po atestè nia ma la cualificaziun plëna, mo inće cualificaziuns parziales. 51)
