(1) Sce al n'é nia poscibl fà jì la porsona cun handicap a n curs de formaziun profescionala general, spezial o propedeutich, vëgnera scrita ite a n curs d'ocupaziun y de sozialisaziun gestì dai zëntri soziai. Tl raiun de competënza de vigni unité sanitara locala vëgnel metü a jì almanco un n te' curs. 20)
(2) Le curs nominé dessura dess portè pro a svilupé ćiamò deplü les capazitês psichiches y fisiches, dantadöt les abilitês manuales dla porsona cun handicap por che ara arjunjes la miù autonomia y sozialisaziun poscibla, aladô di programs y orars aprovà dala Junta provinziala, sön proposta de n collegium tecnich, preodü dal art. 24 y do avëi aldì la consulta provinziala por porsones cun handicap.
(3) Por le fin preodü tl coma da denant s'anüza i zëntri soziai de so personal y de sües atrezadöres; a öna cun les direturies y i direturs competënć se sorvësci inće dla colaboraziun dl personal dla formaziun profescionala y adora de preferënza i locai, les atrezadöres y i materiai dles scores de formaziun profescionala y te vigni caje i sorvisc coletifs de mensa, convit, recreaziun y tëmp lëde.
(4) De regola döra le curs trëi agn. Sce la condiziun dla porsona cun handicap le lascia pro, pora gnì scrita ite a n curs de formaziun profescionala; sce chësc n'é nia poscibl, ala fin di trëi agn, vëgn la porsona cun handicap tuta sö sön domanda te un di zëntri soziai.