c') Lege Provinziala di 5 de merz dl 2001, n. 71)

(1) Istituì é le Comitê etich provinzial sciöche organn consultif dl’aministraziun provinziala, che à le compit de dè so arat, racomanaziuns y de fà inrescides sön i problems morai dl’ativité sanitara y dl’archirida tla medejina, tla sconanza dla sanité y tla biologia, fajon referimënt ala porsona singola, a grups soziai y a döta la sozieté.

(2) Le Comitê dà jö so arat sön l’ativité sanitara en relaziun cun:

1. la sperimentaziun de diagnoses y de terapies nöies sön la porsona, tignin cunt dles competënzes di comitês etics tles aziëndes sanitares;
2. la genetica, la procreaziun assistida y la medejina perinatala;
3. les donaziuns y i traplanć de organns y de tesciüs umans;
4. la sconanza dla cualité dla vita y dla dignité umana dl amarè tignin cunt dantadöt di paziënć terminai, di paziënć sot ai dejedot agn y di andicapà;
5. la terapia dl dolur;
6. vigni atra ativité sanitara diagnostica y terapeutica che sciüra sö problems etics-morai.

(3) L’arat dl Comitê mëss gnì damanè te düć i caji olach’i dërć dla porsona umana podess gnì feris tres n intervënt tlinich, l’archirida y la sperimentaziun bio-medejinala.

(4) Le Comitê à implü le compit de:

1. dè diretives generales tl ćiamp dla sperimentaziun tlinica che vëgn fata tles strotöres sanitares provinziales;
2. abiné y valorisé i dać y i ać aministratifs che vëgn fornis dales aziëndes sanitares por les sperimentaziuns tliniches che é bele gnüdes fates;
3. elaurè propostes por ativitês de informatica y de formaziun sön les tematiches etiches-morales che alda pro l’ativité medica-assistenziala.

(5) Le Comitê é metü adöm da:

1. trëi medi de ospedal;
2. n mede spezialisé tla medejina generala y tles asseguraziuns;
3. n mede de medejina generala;
4. n psicologh;
5. n rapresentant di infermiers;
6. n espert dla bioetica;
7. n espert dla bioetica spezialisada tla teologia;
8. n rapresentant dles organisaziuns de sconanza di interesc di anuzadusc dl Sorvisc sanitar provinzial;
9. n iudicadù o n iurist;
10. n assistënt religius dl ospedal;
11. n espert dla statistica;
12. n rapresentant dl Ordinn di medi y di medi di dënz dla Provinzia de Balsan.80)

(6) La Junta provinziala definësc le funzionamënt y la dorada dl Comitê y nominëia le presidënt, so sostitut sciöch’inće i mëmbri aladô dl coma 5, lëtres a), b), c), d), e), g), i) y j) sön les indicaziuns di ordinns respetifs, di coleghiums profescionai o dles autoritês competëntes. I mëmbri aladô dl coma 5, lëtres f) y h) vëgn chiris fora dala Junta provinziala sön la basa di mirić particolars arjunć tla bioetica o tla sconanza di consumadus. Les funziuns de secretêr vëgn destrigades da n dependënt dla Repartiziun Sanité, che é almanco dl sesto livel.

(7) Al presidënt y al vizepresidënt dl Comitê etich provinzial ti spétel na indenité de funziun. L’ativité di mëmbri dl Comitê etich provinzial vëgn indenisada tres la soma de presënza. La soma dl’indenité de funziun y dla soma de presënza é determinada dala Junta provinziala.81)

(8) Le Comitê etich provinzial mët sö, tl ambit dles ressurses finanziares preodüdes vigni ann por süa ativité, n program de laûr che vëgn aprovè dala Junta provinziala.82)