(1) Dötes les zitadines y düć i zitadins che à süa residënza tla provinzia de Balsan y se tëgn sö ilò te na manira permanënta ti po pormez ales ativitês y ai sorvisc dla Provinzia sce ares/ai vëgn manacià da handicap o à handicap de nasciüda o che é gnüs fora plü tert. Les zitadines/I zitadins che n'à nia süa residënza tla provinzia o n'à gnanca so domizil permanënt ilò y les porsones da foradecà ti po ma pormez sce ai surantol instësc les spëises o sce chëstes vëgn surantutes da ënć che é oblià al'assistënza sön la basa dles normes varëntes.
(2) I intervënć tl setur dl'assistënza scolastica che reverda la sistemaziun te na ćiasa di studënć, le sostëgn finanziar impede la sistemaziun te na ćiasa di studënć, le sorvisc de mensa, le trasport, i libri y i mesi didatics é debann o ma en pert a ćiaria dla porsona che à le dërt da i ciafè, aladô di criters preodüs dal articul 1, coma 5.
(3) Les domandes de reablilitaziun profescionala y de formes particolares d'assistënza scolastica, da dè dant tl regolamënt d'esecuziun, mëss naôta gnì ejaminades dal'assessuria provinziala competënta/dal assessur provinzial competënt, sce ares comporta:
- na spëisa de plü co 5 miliuns de lires;
- intervënć te istituć spezialisà defora dala provinzia o foradecà;
- intervënć che ne mëss nia assolutamënter ester o n'é nia tlermënter adatà por la reabilitaziun;
Al mëss gnì tignì cunt dla motivaziun y dla documentaziun dada jö dala porsona che damana sciöche inće dl arat dl comitê tecnich preodü dal articul 24.
(4) Sce la domanda vëgn azetada ti mët l'assessuria competënta/l'assessur competënt la spëisa relativa en pert a ćiaria dla porsona assistida, tl respet dl articul 1, coma 5; al vëgn tut en conscidraziun süa situaziun finanziara o, sce ara é sot ai dejedot agn, chëra de sü geniturs. Sce la domanda ne vëgn nia azetada o vëgn ma azetada en pert, pol gnì fat recurs ala Junta provinziala te 15 dé da süa comunicaziun.
(5) L'import odü danfora dal coma 3, lëtra a) po gnì ajornè ann por ann dala Junta provinziala y plü avisa aladô dl indesc di prisc de consum por les families de lauranć y dependënć, inresciü dal ISTAT.