(1) Les inćiaries aladô dl articul 46, coma 3, vëgn atribuides a tëmp determiné dal Diretur dl comprensore sanitar , tignin cunt dles valutaziuns aladô dl coma 4 dl medemo articul. Les inćiaries döra almanco trëi agn y nia deplü co set agn, cun la poscibilité de renovamënt.
(2) L’inćiaria de dirigënt sanitar cun l’inćiaria de diretur sozed osservan les normes che reverda la repartiziun di posć aladô dl proporz di trëi grups linguistics che resultëia dala ultima cumpëda generala, cun referimënt al ambit teritorial provinzial. Tla indiziun dla seleziun di Direturs medi dà la Junta provinziala le consëns tla cornisc dles diretives sura la repartiziun di posć aladô dl proporz di trëi grups linguistics.
(3) L’inćiaria de dirigënt sanitar cun l’inćiaria de diretur ti vëgn dada, do süa publicaziun tla Gasëta Ofiziala dla Republica y tl Boletin Ofizial dla Regiun Trentin-Südtirol, dal Diretur general, en acordanza cun le Diretur dl comprensore sanitar, sön la basa de candidać chiris fora da na comisciun aposta. La comisciun vëgn nominada dal Diretur dl comprensore sanitar y ara é metüda adöm dal Diretur sanitar o da so deleghé y da dui esperć tla disciplina, che é ogeć dl’inćiaria; un de chisc vëgn nominé dal Consëi di sanitars.
(4) La composiziun dla comisciun mëss corespogne ala consistënza di trëi grups linguistics, che resultëia dala ultima cumpëda ofiziala, cun referimënt al ambit teritorial provinzial. Un di trëi mëmbri po inće ester dl grup linguistich ladin.
(5) Tl caje ch’al ne n’é nia meso de nominé na comisciun metüda adöm aladô dl coma 4, po l’Assessur provinzial por la sanité desvié dales normes sön le proporz di grups linguistics.
(6) Ai mëmbri deforadecà dla Provinzia autonoma de Balsan, che vëgn inće dai paîsc dl’Uniun Europeica, componënć dles comisciuns ejaminadësses por le conferimënt y le renovamënt dles inćiaries de dirigënt sanitar cun l’inćiaria de diretur tl’Aziënda sanitara y esperć tla disciplina, ti spétel dlungia l’indenité de misciun y de iade n compëns brutto che vëgn stabilì dala Junta provinziala.
(7) Les inćiaries de dirigënt sanitar cun l’inćiaria de diretur döra da cinch ćina set agn. Canche i singui contrać de laûr toma, po le Diretur general, cun le consëns dl Diretur dl comprensore sanitar y do avëi aldì l’arat positif dl Diretur sanitar y dl Diretur aministratif, renovè chisc contrać por n tëmp de almanco dui agn o ti dè inćiaries nöies tres la prozedöra aladô dl coma 3.
(8) Les inćiaries de dirigënt vëgn revocades, aladô dles prozedöres preodüdes dales desposiziuns varëntes y dai contrać coletifs provinziai de laûr, tl caje che :
- les diretives stabilides dala direziun generala o dala direziun dl departimënt ne vëgn nia osservades;
- i obietifs assegnà ne vëgn nia arjunć;
- la responsabilité vëgn ferida;
- le tëmp de proa ne vëgn nia superè;
- y te düć i atri caji preodüs ti contrać de laûr.
(9) Ti caji che é particolarmënter sceri, po le Diretur general, cun le consëns dl Diretur dl comprensore, se retrà dal contrat de laûr aladô dles desposiziuns dl codesc zivil y di contrać coletifs de laûr.
(10) Tl caje d’assënza, d’impedimënt o ti caji de prescia, vëgn le Dirigënt sanitar cun l’inćiaria de diretur sostituì da n dirigënt dla medema repartiziun o dl medemo sorvisc, chirì fora dal responsabl dla strotöra instëssa y nominé dal Diretur general dl’Aziënda sanitara cun le consëns dl Diretur dl comprensore sanitar .
(11) Tl caje che le post de dirigënt sanitar cun l’inćiaria de diretur ne n’é nia ocupé y che le sostitut ne n’é nia gnü nominé aladô dl coma 10, ti vëgnel surandè i compić revardënć a n dirigënt dla medema repartiziun y dl medemo sorvisc cun le provedimënt dl Diretur general dl’Aziënda sanitara cun le consëns dl Diretur dl comprensore sanitar por n tëmp de ot mëisc. Sce le post de dirigënt sanitar cun l’inćiaria de diretur ne vëgn nia curì por manćianza de candidać adatà, po l’assegnaziun di compić plü alć gnì arlungiada de ot mëisc ćina che i concursc por l’azès ala direziun ne vëgn nia fać.
(12) Tl caje che le post ne vëgn nia ocupé, ne n’à le destrigamënt dles funziuns de dirigënt sanitar cun l’inćiaria de diretur por i pröms dui mëisc degun dërt a n compëns implü.
(13) Por le tëmp de nominaziun a Diretur sanitar de n diretur medich, ti pol gnì assegné sües funziuns de direziun y de organisaziun dla strotöra de provegnënza a n ater mede aladô dla prozedöra preodüda tl coma 3.92)