(1) Vigni zënter sozial vëgn gestì da n comitê aposta nominé dala Junta provinziala y é metü adöm:
- dala porsona responsabla dl zënter;
- da döes porsones che laôra tl zënter litades dal personal;
- da trëi porsones che rapresentëia che che s'anüza di sorvisc dl zënter, danter chëstes poscibilmënter na porsona che s'anüza dl zënter; ares vëgn nominades dales assoziaziuns interessades; sce chëstes n'é nia bones da jì a öna, chir fora la Junta provinziala dai inoms metüs dant dales assoziaziuns interessades trëi porsones sciöche rapresentantes;
- da na porsona en rapresentanza dl'unité sanitara locala competënta te chël raiun;
- da n'assistënta/n assistënt dl sorvisc sozial provinzial. 13)
(2) Le comitê de gestiun dl zënter lîta fora de so gremo süa presidënta/so presidënt che resta tl'inćiaria por trëi agn alalungia; süa composiziun mëss ti corespogne ala consistënza di trëi grups linguistics sciöche ara resultëia dal'ultima cumpëda generala dla popolaziun tl raiun dl zënter sozial che tol ite plü comuns che vëgn determinà cun regolamënt d'esecuziun de chësta lege.
(2/bis) L'inćiaria da presidënta/presidënt n'é nia compatibla cun chëra de responsabla/responsabl dl zënter. Ala presidënta/Al presidënt dl comitê de gestiun ti spétel n paiamënt, che ne po nia ester plü alt co l'indenité che ti speta ales presidëntes/ai presidënć dles istituziuns publiches d'assistënza y benefiziënza de secunda categoria aladô dles normes regionales, da stabilì cun deliberaziun dla Junta provinziala. 14)
(3) Les ativitês d'assistënza, d'educaziun y d'atres ativitês ti zëntri soziai ti vëgn naôta afidades al personal assistënt y educatif che à le medemo lingaz dla uma dla porsona assistida; por ći che reverda chësc personal che fej pert dl organich odü danfora tles tabeles injuntades C/I, C/II y C/III vëgnel apliché l'articul 21, ultimo coma de chësta lege. Sce al n'é nia assà personal preodü dales tabeles injuntades C/I, C/II y C/III po les ativitês nominades dessura gnì fates dal personal corespognënt odü danfora tla tabela B injuntada.
(4) Le comitê de gestiun:
- laôra fora le regolamënt intern dl zënter sozial;
- fej süa ativité sön la basa dl program anual y trienal aprovè dala Junta provinziala;
- ti fej la proposta ala Junta provinziala da istituì sorvisc integratifs o periferics implü;
- promöi y mët a jì ativitês recreatives, sportives y culturales por porsones cun handicap, diretamënter o tres acordanzes aposta cun istituziuns publiches o privates;
- deliberëia tl cheder di stanziamënć metüs a desposiziun dala Junta provinziala:
- les spëises liades ala gestiun di convić che é colià ai zëntri soziai;
- les spëises por prestaziuns che vëgn a s'al dè impede la sistemaziun te convić, sciöche l'afidamënt te na familia, la sistemaziun te d'atres strotöres d'assistënza, te ponsionà o te strotöres d'alberch, le sorvisc de mensa y d'atri sorvisc analogs;
- la cumpra y la manutenziun dles atrezadöres tecnich- scientifiches, dl material didatich y dl aredamënt;
- i intervënć nominà pro la lëtra d);
- les cumpres, les venüdes y les comisciuns liades ales ativitês de produziun ti salfs protezionà;
- l'assegnaziun de na premia de sostëgn por les porsones cun handicap che frecuentëia i salfs protezionà, ti limić stabilis ann por ann dala Junta provinziala;
- se crüzia aladô dl D.P.R. di 30 de jügn dl 1965, n. 1124, y mudaziuns suandëntes, dl'assiguraziun cuntra inzidënć söl laûr y cuntra maraties profescionales dl personal di zëntri soziai y dles porsones che s'anüza di sorvisc che vëgn pità;
- tol sö les porsones che à le dërt tles strotöres y ti sorvisc dl zënter; l'estlujiun eventuala de zacai mëss gnì motivada y al po gnì fat recurs ala Junta provinziala, che tol spo na dezijiun cun n provedimënt definitif, do avëi aldì le collegium tecnich preodü dal art. 24.
(5) La Junta provinziala deliberëia la cumpra o la costruziun de imobii sciöche sënta di zëntri soziai; ara autorisëia da stlüje jö contrać por l'afit de imobii por i medemi fins. Le patrimone imobiliar vëgn aministré dai ofizi competënć dl'Aministraziun provinziala.
(6) A vigni zënter sozial ti vëgnel garantì n sorvisc de secretariat. Pro vigni zënter sozial él na funzionara delegada/n funzionar deleghè che realisëia en economia les inćiaries preodüdes dal coma 4, lëtra e). La porsona competënta por le secretariat fej inće da secreteria dl zënter sozial.