(1) Le trasport scolastich y, sce al é debojëgn, l'acompagnamënt dles porsones cun handicap vëgn metüs a jì tres i sorvisc organisà dala Repartiziun provinziala Mobilité, ater co sce al é la familia che se crüzia de chësc sorvisc. Le trasport y, sce al é debojëgn, l'acompagnamënt dles porsones cun handicap ai sorvisc soziai mec residenziai vëgn fać aladô de chësta priorité:
- dales families;
- tres le sorvisc de trasport publich;
- tres i sorvisc de trasport scolastich che é bele, por i posć desponibli; 21)
- dai ënć de gestiun di sorvisc soziai.
(2) Tl respet dl trasport preodü dal coma 1, lëtra b) dl articul 16 po i zëntri soziai se cruzié diretamënter, te caji de prescia o nezescité, dl trasport de sües assistides y de sü assistis cun sües porsones d'acompagnamënt eventuales, sciöche inće, sce al é ćiamò lerch, inće d'atres porsones cun handicap che ne vëgn nia assistides da d'ëi. Por chësta inćiaria à i zëntri soziai auti de sorvisc; ai po inće s'anuzé di sorvisc de trasport di amarà o de mesi de trasport publics o privać, surantolon i cosć. 22)
(3) La Junta provinziala po ti surandè i sorvisc de trasport y/o acompagnamënt preodüs da chësc articul y dal articul 16 a assoziaziuns, istituziuns o ënć adatà autorisan la stipulaziun dles convenziuns che alda laprò.
(3/bis) Por l'eserzize dl sorvisc de trasport por porsones cun handicap preodü dal coma 3 ne ôl nia ester l'autorisaziun por l'eserzize dl sorvisc d'auto imprestè cun autist. 23)
(4) Aladô dles desposiziuns stabilides dala Junta provinziala ti pol gnì conzedü rembursamënć ales families dles porsones cun handicap y a che che acompagnëia o trasporta la porsona cun handicap, cun n meso de trasport publich o privat a sües spëises, da süa abitaziun a scora, ai zëntri soziai, ai ënć y ales istituziuns por fins d'assistënza, prevenziun, cura y reabilitaziun y inće indô derevers. La retüda vëgn comanada dala direturia d’ofize competënta/dal diretur d'ofize competënt. 24)
(5) I provedimënć nominà ti comesc da denant de chësc articul po inće gnì aplicà al trasport por jì a laurè y tó pert a manifestaziuns culturales, sportives y dl tëmp lëde, sce chëstes manifestaziuns vëgn conscidrades de importanza particolara por l'integraziun dles porsones cun handicap tl monn dl laûr y dla comunité locala. 25)
(6) I criters, la forma d'esecuziun y les condiziuns particolares por la retüda dles spëises vëgn determinà cun regolamënt d'esecuziun. 26)
L'art. 14, coma 1 é impröma gnü sostituì dal art. 11 dla l.p. di 14 de dezëmber dl 1988, n. 56, y spo dal art. 6, coma 1 dla l.p. di 13 de mà dl 2011, n. 3.
Le coma 2 é gnü sostituì dal art. 11 dla l.p. di 14 de dezëmber dl 1988, n. 56.
Le coma 3/bis é gnü injuntè dal art. 20, coma 3 dla l.p. di 21 de jenà dl 1998, n. 1.
Le coma 4 é gnü sostituì dal art. 11 dla l.p. di 14 de dezëmber dl 1988, n. 56.
Le coma 5 é gnü ajuntè dala l.p. di 17 de jügn dl 1991, n. 16.
Le coma 6 é gnü ajuntè dala l.p. di 17 de jügn dl 1991, n. 16.